Սերժ Սարգսյանը համառորեն չի մատնում Պուտինին

Մյունխենի անվտանգության համաժողովի ժամանակ Սերժ Սարգսյանին հարց է ուղղել «Եվրասիա խմբի» նախագահ և հիմնադիր Յան Բրեմերը:

- ... դեռ 2013 թվականին Հայաստանը հրաժարվել էր, մի կողմ էր գցել Եվրամիության հետ ասոցացման համաձայնագիրը և նոր գործընկերություն էր ստեղծել: Զղջացե՞լ էիք, թե Ռուսաստանի ճնշումն էր, թե կյանքն էր փոխվել: Սա՞ է արդյոք նոր մոդելը, նոր օրինակը:

Սերժ Սարգսյանին այս հարցը շատ են տալիս և դեռ տալու են, որովհետև գործընթացի ծայրահեղ ոչ թափանցիկությունը բոլորի մոտ կասկածներ է առաջացրել, որ եղել է ճնշում ռուսական կողմից: Սարգսյանն այդ ճնշումն իհարկե հերքում է, բայց ռուսական քաղաքականությանը ծանոթ եվրոպացիները թե ավանդաբար, թե օպերատիվ ինֆորմացիայի մակարդակում տիրապետում են ռուսական ճնշման մասին փաստերի ու չեն դադարում տալ այս հարցը:

Նրանց թիրախն իհարկե Սարգսյանը չէ, այլ Պուտինը ՝ նրա դեմ քարոզչական պատերազմում ևս մեկ զենք ձեռք բերելը:

Սարգսյանը, սակայն, համառորեն Պուտինին չի մատնում: Ընդհակառակը, մեղքը գցում է Եվրոպայի վրա ու միշտ մատնանշում Ուկրաինայի օրինակը: Օրինակ, որ ձախողված է Եվրոպայի համար, որովհետև փաստացի Ռուսաստանից անջատված այդ երկրում, այդպես էլ եվրոպական տիպի պետության ձևավորման միտումներ չեն նկատվում:

Կընդունե՞ն արդյոք Եվրոպացիները Սարգսյանի այս գործելաոճը, երբ ռուսների փոխարեն իրենք են մեղավոր դուրս գալիս: Թե Սարգսյանը հույսը դրել է նրա վրա, որ Եվրոպան հոգնել է հակառուսական հիստերիայից ու փորձում է հնարավոր կոմպրոմիսի ժամանակ խաղաղության աղավնու դերակատարում ստանձնել:

Սարգիս Մեսրոպյան
past.am