2,5 ամսվա ընթացքում՝ 200 միլիոն դրամ

ՀՀ այս տարվա բյուջեն կազմում է 1 միլիարդ 482 միլիոն 17 հազար 853 դրամ: Կառավարության կայքում կարող ենք տեղեկանալ, թե այս գումարից որքանն է արդեն ծախսվել և թե որ ոլորտին որքան գումար է հատկացվել ի սկզբանե: Նախևառաջ նշենք, որ այս տարվա բյուջեից արդեն իսկ ծախսվել է 217 միլիոն 857 հազար 960 դրամ:

Պետբյուջեի մոտ մեկ երրորդը՝ 408 միլիոն 690 հազար դրամը, նախատեսվել է սոցիալական պաշտպանության ծրագրի իրականացման համար: Այս պահին այդ գումարից օգտագործվել է 83 միլիոն դրամից մի փոքր ավելի գումար: Այս ծրագրի հատկացումներից մեկն էլ հարազատին կորցրած անձանց տրվող դրամական օգնությունն է, որն այս տարվա համար կազմել է 5 միլիոն 122 հազար դրամ, որից, ի դեպ, ծախսվել է 1 միլիոն 107 հազարը: Սակայն ծրագրի ամենամեծ հատկացումները գնում են ծերերի օգնությանը՝ այս տարվա համար այն կազմել է մոտ 300 միլիոն դրամ: Այս նպատակների համար տարեսկզբին արդեն իսկ ծախսվել է մոտ 65 միլիոն դրամ:

Կրթության ոլորտի զարգացման համար 2018 թ. հատկացվել է 127 միլիոն 158 հազար դրամ: Այս գումարից դեռևս կա 105 միլիոն 66 հազարը: Կրթության ոլորտին տրամադրված ընդհանուր գումարից 29 միլիոն 134 հազար դրամը ուղղվել է նախադպրոցական և տարրական կրթությանը, 53 միլիոն 540 հազարը՝ միջնակարգ կրթությանը, իսկ 12 միլիոն 151 հազարն էլ՝ բարձրագույն:

2018 թ. տնտեսության զարգացումն ու աճը պետք է ապահովվի 131 միլիոն 881 հազար դրամի շնորհիվ, որից անցած մի քանի ամիսների ընթացքում արդեն իսկ օգտագործվել է 13 միլիոն 115 հազարը: Տնտեսական հարաբերությունների ոլորտում ամենից շատ ծախսատարը տրանսպորտն է, որի համար այս տարի հատկացվել է 78 միլիոն 311 հազար դրամ: Ընդ որում, այս գումարը բաժանվել է ըստ առանձին ոլորտների՝ ճանապարհային տրանսպորտ՝ 71 միլիոն 185 հազար դրամ, երկաթուղային տրանսպորտ՝ 322 հազար 400, օդային՝ 378 հազար դրամ:

Վառելիքի և էներգետիկայի համար նախատեսվում է այս տարի ծախսել 17 միլիոն 433 հազար դրամ, որից արդեն իսկ ծախսվել է 1 միլիոն 105 հազար դրամ: Գյուղատնտեսության, ձկնորսության, անտառային տնտեսության և որսորդության համար հատկացվել է 40 միլիոն 130 հազար դրամ, որից էլ դեռևս կա 32 միլիոն 791 հազար դրամ:

Պաշտպանության ոլորտի համար այս տարի հատկացվել է 247 միլիոն 895 հազար դրամ, որից վերջին տվյալների համաձայն մնացել է 224 միլիոն 537 հազար դրամը: Պաշտպանության ոլորտի «առյուծի բաժինը»՝ 238 միլիոն 245 հազար դրամը, ուղղվել է ռազմական պաշտպանությանը: Սրանից հունվար-մարտ ամիսներին ծախսվել է 22 միլիոն 954 հազար դրամը: Հետազոտական և նախագծային աշխատանքների իրականացման համար հատկացվել է 2 միլիոն 433 հազար դրամ, որից դեռևս ոչ մի դրամ չի օգտագործվել:

Առողջապահական ոլորտի ծախսերը հոգալու համար այս տարի հատկացվել է 84 միլիոն 74 հազար դրամ: Այս գումարից արդեն իսկ չկա 9 միլիոն 422 հազար դրամը: Առողջապահական ոլորտի ծախսերը բաժանվել են ըստ ենթաոլորտների՝ բժշկական սարքեր, սարքավորումներ և ապրանքներ ձեռք բերելու համար հատկացվել է 4 միլիոն 231 հազար դրամ, հիվանդանոցային ծառայությունների համար՝ 40 միլիոն դրամ, արտահիվանդանոցայինի համար՝ 37 միլիոն դրամ և այլն:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ
past.am