Պետրոս Մակեյան. «Սերժ Սարգսյանի քայլը պետք է շարունակություն ունենա»

«Ժողովրդավարական հայրենիք» կուսակցության նախագահ Պետրոս Մակեյանը ներկա իրավիճակը բավականին ռիսկային է գնահատում, քանի որ Սերժ Սարգսյանը դուրս գալով, իշխանությունը դե յուրե թողեց Կարեն Կարապետյանին, որը դե ֆակտո չի կարող հանգեցնել փոփոխությունների:

«Սերժ Սարգսյանը գնաց, բայց իշխանությունը թողեց աճպարար Կարեն Կարապետյանին, որպեսզի շարունակի դիմադրել ժողովրդական այս շարժմանը: Հիմա ժողովուրդն իր վճռական խոսքը կասի և հուսամ, որ վարչախումբը չի գնա ուժի կիրառման և բռնությունների ճանապարհով, և հակահեղափոխական այս ճակատը՝ հանցավոր բանդան կանգ կառնի»,- ասաց Պ. Մակեյանը:

Նա համաձայն է, որ ներկա քրեաօլիգարխիկ համակարգի հենքի վրա կառուցված իշխանությունները  այդքան հեշտ չեն հրաժարվի կերակրատաշտից, սակայն կարծում է, որ երկրի փրկությունը միայն ու միայն նրանցից ազատվելու մեջ է:

«Նրանք կորցնելու շատ բան ունեն, բայց պետք է հասկանան, որ իրենց կորցրածը հնարավոր չէ համեմատել հայրենիքի հետ: Չնայած նրանց համար հայրենիքը ոչ միայն նրանց կերամանից օգտվելու ու փող աշխատելու հնարավորություն է, բայց այսօր շատերը հասկանում են, որ նման պնդաճակատությունը շարունակելով, մենք երկիր կկորցնենք»,- ասաց Պ. Մակեյանը:

Քաղաքական գործչի կարծիքով որևէ այլընտրանք այս պահին չկա, և իշխանությունները պարտավոր են ժողովրդի կամքը կատարել, ժողովրդի թեկնածուի հաղթանակն ընդունել, և այստեղ որևէ սահմանադրական քայլ կամ իրավական նոնսենս չկա:

«Նիկոլը շատ պարզ ասաց, որ վենդետա չի լինի, հետապնդումներ չեն լինի: Եվ ՀՀԿ-ականները պետք է հասկանան, որ ժողովուրդն այլևս չի հանդուրժի իրենց, իսկ ժողովրդին որևէ ձևով կանգնեցնել հնարավոր չէ: Այսօր ողջ հանրապետությունում դպրոցները փակ են, ճանապարհները փակ են, գործադուլ ու դասադուլ է, և դա է իրադրությունը»,- ասաց Պ. Մակեյանը:

Նրա կարծիքով երկրի նորմալ զարգացման համար պարզապես օդ ու ջրի նման անհրաժեշտ է ՀՀԿ-ի պարտության դե յուրե ամրագրումը, որից հետո միայն հնարավոր կլինի նորմալ երկիր կառուցել:

«Իշխանական համակարգը սատանայական մի շրջանի է վերածվել: Սերժն այսօր հանրապետականի սև շենքում նստած արդեն «գենսեկություն» է անում: Բայց ես չեմ կարծում, որ ՀՀԿ-ականները գնան իրադարձությունները սրելու ճանապարհով և իրենց սահմանն անցնեն, քանի որ այդ դեպքում արդեն նրանց ֆիզիկական գոյությունը կդրվի հարցականի տակ: Աշխարհով սփռված են հայերը և ուր էլ փախչեն, նրանց կգտնեն: Իսկ հիմա նրանք ու իրենց սերունդներն ունեն ապրելու, ստեղծագործելու հնարավորություն, բայց եթե իրենց չափն անցնեն ու անթույլատրելի քայլերի դիմեն, ապա ամեն ինչ կկորցնեն»,- ասաց Պ. Մակեյանը:

Խոսելով  Սերժ Սարգսյանի ակնարկած մարտի 1-ի մասին, նա նշեց, որ 2008 թվականին մարտի 1 եղավ միայն Երևանում, բայց այսօր համատարած ոտքի է կանգնել ողջ հանրապետությունը:
«Այս պայմաններում ո՞ւմ կոտորեն, ո՞րտեղ կոտորեն: Գյումրիում կոտորեն, Վանաձորում կոտորեն, Արթիկում կոտորեն, Սպիտակում կոտորեն: Այսինքն, ալիքն այնքան մեծ է, որ կարելի է ասել, թե արդեն հասել և անցել է 1988 թվականի ժամանակները: Եվ եթե անգամ ինչ-որ էպիզոդ կարողանա կանգնեցնել այս ընթացքը, դա կլինի խիստ ժամանակավոր: Եվ այնպես ինչպես սելավը սրբելով տանում է ամեն ինչ, այնպես էլ նրանց կտանի: Սա պետք է ՀՀԿ-ականները հասկանան և կանգ առնեն: Սերժ Սարգսյանի քայլը պետք է շարունակություն ունենա, իսկ եթե շարունակի «գենսեկություն» անել, ապա ամեն ինչ կխառնի և դա կլինի նրա վերջը»,- ասաց Պ. Մակեյանը:

Արմինե Գրիգորյան