«ՇՊՀ ռեկտորը փորձում է լռեցնել մեզ ու ազատել աշխատանքից». դասախոսները ԿԳՆ հանձնախմբի այց են պահանջում

 

 

Շիրակի Միքայել Նալբանդյանի անվան համալսարանի ռեկտոր Սահակ Մինասյանը փետրվարի 23-ին Գիտխորհրդի արտահերթ նիստ է հրավիրել և իր կողմից վերահսկվող Գիտխորհրդի միջոցով որոշում է ընդունել էթիկայի հանձնաժողով ձևավորել:

Այս մասին Past.am-ի հետ զրույցում հայտնեց բուհի դասախոս, քաղաքագետ Գագիկ Համբարյանը, ով բուհի մի շարք դասախոսների հետ արդեն մի քանի ամիս է, բուհում առկա խնդիրների մասին է բարձրաձայնում:

«Էթիկայի հանձնաժողովը 10 օրվա մեջ պետք է քննի ու եզրակացություն տա կոնկրետ իմ հրապարակային գործունեության մասին: Այսինքն՝ այն մասին, թե իբրև մենք՝ ես և պարոն Խորիկյանը (ՇՊՀ դասախոս, ով նաև հացադուլ էր հայտարարել խմբ.) վարկաբեկում ենք բուհը, ես գրառումներ եմ անում, ինչի պատճառով բուհը վարկաբեկվում է: Ավելի մեծ մառազմ ես չեմ տեսել: Պարոն Մինասյանը գործում է միջնադարյան կանոններով: Եթե ես քննադատում եմ նրա գործունեությունը և ապացուցված եմ քննադատում, նա գերադասում է ինձ դատի չտալ և շագանակները փորձում է կրակից հանել Գիտխորհրդի և բուհի միջոցով: Այսինքն՝ իրեն ուղղված կոնկրետ մեղադրանքները վերագրում է բուհին: Բուհի հետ է կապված իմ կյանքի կեսը: Իմ գրառումների մեջ ես երբևիցե բուհին չեմ վարկաբեկել: Մենք ինչ գրում կամ ասում ենք, կոնկրետ վերաբերվում են ՇՊՀ ռեկտորի գործունեությանը: Նա ասում է, թե ես բուհին վարկաբեկել եմ՝ հայտարարելով, որ Գիտխորհուրդը գործում է նրա քմահաճույքներով: Ես հիմա էլ եմ այդ կարծիքին: Հիմա պարոն Մինասյանն այսպիսի մեթոդներով փորձում է մեր բերանը «փակել»: Երեխաները բակերում կռիվ-կռիվ, բժիշկ-բժիշկ էին խաղում, հիմա պարոն Մինասյանը որոշել է դատավոր-դատավոր խաղալ»,-ասաց Գ. Համբարյանը՝ ընդգծելով, որ եթե վիրավորել են ռեկտորին՝ թող դիմի դատարան:

 

«Մենք մեր հարազատ բուհը երբևիցե չենք վարկաբեկել: Հարցը Սահակ Մինասյան ռեկտորի գործունեությանն է վերաբերում: Նրան սարսափելի նյարդայնացրել են մեր վերջին բարձրաձայնումները: Մասնավորապես՝ փետրվարի 12-ին բուհում կայացած դեկանների ու ամբիոնի վարիչների ընտրությունների բարձրաձայնումներն այն մասին, որ նա կոպտորեն խախտել է կանոնադրությունը: Հիմա նա փորձում է հաշվեհարդար տեսնել մեր նկատմամբ»,-ասաց նա:

 

Մեր նախորդ համարում ներկայացրել էինք ԿԳՆ-ի պարզաբանումը՝ կապված բուհի կանոնադրությունը խախտելու հետ: Գագիկ Համբարյանը ԿԳՆ պարզաբանումը ծիծաղելի որակեց. «Շատ զարմացած եմ, որ ԿԳՆ աշխատակազմի ղեկավարը կարող է այդպիսի անգրագետ պարզաբանում տալ: Իրենք նշել են հոդվածներ, բայց միևնույն ժամանակ չեն նշել, որ 98-րդ հոդվածի երրորդ կետով պարզ գրված է, որ ֆակուլտետային խորհուրդը սահմանված կարգի համաձայն իրականացնում է ֆակուլտետի դեկանի ընտրություն: 102-րդ կետում էլ գրված է՝ դեկան ընտրվում է գիտական խորհրդում, փակ գաղտնի քվեարկությամբ և հինգ տարի ժամկետով, դեկանի պաշտոնում ընտրված է համարվում ֆակուլտետի խորհրդում ամենաշատ, բայց մասնակիցների ձայների առնվազն կեսից ավելի ձայներ հավաքած թեկնածուն: Ֆակուլտետային խորհրդում ընտրված դեկանը նույն Գիտական խորհրդում կարող է չանցնել, դրա համար է 102-րդ կետը: ԿԳՆ-ի պատասխանի մեջ միտումնավոր «մոռացել» են 98-րդ հոդվածի երրորդ ենթակետը: Պատասխանը մեզ ոչ միայն չի բավարարում, այլև վատ վիճակի մեջ է գցում հենց ԿԳՆ-ին»:

 

Գագիկ Համբարյանը շեշտեց, որ Էթիկայի հանձնաժողովի անվան տակ Ս. Մինասյանը փորձում է լռեցնել իրենց. «Նույն Գիտխորհրդին խառնում է իրեն վերագրված մեղադրանքների մեջ և Գիտխորհրդի միջոցով ինձ և պարոն Խորիկյանին ուզում է ազատել աշխատանքից: Մենք պահանջում ենք ԿԳՆ հանձնախմբի շատ արագ այց՝ ՇՊՀ: Պարոն Մինասյանը մեզ մեղադրում է Քրեական օրենսգրքի 135-րդ և 136-րդ հոդվածներով, մեկը՝ զրպարտություն, մյուսը՝ վիրավորանք: Հիմա ինչ իրավունքով է էթիկայի հանձնաժողովը դրել ու քննում այդ հոդվածները: Պահանջում եմ, որ նա ինձ դատի տա: Դատարանում թող պարզվի՝ ինչ իրավունքով է նա բուհը խառնում այս ամենի մեջ: Իմ բոլոր գրառումներն ուղղված են Սահակ Մինասյանի հանցավոր և ապօրինի գործունեությանը»:

 

 

 

Աննա Բադալյան