Աշոտ Մանուչարյան. «Պուտինը 3 % ավելի կամ պակաս ձայն է հավաքել՝ որևէ էական նշանակություն չունի»

«Ղարաբաղ» կոմիտեի անդամ Աշոտ Մանուչարյանի կարծիքով ներկայում շատերի հետաքրքրության աստիճանը փոքր է: Հանրությանն ավելի շատ հետաքրքրում էր, թե արդյոք ԱՄՆ նախագահ Դոնալդ Թրամփը կշնորհավորի՞ ՌԴ վերընտրված նախագահ Վլադիմիր Պուտինին, թե՝ ոչ: Մինչդեռ խորքային իմաստով կարևոր է դիտարկել, թե ինչ է կատարվում Ռուսաստանի ներսում, իսկ գերտերությունների ղեկավարներին միայն մեկ հարց էր հետաքրքրում, թե Ռուսաստանը վերջապես ո՞ր ուղին է ընտրելու:

«Բոլորն ուզում են հասկանալ, թե Ռուսաստանը կո՞ղմ է այն համակարգին, որոնք ցանկանում են պահպանել աշխարհի կողոպուտի համակարգը, որպեսզի հարստությունը շարունակվի մի կետում կուտակել, իսկ մարդկանց շարունակեն զրկել սեփական կամքն արտահայտելու հնարավորությունից, այսինքն՝ ստրկացնե՞լ, թե կգնա այլ ճանապարհով: Երկրորդ կարևորագույն հարցն այն է, թե Ռուսաստանում արդյոք կծնվի՞ աշխարհը փրկելու նոր գաղափար, թե՝ ոչ»,- Past.am-ի հետ զրույցում ասաց Ա. Մանուչարյանը:

Ըստ նրա, ավանդական մրցակցությունը ազգայնական գաղափարախոսության վրա է խարսխված, և այսօր շատ երկրներ ցանկանում են գնալ այդ ճանապարհով: Բայց մարդկությունը չի կարողանա իր գոյությունը միայն այդպես պահպանել, հարկավոր են նոր լուծումներ, որոնք մինչ օրս դեռ գտնված չեն:

«Պետք է կամ գտնել մի բանաձև, որը մարդկային էությունը կատարելագործելով մարդուն առաջ կմղի դեպի զարգացում, կամ այսօրվա մարդն ինքն իր ձեռքով կոչնչացնի աշխարհը: Եվ նման պարագայում մնացած հարցերը, թե՝ արդյոք Թրամփը շնորհավորե՞ց Պուտինին, թե ոչ, այնքան էլ կարևոր չեն: Համաշխարհային օլիգարխիան, որն այսօր փորձում է համաշխարհային կողոպուտն ապահովել, փորձում է չեզոքացնել այն որակները, որոնք կարևոր են ողջ մարդկության համար: Եվ չնայած նրան, որ Ռուսաստանում Պուտինին բավականին լուրջ վերապահումներով են վերաբերվում, այնուամենայնիվ, հասկացել են, թե ինչպիսի մեծ պատերազմների մեջ է մարդկությունը: Եվ այսօր խնդիրն այն է, թե արդյոք մարդկությունը կկարողանա՞ այդ պատերազմը տեղափոխել իր հոգու մեջ, դառնալ մարդկային: Իսկ եթե մարդկությունն ի վիճակի չլինի դա անել, ապա պատերազմները կշարունակվեն և դրանից հետո պարզ չի լինի, թե ընդհանրապես մոլորակի մարդկությունը կմնա, թե՝ ոչ»,- ասաց Ա. Մանուչարյանը:

Ըստ Մանուչարյանի այսօր նման հարցերն են ամենակարևորը, իսկ թե Պուտինը 3 % ավելի կամ պակաս ձայն է հավաքել ընտրությունների ժամանակ, ընդհանրապես որևէ էական նշանակություն չունի:

«Եթե այսպես շարունակվի, ապա վերջում էլ մարդկությունը կոչնչացնի ինքն իրեն: Հիմա, թե՛ Ռուսաստանում, թե՛ Միացյալ Նահանգներում այդ ելքերն են փնտրում: Ու թեև այն հասարակության կողմից ինչ-որ տեղ ընկալվում է որպես ազգայնականի «վերադարձ», սակայն իրականում ուրախալի է, որ նոր քրիստոնեական փիլիսոփայության փնտրտուքն աշխարհում շարունակվում է, որը եթե գտնվի, մարդկությունը կկարողանա առաջ շարժվել»,- ասաց Ա. Մանուչարյանը:

Արմինե Գրիգորյան   
     

Այս թեմայով Կարկտաբեր ամպերը մշակող, կարկուտն անձրև դարձնող համակարգ է ներդրվում Աշոտ Մանուչարյան. «Կողոպուտով զբաղվողները պետք է հասկանան, որ վերջն է եկել» Արհամարհանք՝ լրատվամիջոցների նկատմամբ. սահմանափակումների տրամաբանական շարունակությունը Փոխնախարար. «Առաջիկա օրերին ցրտահարության վտանգ չունենք» Աշոտ Մանուչարյանը առաջիկա ընտրությունների, Չարլզի և իրական Արմագեդոնի մասին