Կայացավ «International Media Holding»-ի 2018 թ. մրցանակաբաշխությունը

 

 

Այսօր Հայաստանի պետական ֆիլհարմոնիայում տեղի ունեցավ «International Media Holding»-ի ամենամյա մրցանակաբաշխությունը, որի ընթացքում մրցանակներ ստացան տարբեր ոլորտի գործիչներ:

Մեդիահոլդինգը հիմնադրվել է 2011 թ. Արման Վարդանյանի կողմից, ով անձամբ էր մրցանակներ ու պատվոգրեր հանձնում տարբեր անվանակարգերում հաղթած գործիչներին: Past.am-ի լրագրողը նույնպես ներկա է եղել մրցանակաբաշխությանը:

«Շատ հաճելի է այսօր այստեղ տեսնել այդքան տաղանդավոր մարդկանց: Մարդկանց, ովքեր իրենց կյանքի ընթացքում բազմաթիվ անգամ ապացուցել են, որ իրենք որևիցե պատնեշ չունեն, ունեն սկզբունքներ և խնդիրներ, որոնք շուտափույթ լուծումներ են պահանջում, և որոնք իրենք կարող են հեշտությամբ լուծել: Հայ ազգը պետք է հպարտանա, որ ունի նման զավակներ, ովքեր կարողանում են մեր երկրի պատիվը բարձր պահել թե՛ Հայաստանում և թե՛ Հայաստանից դուրս»,-ողջույնի իր խոսքում ասաց Արման Վարդանյանը:

Տարվա հասարակական գործիչ անվանակարգում մրցանակը տրվեց ՓՄՁ հաշվապահների ասոցիացիայի նախագահ Վահագն Համբարձումյանին: Տարվա վարչական շրջանի ղեկավար անվանակարգում հաղթեց Արաբկիր վարչական շրջանի ղեկավար Հովհաննես Վարդանյանը: Տարվա քաղաքապետ անվանակարգի հաղթողը դարձավ Աբովյանի քաղաքապետ Վահագն Գևորգյանը: Տարվա մեկենաս մրցանակին արժանացավ գործարար Արտակ Թովմասյանը:

Տարվա դեսպան մրցանակը տրվեց Հայաստանում Ռուսաստանի Դաշնության արտակարգ և լիազոր դեսպան Իվան Վոլոնկինին, ով մեծ հպարտություն է համարում նման մրցանակի արժանանալը, քանի որ այդ անվանակարգում նա ընտրվել է ոչ թե ինչ-որ հանձնաժողովի, այլ հասարակ մարդկանց քվեարկության շնորհիվ:

Տարվա արդյունավետ գործող կառույցը Սփյուռքում անվանակարգում երկու հաղթող կար՝ Ուկրաինայի հայերի միության ղեկավար Վիլեն Շատվորյանը և Ռուսաստանի հայերի միության մոսկովյան քաղաքային գրասենյակի ղեկավար Շահեն Պետրոսյանը:

Տարվա մարզպետ անվանակարգում մրցանակը տրվեց Արմավիրի մարզպետ Աշոտ Ղահրամանյանին, ով շնորհակալության խոսքում նշեց, որ այս կոչումը ստիպում է մարդուն ավելի լավ աշխատել հետագայում և համոզված է, որ այն աշխատանքներից, որ իրենք Արմավիրի մարզպետարանի թիմով անվերապահորեն կատարում են, շահում է ժողովուրդը և երկիրը:

Տարվա ամենաարդյունավետ ուժային կառույց մրցանակը տրվեց ՀՀ ոստիկանությանը: Հարցված քաղաքացիների մեծամասնությունը հենց այս ուժային կառույցի անունն է տվել ի պատասխան այն հարցի, թե որն է տարվա ամենավստահելի և արդյունավետ աշխատած ուժային կառույցը: Ի դեպ,ՀՀ ոստիկանությունը սրանից երեք տարի առաջ՝ 2015 թ. նույնպես դարձել էր այս մրցանակաբաշխության մրցանակակիր՝ ճանաչվելով տարվա լավագույն իրավապահ մարմինը: Իրենց կառույցի հերթական մրցանակը ստանալու էր եկել ոստիկանության հասարակայնության հետ կապի և լրատվության վարչության պետ Աշոտ Ահարոնյանը:

Տարվա մարզիկ անվանակարգում մրցանակը ստացավ հունահռոմեական ոճի ըմբշամարտիկ Միհրան Հարությունյանը: Տարվա մշակութային գործիչ անվանակարգում մրցանակը տրվեց պարուհի Սոֆի Դևոյանին:

Տարվա բժիշկ մրցանակը ստացավ Նորք-Մարաշ բժշկական կենտրոնի գլխավոր բժիշկ, տնօրեն Լիդա Մուրադյանը: Վերջին մրցանակն էլ տարվա մարդ անվանակարգն էր, որը տրվեց քաղաքական գործիչ, պատգամավոր Գագիկ Ծառուկյանին:

Տարվա պատգամավոր մրցանակին էլ արժանացել էր Նիկոլ Փաշինյանը, ում մրցանակի հետևից եկել էր մեկ այլ պատգամավոր՝ Արարատ Միրզոյանը:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ