«Եթե Ամուլսարը ցիանացնեն, ողբերգություն կլինի». երկրաբան

 

 

Մետաղական օգտակար հանածոներ արդյունահանող և արդյունահանման պատրաստվող ընկերությունները նախորդ տարի իրականացրել են շուրջ 235 միլիոն ԱՄՆ դոլարի ներդրումներ։

ՀՀ էներգետիկ ենթակառուցվածքների և բնական պաշարների նախարարության կայքում տեղ գտած հրապարակման համաձայն՝ 2017թ. ընթացքում մետաղական օգտակար հանածոների երկրաբանական ուսումնասիրության համար տրամադրված ընդերքօգտագործման թույլտվություններով առաջիկա 3 տարվա ընթացքում կներդրվի շուրջ 3 միլիարդ դրամ: Ի տարբերություն արդյունահանված մետաղական հանքաքարի, որի ծավալն անցած տարի գրեթե չի փոխվել, արտադրված ապրանքային արտադրանքը գումարային արտահայտությամբ համալրվել է շուրջ 30 %-ով։

Միաժամանակ 2017թ. ընթացքում հաստատվել են ոչ մետաղական օգտակար հանածոների նոր պաշարներ, որի արդյունքում օգտակար հանածոների պաշարների պետական հաշվեկշիռը համալրվել է շուրջ 900 հազար խորանարդ մետրով։ Նույն ժամանակահատվածում հաստատված մետաղական օգտակար հանածոների նոր պաշարները կազմել են շուրջ 5 միլիոն տոննա հանքաքար:

past.am-ը զրուցել է երկրաբան Սարգիս Հովելյանի հետ՝ հասկանալու համար, թե նման մասշտաբի արդյունահանումը կարող է երկրի պաշարները սպառման հասցնել: Բացի այդ, որքան էլ ներդրումներ իրականացնեն և փորձեն նորմերին համապատասխան կատարել իրենց աշխատանքները, ամեն դեպքում բնությանը ինչ-որ չափով վնաս հասցվում է:

Սրան երկրաբանը պատասխանեց, որ ոչ մետաղային հանածոների մեջ մտնում են տուֆերը, պեռլիտները ու բենտոնիտային կավերը, որոնց պաշարները բավական մեծ են: Տուֆերի պաշարները հսկայական են:

«Քանի որ հաշվարկվել է խորանարդ մետրով, ապա խոսքն այստեղ տուֆերի մասին է: Իսկ դրանք մեզ մոտ շատ-շատ են: Վտանգավորը մետաղականներն են՝ Թեղուտը և Ամուլսարը: Եթե Ամուլսարը ցիանացնեն, մեր երկրի, կոնկրետ Վայոց ձորի համար ողբերգություն կլինի:

Թեղուտն, իհարկե, դադարեցրել են, բայց վտանգը կախված է, պոչամբարը լցված է: Նույն կերպ է նաև Արդվանիկում, այնտեղ էլ է պոչամբարը լցված: Դրանք թունավոր ու վտանգավոր են, բայց Ամուլսարի համեմատությամբ չարիքի փոքրագույնն են:

Եթե վերևում ասված ներդրումները վերաբերում են Ամուլսարին, ապա դրանք մեզ համար ողբերգական կլինեն, որովհետև այնտեղ ցիանացում է գնալու: Հայաստանում դեռ ցիանացում չի արվել, ցիանաթթուն թունավոր կապտաթթուն է»,- ասաց նա:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ