«Հայաստանի վարկանիշը պետք է կապիտալիզացնել ի շահ Հայաստանի». Երվանդ Բոզոյան

Past.am-ի հյուրն է քաղաքագետ Երվանդ Բոզոյանը

-Պարոն Բոզոյան, այսօրվա դրությամբ կարո՞ղ ենք ասել, որ հայ ժողովուրդը վերջապես հաղթել է, և մայիսի 8-ին տեղի կունենա այն, ինչին սպասում է նա, թե՞ ՀՀԿ-ի վերջին հայտարարությանը լիովին վստահել պետք չէ:

-Հանրության մեջ իշխող կուսակցության հանդեպ տոտալ անվստահություն կա: Հասկանում եմ այդ անհանգստությունները, բայց քաղաքական տրամաբանությունը հուշում է, որ մայիսի 8-ին Հայաստանը պետք է ունենա նոր վարչապետ, և ամենայն հավանականությամբ, ՀՀԿ-ն իր ասածի պես կվարվի և թույլ կտա, որ վարչապետ լինի:

Սակայն, քանի որ մենք հաշվի ենք առնում, որ գործ ունենք անկանխատեսելի քաղաքական ուժի հետ, չեմ բացառում, թեև դրա շանսերը շատ քիչ են, որ նրանք ինչ-որ ֆորսմաժորային քայլ անեն և փաստորեն նորից «վիժեցնեն» այս խնդրի լուծումը: Բայց դրա հավանականությունը ես մեծ չեմ համարում:

-Վերջին օրերին նաև այնպիսի հարցեր էին շրջանառվում, թե Նիկոլ Փաշինյանը չունի այն թիմը, որով կարող է կառավարություն կազմավորել: Արդյոք տեղի՞ն կասկածներ են դրանք:

-Հայաստանում այս հեղափոխությունը շատ անսպասելի եղավ: Ընդամենը մեկ ամիս առաջ ոչ ոք չէր սպասում, որ այդպիսի գործընթացներ կզարգանան: Քանի որ ոչ ոք չէր հավատում դրան և այս հեղափոխությունն անսպասելի եկավ, բնականաբար անսպասելի էր նաև Նիկոլ Փաշինյանի համար, և նա, ըստ էության, այդպիսի թիմ չուներ:

Այսօր նա ունի պայքարի թիմ, բայց ինչ թիմ պետք է ունենա՝ ոչ ոք չգիտի, որովհետև նա հանդես չեկավ լայն ներկայացուցչական քաղաքական թիմով, որը պետք է երկիր կառավարի: Բայց նա հանդես եկավ երիտասարդ և պայքարի մղող թիմով, որը կարողացավ քանդել այս համակարգը: Այդ իմաստով, իհարկե, շատ անորոշություններ կան, սակայն կարևոր մի բան կա՝ այս համակարգը միանշանակ ապամոնտաժվելու է, երկրորդ կարծիք անգամ չկա: Այս ապամոնտաժման հիմքի վրա կառաջանան նոր տարրեր: Թե ինչպիսին կլինեն, ով կլինի կամ ինչ դեր կկատարեն, ոչ ոք այս փուլում չգիտի ու չի կարող ասել:

-Այս շարժման ամենաոգևորող կողմն էլ դրա արդյունքում մեր երկրի ու ժողովրդի վարկանիշի կտրուկ բարձացումն էր: Այս օրերին շատուշատ այլ երկրների քաղաքացիներ բարի նախանձով էին հետևում Հայաստանում տեղի ունեցող իրադարձություններին:

-Այսօր Հայաստանի վարկանիշը բարձրացել է ամբողջ աշխարհում: Հայ ժողովուրդն ընկալվում է որպես պայքարող, դեմոկրատիային ձգտող ու տոտալիտարիզմի և դիկտատուրայի դեմ պայքարող ժողովուրդ, ինչը միանշանակ բարձրացնում է և՛ Հայաստանի, և՛ հայ ժողովրդի վարկանիշն ընդհանրապես: Ես կարծում եմ ոչ միայն Հայաստանի վարկանիշն է բարձրացել, այլև՝ այն հայերի, ովքեր ապրում են արտերկրում: Սա պետք է կապիտալիզացնել ի շահ Հայաստանի:

 

ՔՐԻՍՏԻՆԱ ՏԵՐ-ՄԱԹԵՎՈՍՅԱՆ
Past.am