Հայկական ավիաընկերությունները դեռ չծնված՝ օրորոցում խեղդվում են

Past.am-ին հասած տեղեկությունների համաձայն «Տարոն ավիա» ընկերությունը բավականին ծանր ֆինանսական դրության մեջ է: Ու չնայած ընկերությունն այդ մասին լռում է, սակայն անցյալ տարվա դեկտեմբերի 31-ից մինչ օրս որևէ թռիչք չիրականացնելու պատճառն այն է, որ հայկական ընկերության կազմակերպած թռիչքները շահավետ չեն և այդ պատճառով էլ ավիաընկերությունը որոշել է կոմերցիոն դադար վերցնել:

Հանրային խորհրդի տրանսպորտի քաղաքականության հարցերի հանձնաժողովի նախագահ, «Ազգային ավիացիոն միավորում» հկ նախագահ Դմիտրի Աթբաշյանը Past.am_ի հետ զրույցում ասաց, որ իր տեղեկություններով ավիաընկերությունը որոշել է Դուբայում բազավորվել և այնտեղից է սկսելու թռիչքներ կազմակերպել:

«Ցավն այն է, որ երբ «Տարոն ավիան» սկսեց Գյումրիի օդանավակայանից թռիչքներ իրականացնել, Գյումրիում հայտնվեց «Պոբեդա» ավիաընկերությունը և մինչ օրս էլ թռիչքներ է իրականացնում: Բայց խնդիրն այն է, որ ռուսական բոլոր ավիաընկերությունները, որոնք գրանցված են Ռուսաստանի Դաշնությունում շատ մեծ արտոնություններից են օգտվում»,- ասաց Դ.Աթբաշյանը:

Նա նաև տեղեկացրեց, որ ռուսաստանյան օդանավակայանների սպասարկման գները մոտ երկու անգամ ավելի էժան են «Զվարթնոց» օդանավակայանի սպասարկման գներից: Բայցի այդ, ռուսաստանում գրանցված ընկերությունները վճարում են ծառայության կես գինը: Ստացվում է, որ ի սկզբանե ավիաընկերությունների մեկնարկային մրցակցային պայմաններն անհավասար են և այս պայմաններում, բնական է, որ հայաստանում գրանցված որևէ ընկերություն չի կարող մրցակցությանը դիմանալ:

«Եթե «Պոբեդան» դեպի Գյումրի 20-30 չվերթ է կատարում, որից միայն մեկն էր Գյումրիից մեկնարկում, ապա «Տարոն ավիայի» դեպքում բոլոր թռիչքները սկսվում և ավարտվում էին Գյումիրում: Այդ պատճառով էլ հայկական ավիաընկերության ծախսերը բավականին թանկ էին ստացվում»,- ասաց Դ. Աթբաշյանը:

Մասնագետի կարծիքով, այս ամենին վերջ տալու և հայկական ավիաընկերությունների համար նպաստավոր պայմաններ ստեղծելու համար Հայաստանը պետք է վերջակետ դնի իր կողմից հայտարարած բաց երկնքի քաղաքականության վրա: Առավել ևս, որ մեր երկիրը ոչ թե նման պայմանագիր է ստորագրել, այլ ընդամենը հայտարարել է այդ մասին:
«Մեր երկիրն ընդամենը հայտարարել է, որ մեզ մոտ բաց երկինք է: Հիմա էլ պետք է հայտարարեն, որ բաց երկնքի քաղաքականությունը շարունակվում է, բայց քանի որ կա անառողջ մրցակցություն տեղական և միջազգային կազմակերպությունների ավիաընկերությունների միջև, ուստի Հայաստանն օտարերկրյա ընկերությունների աշխատանքը սահմանափակելու մասին որոշում է ցանկանում ընդունել»,- ասաց Դ. Աթբաշյանը:

Տեղական ավիաընկերությունների համար նպաստավոր պայմաններ ստեղծելու երկրորդ տարբերակը օդանավակայանների կողմից սպասարկման գների վերանայումը պետք է լինի, որով կրկին պետք է կառավարությունը զբաղվի:

Թե ինչու կառավարությունը քայլեր չի ձեռնարկում հայկական ավիացիայի զարգացման համար նպաստավոր պայմաններ ստեղծելու համար, պարզ չէ: Դրա փոխարեն, որպես բաց երկնքի քաղաքականության հաղթանակ ներկայացվում է, թե այս ընթացքում ինչ նոր ավիաընկերություններ են մուտք գործել հայկական ավիացիոն շուկա և որքանով են կարողանում ընդլայնել իրենց կանոնավոր չվերթների աշխարհագրությունը: Եվ բնական է, որ նման պայմաններում հայկական որևէ ընկերություն ոչ միայն չի կարող զարգանալ, այլ դեռ չծնված կարող է օրորոցում խեղդվել:

Արմինե Գրիգորյան