«Չկա կողմ, որի կողմից «ֆեյքերով» կռիվ չտան». «Փաստ»

«Փաստ» օրաթերթը գրում է.

Համաժողովրդական շարժման առաջին օրերից մինչ օրս (և ընդհանրապես) տեղեկատվական դաշտում «տրամադրությունները» փոփոխվում են նույնքան արագ, որքան քաղաքական իրադարձությունները: Ինչպիսի՞ն է նոր իշխանության ու իրեն ընդդիմություն հայտարարած ՀՀԿ–ի մարտավարությունը տեղեկատվական դաշտում: Տեղեկատվական անվտանգության հարցերով փորձագետ Սամվել Մարտիրոսյանը, անդրադառնալով հարցին, «Փաստ»–ի հետ զրույցում նախ նշեց. «Մինչև ապրիլի 22–23–ը հանրապետականները բավականին պասիվ էին սոցցանցերում:  Ապրիլի 23–ից հետո քաղաքական պայքար սկսվեց և իրար հետևից փոփոխություններ եղան: ԵՎ երբ Կարեն Կարապետյանը  փաստացի դարձավ վարչապետի ժամանակավոր պաշտոնակատար, այդ ժամանակահատվածում ՀՀԿ-ի թիմը կտրուկ ակտիվացավ Գումարած դրան՝ արդեն հանրությունը սկսեց բաժանվել մասերի,  որովհետև տարբեր կարծիքներ ունեցողներ հայտնվեցին:  Այստեղ արդեն միայն հասարակական շարժում չէր: Մարդիկ կային, ովքեր մտավախություններ ունեին  ինչ–որ կուսակցության մասնակցության հետ կապված, մտավախություններ ունեին նաև հետագայում արդեն հնարավոր նախարարների հետ կապված: Դա բերեց մի վիճակի, որ հանրությունը բաժանվեց ավելի մանր հատվածների: Հիմա մենք փաստացի գտնվում ենք բաղդատման շրջանում, գնալով տարբեր կարծիք ունեցողները շատանում են»: Սամվել Մարտիրոսյանը նշեց, որ այս փուլում  հատկապես հանրային խմբերն են շատանում:

«Ընդ որում՝ այն մարդիկ, ովքեր ոչ թե կուսակցական, այլ քաղաքացիական ուժ են ներկայացնում: Այստեղ ևս դիրքորոշումները սկսում են շատանալ: Վերջիվերջո, նոր կառավարությունն արդեն քայլեր  է անում, և քննարկումներն արդեն ծավալվում են ոչ թե այդ քաղաքական պայքարի, այլ կառավարության կոնկրետ քայլերի շուրջ»,–ասաց մեր զրուցակիցը: Հաճախ նոր կառավարության նկատմամբ քննադատական կարծիքները սուր արձագանք են ստանում: Շատ դեպքերում անգամ վիրավորանքների մեծ հեղեղ է սկսվում: Սամվել Մարտիրոսյանի կարծիքով՝ սոցցանցերում սա նորմալ երևույթ է. «Դա ան­ գամ ամենահանգիստ օրերին է լինում: Հիմա, բնականաբար, էմոցիոնալ դաշտը շատ ուժեղ է: Ես զարմանում եմ, որ մարդիկ զարմանում են, երբ մարդիկ հայհոյում են սոցցանցերում: Սա նորություն չէ: Նույնիսկ, ավելին ասեմ, շատ ավելի քիչ է, քան կարող էր լինել»: Ըստ փորձագետի՝ այս փուլում ևս «ֆեյքե­ րը» շատ են: «Շատ դեպքերում նույնիսկ հասկանալի չէ, թե ինչ խաղ է խաղացվում: Բայց շարժման դեռ առաջին օրերից «ֆեյքերի» ակտիվացում կար և հիմա էլ բավականին շատ են: Տարբեր խմբերի ներկայացուցիչների «ֆեյքերն» ակտիվացել են: Չկա կողմ, որի թիմից «ֆեյքերով» կռիվ չտան»,– ընդգծեց նա: Հարցին, թե տեղեկատվական հակամարտությունը կարո՞ղ է տեղեկատվական պատերազմի վերաճել, Սամվել Մարտիրոսյանը պատասխանեց. «Նախ՝ եթե կա քաղաքական հակամարտություն, տեղեկատվական հակամարտություն, բնականաբար, լինում է: Բայց տեղեկատվական հակամարտությունը տեղեկատվական պատերազմի ինքնուրույն չի վերածվում: Այսինքն՝ եթե սկսվի քաղաքական լուրջ առճակատում, դա կարտացոլվի նաև տեղեկատվական դաշտում: Տեղեկատվական պատերազմը, որպես առանձին երևույթ, գոյություն չունի: Այս պահին լուրջ առճակատում, կարծում եմ, չկա»: Նշենք, որ Սփյուռքի նախարար Մխիթար Հայրապետյանի առաջին գործերից մեկն այն է եղել, որ մոնիթորինգի խումբ է ստեղծել, ովքեր նախարարին զեկուցելու են նաև գերատեսչության վերաբերյալ տեղական ու միջազգային մամուլի, սոցիալական ցանցերում առկա դրական ու բացասական արձագանքների մասին: Ենթադրելի է՝ նաև հակադարձելու միտումով: Սամվել Մարտիրոսյանը նշեց, որ առհասարակ սոցցանցերը մոնիթորինգ անելը նորմալ երևույթ է. «Դա ընդունված է ամբողջ աշխարհում: Նախորդ իշխանություններն էլ էին անում, որովհետև դա թույլ է տալիս  հասկանալ հանրային կարծիքը: Թեպետ չարժե միայն սոցցանցերով առաջնորդվել, որովհետև, օրինակ, նույն «ֆեյքերի» քանակն այնքան շատ է, որ կարող են տպավորությունը շեղված ստանալ»:

Շարունակությունը՝ «Փաստ» օրաթերթի այսօրվա համարում