Ադրբեջանից նավթի արտահանումը զգալիորեն նվազել է

 Ադրբեջանի պետական նավթային ընկերության (SOCAR) կողմից չմշակված նավթի արտահանման ծավալը 2015 թվականի հունվար-հոկտեմբերի ամիսներին 12,7 տոկոսով նվազել է:

Այս մասին, հայտնում է «Ազադլըգ» թերթը` նշելով, որ դա տեղի է ունենում նավթի համաշխարհային գների շարունակական նվազման պայմաններում:

Թերթն ընդգծում է, որ նվազում է նաեւ SOCAR-ի կողմից արդյունահանվող նավթի ծավալը:

Թերթը հայտնում է, որ SOCAR-ը հոկտեմբերին դադարեցրել է նավթի արտահանումը Նովոռոսիյսկ նավահանգստով:

Հոկտեմբերին համաշխարհային շուկայում Brent տեսակի նավթի մեկ բարելն արժեցել է 48,56 դոլար, Urals նավթինը` 47,49 դոլար, BTC FOB Ceyhan տեսակի նավթինը` 50,06 դոլար:

Միջազգային վարկանիշային Fitch Ratings գործակալությունը հայտնում է, որ Եվրոպայում գտնվող նավթային ընկերությունների եկամուտների նվազումը կարող է շարունակվել մինչեւ տարեվերջ:

Ըստ գործակալության` այնպիսի հզոր նվաթային ընկերություններ, ինչպիսիք են Royal Dutch Sell-ը, BP-ին, Eni-ին եւ BG-ն, այս տարվա երրորդ եռամսյակում, տարվա երկրորդ եռամսյակի համեմատ, 26 տոկոսով ավելի քիչ շահույթ են ունեցել:

Նավթի համաշխարհային գների եւ մանաթի փոխարժեքի անկման պատճառով Ադրբեջանի տնտեսությունը հայտնվել է ճգնաժամի մեջ. բազմաթիվ պետական եւ մասնավոր հաստատություններ չեն կարողանում վճարել աշխատակիցների աշխատավարձերը: Փակվել են նավթարդյունաբերության մի շարք ձեռնարկություններ, պետական եւ մասնավոր հաստատություներ, տասնյակ հազարավոր աշխատավորներ գործազուրկ են դարձել, Ադրբեջանի տնտեսական աճն օրեցօր նվազում է, միջազգային վարկանիշային գործակալությունների համաձայն` Ադրբեջանական բանկերը կանգնած են ռիսկի սահմանին, այս տարվա ընթացքում Ադրբեջանն արդեն 6,7 մլրդ դոլար է կորցրել, Ադրբեջանի բյուջեն դեֆիցիտային է դարձել. եկող տարվա բյուջեն անցյալ տարվա պետբյուջեից մոտ 2 անգամ փոքր է սահմանվել:

Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին: