Պատգամավորները կոչ են անում դատարանում փաստաբանների հարցում գնալ փոխզիջման

ԱԺ մի խումբ պատգամավորներ իրենց մտահոգություններ են հայտնում դատական նիստի ընթացքում փաստաբանների նկատմամբ մինչև 100 հազար դրամի չափով կարգապահական տույժ կիրառելու դրույթի վերաբերյալ, որը հանվել է Դատական օրենսգրքից և ներառվել Քաղաքացիական դատավարության օրենսգրքում:

Ազգային ժողովի «Ծառուկյան» խմբակցության պատգամավոր Նաիրա Զոհրաբյանն ընդգծեց, որ իրենք ստացել են Փաստաբանների պալատի կոչը՝ ուղղված խորհրդարանին, որ նման կարգավորմամբ նախագիծը չի կարելի ընդունել:

«Ես մեկ անգամ ևս կառավարությանը կոչ եմ անում հանդիպել փաստաբաններին, քանի որ այս նախագիծը ոչ միայն բովանդակային առումով է խնդրահարույց, այլ նաև հակասություններ ունի Սահմանադրության հետ: Ի վերջո, որևէ մեկը իրավունք չունի կանոնակարգ խախտել և առաջինից երկրորդ ընթերցման ժամանակահատվածում բերել երկու նոր նախագիծ, որոնց դրույթներն առաջին ընթերցմամբ չեն քննարկվել:

Այս դրույթները հետագայում Եվրոպական դատարանում դառնալու են լրջագույն վիճարկման առարկա: Փաստաբանների անկախության հետ կապված խնդիր կա: Դատավորը չի կարող սանկցիա կիրառել և փաստաբանի անկախությունը սահմանափակել: Հորդորում եմ այս նախագիծը քվեարկության չդնել, հորդորում եմ սա սկզբունքի հարց չսարքել և կրկին քննարկել շահագրգիռ բոլոր կողմերի հետ»,- նշել է Զոհրաբյանը:

«Ելք» խմբակցության պատգամավոր Էդմոն Մարուքյանը նշեց, որ անհասկանալի է, թե ինչու է կառավարությունն այսպիսի հրատապությամբ ցանկանում անցկացնել փաստաբաններին տուգանելու վերաբերյալ դրույթը: Նա նկատեց, որ նախագիծը ներկայացնելու ընթացքում չի երաշխավորվել, որ այդ դրույթն ընդունելուց հետո այն չի չարաշահվելու:

«Ես կարծում եմ, որ չարաշահվելու է այս դրույթը, որովհետև մեր դատական իշխանությունը դեռևս պատրաստ չէ նման իշխանություն ստանալու: Մենք նաև հիմնավորումներ չենք ստացել, թե ինչով է պայմանավորված փաստաբանների նկատմամբ սանկցիա կիրառելու դրույթի ընդունումը»,- ընդգծեց Մարուքյանը:

Օրենքի նախագծի վերաբերյալ իր մտահոգությունը հայտնեց ՀՅԴ խմբակցության ղեկավար Արմեն Ռուստամյանը: Նա հայտնեց, որ իրենք հանդիպել են Փաստաբանների պալատի նախագահի հետ, քննարկել հարցը և եկել եզրահանգման, որ իսկապես կա խնդիր, բայց նաև կա հնարավորություն հարցը կոմպրոմիսային ճանապարհով լուծել: 

«Ես կարծում եմ տեղի չէ առանց համաձայնեցնելու այս հարցը բերել այստեղ, արագ քննարկել ու անցկացնել: Քանի որ փաստաբանները, հասկանալով խնդրի էությունը, պատրաստ են գնալ կոմպրոմիսի, իրենք էլ ունեն առաջարկներ ներկայացնելու, կարծում եմ, որ այնքան էլ հրատապ չէ, որ այս հարցը հենց հիմա լուծվի: Ես կարծում եմ պետք չէ ավելորդ լարվածություն առաջացնել, որևէ խանգարող հանգամանք չկա, որ այս հարցը հանգիստ քննարկենք»,- նշեց Ռուստամյանը:

Պատգամավորի համար հասկանալի չէ առաջարկվող լուծումը, թե դատավորը պետք է փաստաբանի նկատմամբ սանկցիա կիրառելու մասին որոշում կայացնի:

«Եթե դատավորը կողմերից մեկն է, ինչո՞ւ նա պետք է որոշի՝ ինչպիսի սանկցիա կիրառել փաստաբանի նկատմամբ: Այստեղ անաչառության սկզբունքը խախտվելու է, և արդարադատության մասին խոսք լինել չի կարող:

Բացի այդ, եթե փաստաբանին, օրինակ, 100 հազար դրամով տուգանելու մասին որոշում կայացվի, դա կարող է համարվել քրեական պատժատեսակ, և փաստաբանները դա կարող են վիճարկել միջազգային դատարանում:

Ցանկացած փաստաբան կարող է նման դեպքերում դիմել միջազգային դատարան և Հայաստանի դեմ վճիռները շատանան, ինչը մեզ բոլորովին պետք չէ»,- եզրափակեց ՀՅԴ խմբակցության ղեկավարը:

Հիշեցնենք, որ Քաղաքացիական դատավարության մասին օրենսգիրքը և հարակից նախագծերի փաթեթը երկրորդ ընթերցմամբ քննարկվել է խորհրդարանի կողմից և փետրվարի 9-ին կդրվի քվեարկության: