Գուրգեն Եղիազարյան. «Հայաստանն ու հայերը չեն կարող քրդերի թիրախը հանդիսանալ»

Օրեր առաջ  սոցիալական ցանցերում լուրեր տարածվեցին, որոնց համաձայն Հայաստանի Հանրապետության սահմանը 50-70 քուրդ ահաբեկիչ է հատել: Ըստ տարածված լուրերի՝ քրդական խումբը գտնվում է Սյունիքի մարզի Գորիս քաղաքում, և ոստիկանները քաղաքացիներին խնդրել են զգուշանալ:

Ոստիկանությունից մինչ այս ո՛չ հերքել և ո՛չ էլ հաստատել են տեղեկատվությունը:
Past.am-ի հետ զրույցում Ազգային անվտանգության նախկին փոխնախարար Գուրգեն Եղիազարյանը նախ ընդգծեց, որ թեև տեղեկատվություն չունի 50-70 քուրդ ահաբեկիչների մասին, բայց, այնուամենայնիվ, կարծում է, որ այս ամենի մեջ վտանգ չկա:

 «Չեմ կարծում, թե քրդերը, որոնք հասել են Հայաստանի Հանրապետության սահման, պետք է ահաբեկիչներ լինեն: Քրդերն այսօր լրջագույն խնդիրներ ունեն Արևմտյան Հայաստանում: Չեմ կարծում, որ քրդերը ահաբեկչական գործողություններ կկակատարեն: Եթե նրանք ազգությամբ քուրդ են, ես բացառում եմ, որ ահաբեկչական գործողությունների դիմեն: Ես քրդերի կողմից վտանգ տեսնել չեմ կարող: Նրանք լուրջ խնդիրներ ունեն թուրքերի հետ, և Հայաստանն ու հայերը չեն կարող նրանց թիրախը հանդիսանալ»,- ասաց Գուրգեն Եղիազարյանը:

ԱԱԾ նախկին պաշտոնյայի խոսքով՝ այն,  որ սահմանն անցնելու վերաբերյալ տեղեկատվություն կա, արդեն իսկ լավ է:
 
«Հայ-թուրքական սահմանը պաշտպանված է, և այս ամենը դրա ապացույցն է: Եթե մենք արդեն տեղեկություն ունենք, որ սահմանը հատել են, արդեն իսկ պաշտպանված ենք: Շատ վատ կլիներ, եթե չիմանային, թե ով է գալիս, և ով է գնում»,-եզրափակեց Գուրգեն Եղիազարյանը:

Աննա Բադալյան