Եգիպտոսում ռուսական ինքնաթիռի աղետի վայրում հայտնաբերվել են զոհերի նոր մարմիններ

Սինայի թերակղզում ռուսական А321 ինքնաթիռի աղետի այն հատվածում, որտեղ գտնվում է ֆյուզելյաժը, փրկարարները հայտնաբերել են զոհված ուղեւորների նոր մարմիններ: Ինչպես տեղեկացնում է «Արմենպրես»-ը` վկայակոչելով «Ինտեֆրաքսը», այս մասին հայտնել է ՌԴ ԱԻՆ օպերատիվ խմբի ղեկավար Ալեքսանդր Ագաֆոնո վը:

«Ինքնաթիռի զննման ընթացքում ռուս փրկրարարները «Ռոզենբաուրեր» վթարային-փրկարարական ավտոմեքենայի օգնությամբ բարձրացրել են ֆյուզելյաժի մի մասը եւ հայտնաբերել ինքնաթիռի ուղեւորների նոր մարմիններ»,- ասել է նա:

Նրա խոսքով, ֆյուզելյաժի այդ մասը գետնին ընկած էր շրջված վիճակով:

«Կոգալիմավիա» ռուսական ավիաընկերության A321 ինքնաթիռը, որը կատարում էր Շարմ էշ Շեյխ-Սանկտ Պետերբուրգ չվերթը, աղետի է ենթարկվել հոկտեմբերի 31-ին թռիչքից մոտավորապես կես ժամ անց Հյուսիսային Սինայի մարզի վարչական կենտրոն Էլ Արիշ քաղաքից 100 կիլոմետր հարավ ընկած շրջանում՝ Էլ Հասնա բնակավայրի մերձակայքում: Ընդամենն ինքնաթիռում եղել է 217 ուղեւոր եւ անձնակազմի յոթ անդամ: Նրանցից՝ ոչ ոք չի փրկվել:

Ուղեւորների մեծամասնությունը ռուսաստանցիներ էին: Ճշտված տվյալներով՝ Եգիպտոսում կործանված ինքնաթիռում եղել են 132 պետերբուրգցիներ, Լենինգրադի մարզի 46 բնակիչներ, Ռուսաստանի այլ տարածաշրջանների 34 բնակիչներ, Ուկրաինայի չորս եւ Բելառուսի մեկ քաղաքացի:

 

Լուսանկարը` Reuters