Լևոն Ալթունյանը արգելված վայրերում ծխելու համար նախատեսվող բարձր տուգանքների մասին

Հայաստանի առողջապահության նախարար Լևոն Ալթունյանը համաձայն չէ, թե ծխախոտի օգտագործումը սահմանափակող օրենքի նախագծում նախատեսված բարձր տուգանքները բյուջեն լցնելու միջոց են: Ազգային ժողովում լրագրողների հետ զրույցում Լևոն Ալթունյանն ընդգծեց, որ բյուջեն լցնելու միջոց կլինի այդ տուգանքների էժանացումը: 

«Եթե մենք էժանացնենք այդ տուգանքները, դա կհամարվեր բյուջեն լցնելու միջոց։ Եթե տուգանքը բարձր է, արգելելու միջոց է, եթե ցածր է, առևտրի առիթ է՝ մի քիչ փող տանք, որ կարողանանք ծխել։ Մենք փորձել ենք գնալ ծխելը վերացնելու ճանապարհով»,- նշել է Ալթունյանը։

Հարցին, թե հնարավո՞ր էնախարարությունը զիջի այդքան բարձր տուգանքների սահմանումը, Ալթունյանը հստակ պատասխան չի տվել և ասել է, որ ամեն ինչ պարզ կլինի խորհրդարանի քննարկումների ժամանակ։

«Այն ճանապարհը, որը ընտրի Խորհրդարանը, դա էլ կլինի այն ուղեցույցը, որով կշարժվի նաև նախարարությունը», - ասաց նախարարը։

Հիշեցնենք, որ տարբեր վայրերում ծխելու համար տուգանքը 50 հազար դրամից մինչև 250 հազար դրամ է կազմում։ Բացի այդ, ծխախոտի գովազդի համար, օրինակ, նախագծով սահմանվում է 700 հազար դրամ, հատով վաճառքի համար՝ 300 հազար դրամ, ծխելն արգելող նշան չտեղադրելու համար՝ 100 հազար դրամ, տարածքում ծխելը չարգելելու համար ղեկավարին սպառնում է 500 հազար դրամ տուգանք։