Արմեն Աշոտյանը Հոլոքոստին առնչվող բաց դաս անցկացրեց թիվ 195 ավագ դպրոցում

Պատմության դասերը սերտելով կարող ենք կանխել անցյալի ուրվականների վերադարձը:

Լրագրողների հետ զրույցում այս մասին նշեց ՀՀ կրթության և գիտության նախարար Արմեն Աշոտյանը` անդրադառնալով ցեղասպանություններին: Երևանի թիվ 195 ավագ դպրոցում նախարարը բաց դաս վարեց և 12-րդ դասարանի աշակերտներին պատմեց Հոլոքոստի մասին:

«Հայոց ցեղասպանության 100-րդ տարելիցի նախաշեմին ՀՀ կրթության և գիտության նախարարությունը մի շարք նախագծեր էր ազդaրարել` իրականացնելու մեր հանրակրթական և բարձրագույն ուսումնական հաստատություններում, ինչպես նաև արտերկրում: Այսօր մենք շարունակում ենք միջոցառումները: Այս շաբաթվա ընթացքում հանրապետության բոլոր ավագ դպրոցներում մեկական դաս կնվիրվի այլ ցեղասպանություններին: Մենք այս ընթացքում արդեն խոսել ենք Հայոց ցեղասպանության մասին, եղել են բաց դասեր»,-  նշեց Արմեն Աշոտյան ը:

Նախարարի խոսքով` թեպետ ապրիլի 24-ն անցել է, բայց ողջ տարին է խորհրդանշական, և անհրաժեշտ է, որ երիտասարդները տեղեկություններ ունենան նաև այլ ցեղասպանությունների մասին:

«Ես ընտրել եմ Հոլոքոստը, բայց մենք դպրոցներում խոսելու ենք նաև այլ ցեղասպանություններից: Այն մի կողմից ամենաուսումնասիրված ոճիրն է Հայոց ցեղասպանության հետ, մյուս կողմից` քաղաքական իմաստով շատ կարևոր է բացատրել և' զուգահետները, և' տարբերությունները: Կարևոր է նույնքան պահանջատեր լինել միջազգային ճանաչման և դատապարտման գործում, որքան  ժամանակին եղել և այսօր մնում են մեր հրեա բարեկամները»,-շեշտեց նախարարը:

Արմեն Աշոտյանի խոսքով` կապ չունի, թե որ էթնիկ, կրոնական, ռասայական խմբի դեմ է կատարվում այս կամ այն ոճիրը:

«Ոճիրը մարդկության դեմ է, հետևաբար` եթե այսօր նման գործողությունների ենթարկվում է մի ժողովուրդ, կրոնական խումբ` ինչպես, օրինակ, եզդիները Իրաքում կամ «Իսլամական պետության» կողմից վերահսկվող տարածքներում քրիստոնյաները, ապա չդատապարտելով, չպատժելով և կանխման մեխանիզմներ չստեղծելով որևէ ժողովուրդ չի կարող հանգիստ ապրել»,-նշեց նա:

«Բաց դասեր առաջին անգամ չեմ իրականացնում, այս վեց տարիների ընթացքում տարբեր թեմաներով հանդիպումներ եղել են: Ես ուզում եմ, որ երեխաները գնան տուն և այս հարցին առնչվող որևէ գրականություն ընթերցեն: Պատմության գրավչությունը ոչ այնքան թվերի, անունների մեջ է, այլ ինչո՞ւ, ինչպե՞ս հարցերի պատասխանները տալու մեջ: Պատմության դասերը սերտելով` կարող ենք կանխել անցյալի ուրվականների վերադարձը»,-ընդգծեց Աշոտյանը:

Նախարարը ինտերակտիվ կերպով վարեց դասը` դասապրոցեսի մեջ ներգրավելով նաև աշակերտներին, հարցեր տալով նրանց և դասի ավարտին պատասխանեց թեմային առնչվող հարցերի: