Գուրգեն Եղիազարյան. «Պայծառ էջ գրվեց՝ երիտասարդությունը կարող է կանգնել ստի ու զենքի դեմ»

ՀՀ վարչապետի ընտրությունն ավարտվեց: Բաց քվեարկությամբ 17 դեմ, 77 կողմ ձայների հարաբերակցությամբ ՀՀ վարչապետ ընտրվեց Սերժ Սարգսյանը: Ընտրությանը զուգահեռ քաղաքացիները շարունակում են փողոցային պայքարը:

Ազգային ժողովի պատգամավոր, «Քաղաքացիական պայմանագիր» կուսակցության ղեկավար Նիկոլ Փաշինյանը Ֆրանսիայի հրապարակում հայտարարեց, որ պայքարը շարունակվելու է: Հավաքի մասնակիցների գործողությունների ծրագիրը ուղեկցվում է հանրահավաքներով, շրջափակվում են կառավարական շենքեր: Հավաքներին մեծ է հատկապես ուսանողների ու երիտասարդների մասնակցությունը:

ԱԱԾ նախկին փոխնախարար Գուրգեն Եղիազարյանը դրական է գնահատում վերջին օրերին տեղի ունեցող իրադարձությունները:

«Պայծառ երիտասարդություն ունենք: Նրանք էլ գիտեն, որ այսպես ապրել հնարավոր չէ: Տասը տարիների ընթացքում Սերժ Սարգսյանն ապացուցել է, որ չի կարողանում ոչ մի բան անել, իսկ իր կառավարումը բարձիթողի վիճակում է: Լսեցինք մի սրտաճմլիկ զեկույց: Նկատի ունեմ՝ Շարմազանովի ելույթը: Պարզվում է, որ 2016 թվականի ապրիլի 2-ին մենք պատերազմի դաշտում հաղթանակ ենք տարել: Պատկերացնո՞ւմ եք, ինչ էին խոսելու, եթե 800 հեկտարը մե՛նք գրաված լինեինք: 104 առյուծ ենք զոհասեղանին դրել, 800 հեկտար հող ենք հանձնել թշնամուն ու բարբաջում են, թե դա հաղթանակ է: Ուղիղ նշեց, որ ապրիլի 2-ի պատերազմը խոշոր հաղթանակ էր ու նշեց՝ առանց զոհվածների անունները տալու, իսկ հաղթանակն էլ վերագրեց իր շեֆին: Ստի երկիր Հայաստան՝ սա է ամբողջը»,-Past.am-ի հետ զրույցում ասաց Գ. Եղիազարյանը:

Հարցին, թե նախաձեռնությունն ինչի՞ կարող է հասնել փողոցում, հաշվի առնելով, որ ԱԺ-ն ընտրեց Սերժ Սարգսյանին, մեր զրուցակիցը պատասխանեց. «Կապ չունի այդ պաշտոնը, ընտրությունը: Կարևորն այն է, որ նրանք կեղծ ընտրություններով ժողովրդից գողացել են իշխանությունը: Նրանք կեղծ ընտրություններով գողանում են իշխանությունը՝ Եվրոպայի հորթերի աչալուրջ հայացքի տակ: Նրանք արդեն քանի անգամ է նշում են, որ սա մի քայլ առաջ էր, քան նախորդները: Բայց մենք Ադրբեջանի օրինակը գիտե՞նք չէ, թե ինչպես են կաշառում այդ հորթերին: Այնպես որ՝ իրենց ասածը, չասածը կամ ընտրություններն ընդունելն ու չընդունելը հայ ազգին ոչինչ չի ասում: Ընտրությունների ամենալավ ցուցիչն այն է, ինչի մեջ մենք հայտնվում ենք յուրաքանչյուր ընտրությունից հետո: Գործազրկություն և արտագաղթ՝ նշվածներից խոսուն ուրիշ ոչինչ չկա: Սա է սրանց իրական դեմքը: Ուսանողությունը դուրս է եկել այդ ստերի դեմ: Չեմ կարող գուշակել, թե ինչով կավարտվի այս ամենը, բայց նորագույն պատմության մեջ պայծառ էջ գրվեց՝ երիտասարդությունը կարող է կանգնել ստի ու զենքի դեմ, և կանգնել է»:

Հարցին, այսինքն՝ հերքվեց այն թեզը, թե հասարակությունը այլևս պայքարելու ցանկություն չունի, Գուրգեն Եղիազարյանը պատասխանեց. «Ես էլի եմ ասել ու կրկնում եմ՝ ստի ու կեղծիքի պարագայում ցանկացած պահի կարող է բռնկում լինել: Իսկ ուսանողությունը մեր հասարակության լավագույն հատվածն է: Սերժ Սարգսյանը, մեղմ ասած, հայտարարություն էր արել, որ ո՛չ նախագահ է դառնալու, ո՛չ վարչապետ և այլն: Բայց այդ հայտարարությունից հետո իրեն էլի կարգեց: Բայց այս ամենը շատ կարճ է տևելու, որովհետև հայ ազգն իսկապես զզված է ամեն ինչից: Լսե՛ք, թե անցորդներն ինչ հայհոյանքներ են տալիս փողոցում, ովքեր, ի դեպ, մասնակից չեն այդ երթերին: Թող դուրս գա ու լսի, թե իր հասցեին ինչ են ասում, թե այդ 60 % ձայն տվողներն ինչպես են հայհոյում իրեն: Ես չեմ կարծում, որ այս կեղծիքը կարող է երկար տևել: Ի վերջո, այն անեծքը, որը թափվում է նրա գլխին, հենց այնպես չի անցնելու»:

Լճացման պրոցես, այնուամենայնիվ, չի՞ սպասվում: Ի պատասխան՝ Գ. Եղիազարյանը հարցին նման կերպ արձագանքեց. «Լճացման պրոցես չեմ տեսնում, բայց որ Սերժ Սարգսյանի քունն Ազգային ժողովում տանում էր, ա՛յ դա տեսնում էի»:

Աննա Բադալյան

Այս թեմայով Մայիսի 8-ին բախո՞ւմ է սպասվում Գուրգեն Եղիազարյանը՝ ՀՀԿ-ականներին. «Մի՛ շարժվեք «Մեզնից հետո թեկուզ ջրհեղեղ» սկզբունքով, այդ ջուրն առաջինը ձեզ է քշելու» Մանվել Եղիազարյան. «Այսպիսի իշխանավորները կամավոր չեն հանձնում իշխանությունը» Գուրգեն Եղիազարյան. «Իշխանությունները գնում են խնդիրների հանգուցալուծման բոլորովին այլ ճանապարհով» Վարչապետի պաշտոնը ձեռնտո՞ւ չէ Սերժ Սարգսյանին. խնդիրներ՝ չլուծված ու կարևոր