«Չփորձարկված գազաբալոնով մեքենան չի լիցքավորվի». Լևոն Խալիկյան

Տնտեսական զարգացման և ներդրումների նախարարության շուկայի վերահսկողության տեսչական մարմինն ամփոփել է նախորդ տարվա ստուգումների արդյունքները և արձանագրել, որ 2017 թ. ընթացքում շուկայահանված ապրանքների համապատասխանության գնահատման փաստաթղթերի՝ սերտիֆիկատների և հայտարարագրերի թիվը հասել է 1808-ի, ինչը 2016 թ. նույն ժամանակահատվածի համեմատությամբ աճել է 31%-ով:

Տեսչական մարմինն արձանագրել է, որ իրազեկման աշխատանքների և ստուգումների արդյունքում ապրանքների որակի համապատասխանության գնահատման անհրաժեշտությունը շատ տնտեսվարողների համար օրակարգային հարց է դարձել։

Նախորդ տարի տեսչական մարմինը ստուգումներ է կատարել 24 ոլորտներում և խախտումների բարձր ցուցանիշ արձանագրել ԱԳԼՃԿ-ների՝ 100%, սինթետիկ հիմքով լաքեր և ներկերի՝ 89%, խաղալիքների՝ 83%, օծանելիքակոսմետիկական և լվացող-մաքրող միջոցների՝ 80%, ավտոմոբիլային բենզինի և դիզվառելիքի՝ 67% ոլորտներում։  Ընդհանուր առմամբ, ստուգում իրականացվել է 197 տնտեսվարողների շրջանում, 161-ի մոտ (81,7%) հայտնաբերվել են տարբեր բնույթի խախտումներ։ 2017 թ. տուգանքների ընդհանուր գումարը կազմել է ավելի քան 23 մլն դրամ։

Արձանագրված խախտումները հիմնականում համապատասխանության գնահատման փաստաթղթերի բացակայության, մակնշման, չափագիտական նորմերի առումով են։ ԱԳԼՃԿ-ների պարագայում խախտումները գազի բարձր ճնշմամբ լիցքավորելու և խորանարդ մետրով վաճառելու հետ են կապված։

Այսօր Շուկայի վերահսկողության տեսչական մարմնի ղեկավար Լևոն Խալիկյանը լրագրողների հետ հանդիպման ժամանակ հայտարարեց, թե մշակվել է օրենսդրական նախագիծ, որը ենթադրում է գազաբալոնները պարտադիր փորձաքննության ենթարկել և հին բալոններ չգործածել:

Եթե ԱԳԼՃԿ-ն լիցքավորի ավելի քան 200 խմ մթնոլորտային ճնշում գազ կամ լիցքավորի փորձաքննություն չանցած գազաբալոն, ապա կտուգանվի 1 միլիոն դրամով: Այս ամենը արձանագրված է շրջանառության դրվող նախագծի մեջ, մինչդեռ գործող կանոնակարգով սահմանված է 10 անգամ ավելի թույլ պատիժ՝ 100 հազար դրամ: Շուկայի վերահսկողության տեսչական մարմինն ինքն է առաջարկել տասնապատկել տույժի չափը:

«Մենք ձեռնամուխ ենք եղել օրենսդրական փոփոխության, ըստ որի՝ մեքենան չի կարող լիցքավորվել, եթե գազաբալոնը փորձաքննություն անցած չէ: Չփորձարկված բալոնի դեպքում մեքենան չի լիցքավորվի: Դա երևալու է օնլայն: ԱԳԼՃԿ-ներում ներդրվող համակարգի միջոցով հնարավոր է լինելու պարզել՝ մեքենան տեխզննում անցել է, թե՝ ոչ, գազաբալոնը փորձաքննություն անցել է, թե՝ ոչ: Մյուս կողմից՝ անվտանգության խնդիրներով պայմանավորված՝ 200 մթնոլորտային ճնշումից բարձր ճնշում չի լիցքավորվելու»,- նշել է Խալիկյանը:

Բացի այդ, Խալիկյանը գազի՝ խորանարդ մետրով վաճառքը, կիլոգրամի փոխարեն, մեքենայություն է համարում: Ըստ նրա՝ խորանարդ մետրով վաճառելու դեպքում, արհեստականորեն բարձրացնելով գազաբաշխիչ համակարգի ջերմաստիճանը, տնտեսվարողները կարողանում են իքս ծավալի բալոնի մեջ ավելի շատ գազ լիցքավորել, կամ ցույց տալ, թե այնտեղ այդքան է, քանի որ գազը բարձր ջերմաստիճանի պայմաններում ընդարձակվում է:

Ւնչ վերաբերում է բենզինի ու դիզվառելիքի շուկային, ապա այստեղ խախտումները վերաբերում են կա՛մ ռեգուլյար տեսակի բենզինի՝ պրեմիումի անվան տակ վաճառքին, կա՛մ թերլցմանը:

Լևոն Խալիկյանը նաև նշեց, որ խաղալիքների շուկայում էլ վերջին անգամ հինգ տարի առաջ են վտանգավոր ապրանքներ հայտնաբերվել: Նախորդ տարի հայտնաբերվել են բազմաթիվ տնտեսվարողներ, ովքեր խաղալիքները վաճառել են առանց որակի հավաստագրի ու հայերեն մակնշման:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ
Past.am