Դավթաշենի կամրջի տակ մոր ու դստեր դիեր են հայտնաբերվել. պարզվում են մահվան հանգամանքները

Դավթաշենի կամրջի տակ այսօր երիտասարդ կնոջ ու երեխայի դիեր են հայտնաբերվել:
ՀՀ քննչական կոմիտեի նախագահի խորհրդական Սոնա Տռուզյանը Past.am-ի հետ զրույցում հաստատեց տեղեկությունը՝ նշելով, որ նաև քննչական բաժնում է նման ահազանգ ստացվել:

«Դեպքի վայր է մեկնել քննչական օպերատիվ խումբը, կատարվում են անհրաժեշտ միջոցառումներ՝ պարզելու մահվան հանգամանքերը»,-ասաց Ս. Տռուզյանը:

Նշենք, որ ըստ մամուլում շրջանառվող տեղեկությունների՝ նրանք մայր և դուստր են:

 Հարցին, թե հաստատվել է արդյոք, որ տուժածները մայր ու դուստր են, Սոնա Տռուզյանը պատասխանեց. «Նրանց ինքնությունը պարզվել է և նախնական տվյալներով, այո, նրանք մայր ու դուստր են»:

Ավելի վաղ ՀՀ արտակարգ իրավիճակների նախարարությունը հաղորդագրություն է տարածել, նշելով, որ փետրվարի 15-ին, ժամը 14:31-ին տեղեկություն է ստացվել, որ Երևան քաղաքի Արաբկիրի այգում հայտնաբերվել է երկու դի և անհրաժեշտ է փրկարարների օգնությունը:
Դեպքի վայր է մեկնել Ճգնաժամային կառավարման ազգային կենտրոնի օպերատիվ խումբը, մեկ մարտական հաշվարկ, հատուկ նշանակության փրկարարական աշխատանքների իրականացման կենտրոնի փրկարարական ջոկատը և հոգեբանական աջակցության բաժնի հրահանգիչը:

Հաղորդագրության  մեջ նշվել է, որ Երևան քաղաքի Դավթաշենի կամրջի տակ՝ Հրազդանի կիրճում, հայտնաբերվել են՝ 1981 թ. ծնված Գ. և 2009 թ. ծնված Ա. Հ.-ների դիերը:

Աննա Բադալյան