Պոլիտեխնիկցի լինելը ոչ միայն պատվաբեր է, այլև՝ հեռանկարային բոլոր ժամանակներում

Մարտի 6-ին Պոլիտեխնիկական համալսարանում մեկնարկեց միջոցառումների մեկնարկը: Միանգամից մի քանի հոբելյան՝ բուհի հիմնադրման 85-րդ, «Պոլիտեխնիկ» պաշտոնաթերթի հիմնադրման 60-րդ, Պոլիտեխնիկական համալսարանում տպագիր մամուլի 85-րդ, ուսանողական մամուլի 15-ամյակներին նվիրված հանդիսավոր միջոցառումները:

Առաջին անգամ մամուլի և լրատվության ոլորտում տեղի ունեցավ նաև «Պոլիտեխնիկական» անվամբ մրցանակաբաշխություն: Առաջին մրցանակները բուհի ռեկտոր, պրոֆեսոր Ոստանիկ Մարուխյանը հանձնեց ՀՌԱՀ Գագիկ Բունիաթյանին և ՀՀ հեռուստառադիոընկերության խորհրդի նախագահ Ռուբեն Ջաղինյանին:

Հոբելյանական միջոցառումների մեկնարկին ներկա էին ՀՀ Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, ՀՀ ԿԳ նախարարի տեղակալ Վահրամ Մկրտչյանը, «Յուքոմ» ընկերության տնօրեն Հայկ Եսայանը, «Սինոփսիս Արմենիա» ընկերության տնօրեն Հովիկ Մուսայելյանը, Հեռուստատեսության և ռադիոյի ազգային հանձնաժողովի նախագահ Գագիկ Բունիաթյանը, ՀԱՊՀ Հոգաբարձուների խորհրդի նախագահ, ԱԺ պատգամավոր Սամվել Նիկոյանը, «Երևանի գարեջուր» ՓԲԸ գործադիր տնօրեն Աշոտ Բաղդասարյանը:

ՀԱՊՀ ռեկտորը ողջունելով ներկաներին նշեց, որ1932 թվականին հիմնադրված «Պրոլետարական ճարտարապետը» ժառանգեց 1933 թվականին ստեղծված Պոլիտեխնիկական ինստիտուտը` վերանվանելով այն սկզբում «Խորհրդային ճարտարապետ», ապա «Խորհրդային ճարտարագետ» և միայն 1957 թվականին սկսեց լույս տեսնել «Պոլիտեխնիկ» անվամբ:

Հոբելյանի կապակցությամբ, թերթի կայացման գործում ներդրած անձնական մեծ ավանդի և անբասիր աշխատանքի համար, 1970-1980թթ.-ին  «Պոլիտեխնիկ» թերթի գլխավոր խմբագիր Գուրգեն Վարդանյանը պարգևատրվեց համալսարանի Ոսկե հուշամեդալով: «Պոլիտեխնիկ» պաշտոնաթերթի խմբագրությունը պարգևատրվեց ՀՀ ԿԳ նախարարության բարձրագույն պարգևով՝ Ոսկե հուշամեդալով:

Միջոցառման ժամանակ պաշտոնապես ներկայացվեց նաև համալսարանի նոր կայքը, որն ամբողջությամբ նախագծվել է համալսարանի ուսանողների կողմից:

Միջոցառման ավարտին «Պոլիտեխնիկ» նորակազմ բենդի երաժշտության հնչյունների ներքո շնորհավորեցին միմյանց հոբելյանական միջոցառումների առթիվ և մասնակցեցին պոլիտեխնիկի տպագիր մամուլի ընտրված և բացառիկ համարների ցուցադրությանը:

Արմինե Գրիգորյան