Միայն հայտարարելով չէ, թե՝ «ընդդիմություն ենք». «Փաստ»

«Փաստ» օրաթերթը գրում է.

Ազգային ժողովում մեծամասնություն կազմող ՀՀԿ խմբակցությունը հայտարարել է ընդդիմություն դառնալու մասին: ԱԺ–ում քաղաքական մեծամասնություն ունեցող ուժը կարո՞ղ է ընդդիմություն լինել: Սահմանադրագետ Վարդան Այվազյանը «Փաստ»–ի հետ զրույցում անդրադառնալով հարցադրմանը՝ նախ ընդգծեց. «Միայն հայտարարելով չէ, թե ընդդիմություն ենք»: Ընդդիմությունը, որպես կանոն, չափանիշ­ ներ ունի: Ընդդիմության առաջին չափանիշը թվաքանակն է: Ընդ որում՝ դա սահմանված է Ընտրական օրենսգրքով, որը սահմանադրական  օրենքի կարգավիճակ ունի: Այնտեղ ամրագրվում է, որ իշխանության և ընդդի­մության հարաբերակցությունը չի կարող գերազանցել 2/3–1/3–րդ–ը: Ավելի պատկերավոր ասեմ: : Եթե, օրինակ, հիսուն քանի հոգին ընդդիմություն են լինում, ուրեմն՝ այդ 50 քանի հոգին  1/3–րդ–ն է, իսկ 2/3–րդն էլ պետք է իշխանություն լինի»:

ԱԺ ղեկավար կազմը հրաժարական կտա՞

Վարդան Այվազյանը շեշտեց նաև, որ ընդդիմությունը փոքրամասնություն է ենթադրում: «Բացի այդ, օրենսդրական կարգավորումներով և «Ազգային ժողովի կանոնակարգ» սահմանադրական օրենքով նախատեսվում է, որ ընդդիմությունն ունի Ազգային ժողովի նախագահի տեղակալի մեկ պաշտոն: Ինչպես նաև և՝ ԱԺ–ի 11 հանձնաժողովների նախագահների  առումով ընդդիմության և իշխանության քվոտաներ կան,  որը նույնպես պետք է պահպանվի: Եթե իրենք հիմա հայտարարում են ընդդիմություն լինելու մասին, առնվազն պետք է ԱԺ նախագահն ու տեղակալները հրաժարական տան: Դրանից հետո ըստ քվոտայի, մշտական հանձնաժողովների նախագահների իրենց ներկայացուցիչների մի մասն էլ պետք է հրաժարական տա: Բայց էլի չի ստացվում ընդդիմություն լինել: Մեծ հաշվով՝ ընդդիմություն լինելու տարբերակը հետևյալն է. ՀՀԿ խմբակցությունից պետք է դուրս գան այնքան պատգամավորներ, որ նրանց թիվը 53-ից պակասի:  Այդ դեպքում կարող են իրենց հռչակել ընդդիմություն: Իսկ քանի դեռ մեծամասնություն են, ընդդիմություն չեն կարող լինել:  Սա մոտավորապես նույնն է, որ, օրինակ, հայ ժողովուրդը ՀՀ–ում իրեն ազգային փոքրամասնություն հռչակի »,–ընդգ­ծեց մեր զրուցակիցը: 

Արտահերթ ընտրությունները՝ սահմանադրական հունի մեջ ընկնելու միակ միջոց

Նրա դիտարկմամբ՝ այժմ ունենք հակասահմանադրական իրավիճակ, որը ոչ մի ստանդարտների ու չափանիշների մեջ չի տեղավորվում: Սահմանադրագետի խոսքով՝ միակ լուծումն արտահերթ խորհրդարանական ընտրություններն են: «Դա միակ ճանապարհն է, ըստ որի՝ քաղաքական ամբողջ գործընթացը կարող է մտնել սահմանադրա­ կան շրջանակների մեջ: Անկախ նրանից, թե ՀՀԿ–ից պատգամավորներ դուրս կգան, չեն գա, ինչ կհռչակեն, ինչ չեն հռչակի, ընտրություններին այլընտրանք չկա  Հիմա տեսեք՝ մենք վարչապետ Նիկոլ Փաշինյանին դիտարկում ենք ժողովրդի կողմից առաջադրված վարչապետ, բայց ժողովրդի կողմից առաջադրված լինելու չափանիշ իրավաբանորեն չկա: Նա երկիրը առաջ տանելու, ճգնաժամից հանելու ծրագրեր է առաջ քաշում, բայց իրավաբանորեն՝ դե յուրե, նա ոչ թե ժողովրդի մեծամասնության կողմից առաջադրված թեկնածուն էր, այլ «Ծառուկյան դաշինք» խմբակցության: ՀՅԴ–ի պատգամավորների քանակը քիչ էր, բայց եթե «Ծառուկյան» դաշինքի 31 պատգամավորները  չսատարեին, եթե նրանց աջակցությունը չլիներ, սահմանադրական եղանակով Նիկոլ Փաշինյանը երբեք չէր կարող վարչապետ դառնալ: Հիմա, որպեսզի նա որպես ժողովրդի ներկայացուցիչ լիարժեք և ամբող­ ջական լեգիտիմությամբ կարողանա իր ծրագրերն իրագործել, պետք է լինեն արտահերթ խորհրդարանական ընտրություններ, որից հետո նա պետք է ունենա իրեն սատարող  մեծամասնություն կազմող քաղաքական ուժի հենարան: Այդ դեպքում ամբողջ գործընթացները սահմանադրական հունի մեջ կնկնեն»:

Դիմել ՍԴ և ռեյտինգային ընտրակարգը ճանաչել հակասահմանադրական

«Եթե ուզում ենք, որ ընտրությունները լինեն արդար  ու արտահայտեն ժողովրդի կամքը, ապա Ընտրական օրենսգրքի կատարելագործման անհրաժեշտություն կա: Այդ պարագայում միջազգային չափանիշներով փոփոխության նախագիծ պետք է մտցվի  Վենետիկի հանձնաժողովի և միջազգային այլ կառույցների հետ քննարկումներ, եզրակացություններ պետք է լինեն: Դրանից գոնե 6 ամիս անց նոր պետք է ընտրություններ կազմակերպել: Սա շատ երկար ժամանակահատված է լինելու,  դրա համար ես առաջարկում եմ ամենակարճ ու ռեալ տարբերակը.  դիմել Սահմանադրական դատարաան՝ պահանջով, որ ռեյտինգային ընտրակարգը ճանաչվի  հակասահմանադրական և ուժը կորցնի: Ինքս պատրաստ եմ հիմնավորումներ ներկայացնել : Դրանից հետո ընտրությունները պետք է կազմակերպել համամասնական ցուցակներով: Այս ճանապարհն  արդյունավետ ու ռեալ մեխանիզմ կլինի»,–եզրափակեց Վարդան Այվազյանը:

Շարունակությունը՝ «Փաստ» օրաթերթի այսօրվա համարում