Առաջիկա օրերին տաք ջերմային ֆոնը կպահպանվի

ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը պատասխանել է Past.am-ի հարցերին:

-Այսպիսի տաք փետրվար ունենալու դեպքում կարո՞ղ ենք կանխատեսել, որ ձմեռը կտեղափոխվի մարտ-ապրիլ ամիսներ:

-Բնականաբար, ոչ: Դա ոչ մի կապ չունի մարտ-ապրիլ ամիսներին դիտվող ջերմային ֆոնի հետ: Չի բացառվում, որ առանձին օրեր օդի ջերմաստիճանը նվազի, ինչը նորմալ է և բնորոշ է մեր բնակլիմայական պայմաններին: Մենք միշտ էլ մարտին ունենում ենք առանձին օրերին ցուրտ օդի ներթափանցում, ջերմաստիճանի անկում և այլն, բայց ասել, որ հունվարին և փետրվարին ձմեռ չի եղել և այն կտեղափոխվի մարտ-ապրիլ ամիսներ, օրինաչափ չէ և նման բան չի կանխատեսվում:

-Ձեր կանխատեսումներով փետրվարի ջերմային ֆոնը այսպես էլ կպահպանվի՞:

-Մենք ի սկզբանե տաք փետրվար էինք կանխատեսել, և օդի ամսական միջին ջերմաստիճանը նորմայից շատ բարձր է լինելու՝ մոտ 5-6 աստիճանով: Նախ ասեմ, որ առաջիկա 5-6 օրերին որևէ ցուրտ օդի ներթափանցում չի կանխատեսվում, ջերմաստիճանի անկում նույնպես: Վերջին տասը օրերի ընթացքում կարող է ջերմաստիճանը որոշ չափով նվազել, դեռ հստակ չէ, բայց նաև չի բացառվում:

-Ասում են՝ Մոսկվայում ինչ եղանակ լինում է, մի քանի օր անց մեզ մոտ է կրկնվում:

-Նախ՝ այդպիսի օրինաչափություն չկա(ծիծաղում է), և հետո՝ Մոսկվայում եղածի վրա 10 օր անցել է:

-Փետրվար ամիսը էլ ո՞ր տարիներին է այսպես տաք եղել:

-Այս ձմեռը մեր պատմության մեջ երրորդն էր 1963 և 1966 թթ. հետո: Այդ թվականներին նույնպես ունեցել ենք շատ տաք դեկտեմբեր, հունվար և փետրվար ամիսներ: Այս տարին երրորդ տեղն է գրավում: Ավելի տաք է եղել 1963 և 1966 թթ.:

Փետրվարի այս տարվա ամենատաք օրը եղել է փետրվարի 12-ը: Արարատյան դաշտում գրանցվել էր 18 աստիճան տաքություն: Շատ տաք է եղել փետրվարը նաև 2010 և 2015 թթ., բայց այդ տարիներին ժամանակ առ ժամանակ գրանցվել է ջերմաստիճանի անկում: Իսկ 1966 և 1963 թթ. կայուն տաք է եղել:

-Եվ տաք փետրվարին հաջորդե՞լ է տաք, նորմալ գարուն:

-Նորմալ գարուն ասելով՝ ի՞նչ եք հասկանում: Մեզ մոտ գարունը նորմալ չէ: Նորմալ գարուն ասելով մենք չպիտի հասկանանք, թե ջերմաստիճանը կայուն բարձրանում է մինչև օգոստոս: Ընդհակառակը, գարնանը ժամանակ առ ժամանակ ջերմաստիճանը նվազում է, լինում են և՛ տաք օրեր, և՛ շատ ցուրտ օրեր մինչև ապրիլի 10-15-ը, որից հետո եղանակը նոր միայն բալանսի է գալիս:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ