Հայաստանը կփորձի զարգացնել համագործակցությունը խաղաղապահության ոլորտում

 Հայաստանը ՀԱՊԿ-ի շրջանակում միշտ աջակցել է խաղաղապահ գործունեության իրականացմանն ու լինելով միակ պետությունը, որն ունի խաղաղապահ առաքելության հսկայական փորձ եւ գիտելիքներ, առաջարկել է, որպեսզի ՀԱՊԿ-ի շրջանակում փոխառնվի Հայաստանի ձեռք բերած փորձը կառույցի խաղաղապահ կարողությունների կառուցման գործընթացի շրջանակում:

ՀՀ ԱԳՆ սպառազինությունների վերահսկման և միջազգային անվտանգությանվարչություն պետ Սամվել Մկրտչյանն ասում է, որ ներկա դրությամբ Հայաստանը ՀԱՊԿ-ի անդամ պետությունների հետ քննարկում է  խաղաղապահ գործունեության իրականացման գաղափարները: «Հայաստանն այս տարի լինելով ՀԱՊԿ-ում նախագահող երկիր` կառույցի խաղաղապահ կարողությունների զարգացման հարցն ու միջազգային այլ կառույցների հետ համագործակցությունը պահելու է օրակարգում»,- ասաց Մկրտչյանը:

Խաղաղապահների պատրաստման կենտրոնի ստեղծման հետ կապված Նախագահ Սերժ Սարգսյանի առաջարկության առնչությամբ Սամվել Մկրտչյանն ասաց, որ հարցը գտնվում է քննարկման փուլում: «Այդ գաղափարը պետք է ՀԱՊԿ-ի անդամ մյուս դաշնակից երկրների կողմից էլ հավանության արժանանա, որպեսզի կարողանանք ձեռնարկել գործնական քայլեր»:

Հարցին,թե արդյոք ՄԱԿ-ի հավանությո՞ւնն է անհրաժեշտ, որպեսզի ՀԱՊԿ-ը կարողանա աշխարհի տարբեր երկրներում խաղաղապահ առաքելություն իրականացնել, Սամվել Մկրտչյանն ասաց, որ դա ցանկալի եւ նախընտրելի նախապայման է:

«ՆԱՏՕ-ի գործողությունները Աֆղանստանում եւ Կոսովոյում իրականացվում են ՄԱԿ-ի անվտանգության խորհրդի բանաձեւերի շրջանակում, եւ  ցանկացած խաղաղապահ գործողության ժամանակ խիստ նախընտրելի է, որ այն իրականանա ՄԱԿ-ի արտոնության հիման վրա, որը նրան կտա միջազգային իրավունքի տեսանկյունից լիակատար իրավարար գործունեություն»,- ասաց Մկրտչյանը` հավելելով, որ ՄԱԿ-ի եւ ՀԱՊԿ-ի միջեւ ստորագրված է հուշագիր խաղաղապահության ոլորտում համագործակցության վերաբերյալ:

«Հենց այդ հուշագրի հիման վրա է, որ Հայաստանը պետք է փորձի զարգացնել ՄԱԿ-ի եւ ՀԱՊԿ-ի միջեւ խաղաղապահության ոլորտում համագործակցությունը»,- ասաց Մկրտչյանը` հավելելով, որ գաղափարը պատկանում է Հայաստանին, սակայն ծրագիրը կազմելու եւ մշակելու են դաշինքի մնացած պետությունների հետ համատեղ:

Խոսելով խնդիրների մասին` Մկրտչյանն ասաց, որ խաղաղապահությունը բարդ գործընթաց է, եւ յուրաքանչյուր անդամ-պետության զինված ուժեր կառուցված են անհատական չափանիշներով եւ որպեսզի կարողանան համատեղ գործել որեւէ առաքելության շրջանակում, պետք է անցնեն համատեղ համագործակցության որոշակի փուլ` փոխգործակցության մակարդակն ապահովելու համար:

«Ծրագրի մեկնարկի համար նախ պետք է ՀԱՊԿ-ն ամենաբարձր մակարդակով նման որոշում կայացնի, հետո արդեն դիմի ՄԱԿ-ի անվտանգության խորհրդին նման արտոնություն ստանալու նպատակով: Բայց կարող է լինել նաեւ հակառակը, երբ ՄՍԿ-ը քննարկի որեւէ կոնկրետ իրավիճակ, որեւէ ճգնաժամային հարց եւ ինքը դիմի ՀԱՊԿ-ին»,- ասաց Մկրտչյանը:

Սկսած 2004 թվականից Հայաստանը ՆԱՏՕ-ի եւ ՄԱԿ_ի հետ համագործակցության շրջանակում խաղաղապահ առաքելություն է իրականացնում աշխարհ թեժ կետերում: Այս ընթացքում Հայաստանը ստանձնել է նաեւ միջազգային անվտանգության պահպանողի դերակատարությունը` խաղաղապահ առաքելություն իրականացնելով Կոսովոյում, Աֆղանստանում, Լիբանանում, Մալիում: Սեպտեմբերի 15-ին Դուշանբեում կայացած ՀԱՊԿ հավաքական անվտանգության խորհրդի նստաշրջանի ընդլայնված կազմով նիստի ժամանակ ՀՀ նախագահ Սերժ Սարգսյանը խոսել է ՀԱՊԿ-ի կարեւորության եւ Խաղաղապահների պատրաստման կենտրոնի ստեղծման անհրաժեշտության մասին:

1992թ. մայիսի 15-ին Հայաստանը Տաշքենդում կնքել է Հավաքական անվտանգության մասին պայմանագիրը: