«ՄԻԵԴ-ը կփաստի այն, ինչն իրականում տեղի է ունենում Հայաստանում». փաստաբան

Այս տարվա մարտի 21-ին ստացված գրությամբ Մարդու իրավունքների եվրոպական դատարանը տեղեկացրել է, որ պատրաստվում է առաջիկայում քննության առնել Անդրիաս Ղուկասյանի գործը: Դատարանը խնդրել է մինչև 2018թ. ապրիլի 11-ը ներկայացնել համապատասխան ապացույցներով հիմնավորված այնպիսի տեղեկատվություն, որը վկայում է դիմողի նկատմամբ Կոնվենցիայի այս կամ այն հոդվածի խախտման և դիմողի կողմից իրավական պաշտպանության ներպետական միջոցների սպառման մասին: Հիշեցնենք, որ «Նոր Հայաստան» ընդդիմադիր շարժման անդամ Անդրիաս Ղուկասյանի գանգատը Մարդու իրավունքների Եվրոպական դատարանը գրանցել էր դեռևս մեկ տարի առաջ՝ փետրվարի 23-ին:
«Փաստը» զրուցել է Անդրիաս Ղուկասյանի պաշտպան Կարեն Մեժլումյանի հետ:

-Պարոն Մեժլումյան, այս փուլին հասնելն ի՞նչ կտա այս գործին:

-Մենք Եվրոպական դատարան դիմեցինք՝ չսպառելով ներպետական միջոցները, դեռևս Վճռաբեկ դատարան չանցնելով և հիմնավորեցինք, որ դրանք արդյունավետ չեն: Բարձրացրել էինք նաև քաղաքական հարցերը, նշել, որ սա, ըստ մեզ, քաղաքական հետապնդման դրդապատճառներով գործ է, և իրենք, ի ուրախություն մեզ, վարույթին առաջնահերթություն տվեցին և չմերժեցին:

Դրանից հետո մենք բոլոր հերթական մեր բողոքները, հերթական կալանքի եզրակացումները, այդ թվում դատարանում առկա որոշումները ուղարկում էինք Եվրոպական դատարան, և դրանք կցվում էին հիմնական գործին: Եվ սպասում էինք: Ձգձգվեց, իհարկե, բայց արդեն ստացանք պատասխան, որ առաջիկայում կքննեն: Մեզնից նաև ուզեցին այն դատական նիստի ձայնագրությունը, որի ժամանակ դատավորը հարցնում է Անդրիաս Ղուկասյանին, եթե նրան ազատ արձակեն, շարունակելու է իր ընդդիմադիր գործունեությունը, թե՝ ոչ, ինչին Անդրիաս Ղուկասյանը պատասխանել է, որ այո, շարունակելու է, պարզաբանելով, որ իր քաղաքական գործունեության մեջ բռնությունը բացառվում է, նա այդ գծի կողմնակիցը չէ: Սակայն դատարանը մերժելով գրավի կիրառումը, պատճառաբանել էր՝ հիմքում դնելով նաև այն, որ Ա. Ղուկասյանը դատարանում հայտարարել է, որ իր գործունեությունը շարունակելու է ազատ արձակվելու դեպքում:

Այն, որ եվրոպական դատարանը մեզնից ուզեց այս ձայնագրությունը, ենթադրել է տալիս, որ այս հարցն էլ է հետաքրքրել նրանց:

-Առաջին անգամ է, որ ՀՀ դեմ ներկայացվող գանգատում բարձրացվել է Կոնվենցիայի 18-րդ հոդվածի խախտման հարցը՝ քաղաքական ընդդիմադիրների դեմ պետական իշխանության չարաշահումը արգելելու մասով: Քաղաքական ենթատեքստ ունենալուց գործը կարո՞ղ է շահել:

-Հուսով ենք, որ Եվրոպական դատարանը դա կտեսնի և ճիշտ կգնահատի իր վերջնական ակտով: Մնացածը՝ փաստ է, որ այդպես է: Փաստ է, որ քաղաքական նկատառումներով է իրականացվում քրեական հետապնդում Անդրիաս Ղուկասյանի նկատմամբ: Դա նաև ամեն օր փաստվում է Հայաստանում իրականացվող դատաքննության ժամանակ, երբ դատավորը ուղղակիորեն գործում է Անդրիաս Ղուկասյանի դեմ:

-Այն, որ ՄԻԵԴ-ի՝ Հայաստանի դեմ գործը հենց քաղաքական ենթատեքստով է գնում, մեր երկրի համբավի համար միջազգային ատյաններում բացասական հետևանք չի՞ ունենա:

-Բնականաբար, դա բացասական կլինի Հայաստանի իշխանությունների համար, որովհետև եվրոպական նման կառույցի կողմից կփաստվի այն, ինչն իրականում տեղի է ունենում:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ
Past.am