Փաստաբաններին զանգահարողները Հրայր Թովմասյանի շրջապատի՞ց են. «Փաստ»

«Փաստ» օրաթերթը գրում է.

Փաստաբանական համայնքի ավելի քան 200 ներկայացուցիչներ հանդես են եկել նախագահ Արմեն Սարգսյանին ուղղված հայտարարությամբ՝ փաստաբան Վահե Գրիգորյանին Սահմանադրական դատարանի դատավորի թեկնածու առաջադրելու վերաբերյալ: Հայտարարությունը բաց տեքստով դրվել է Ֆեյսբուք սոցիալական ցանցում: Սա մի քանի փաստաբանի մտահղացումն է եղել: Ով գտել է նպատակահարմար, հայտնել է իր միանալու մասին: Իսկ նամակում մասնավորապես ասված է. «Հարգելի պարոն Սարգսյան, Հիմք ընդունելով Ձեր 17.05.2018թ. հայտարարությունը ՀՀ Սահմանադրական դատարանի դատավորի թեկնածուի առաջադրման վերաբերյալ իրավաբանական հանրության ներկայացուցիչների կարծիքը լսելու և թեկնածուի առաջադրումը հստակ խորհրդակցական մեխանիզմներով և ընթացակարգերով իրականացնելու պատրաստակամության վերաբերյալ՝ որպես փաստաբանական համայնքի ներկայացուցիչներ առաջարկում ենք քննարկել փաստաբան Վահե Միշայի Գրիգորյանի թեկնածությունը։ Լավատեղյակ լինելով փաստաբան Վահե Գրիգորյանի բարձր մասնագիտական և անձնական հատկանիշներին և հատկապես սահմանադրական իրավունքի և արդարադատության ոլորտի նրա բարձր գիտելիքներին՝ վստահ ենք, որ նրա ընտրությունը ՀՀ Սահմանադրական դատարանի դատավորի պաշտոնում կնպաստի Դատարանի հեղինակության բարձրացմանը և նոր որակ կհաղորդի սահմանադրական արդարադատությանը Հայաստանում։ Միևնույն ժամանակ, լիահույս ենք, որ այդ խորհրդակցական մեխանիզմներն ու ընթացակարգերը հիմնված կլինեն հավասարության, արդարության, թափանցիկության և հրապարակայնության սկզբունքների վրա և կապահովեն այդ գործընթացի նկատմամբ բարձր հանրային վստահությունը և Սահմանադրական դատարանի բարձր հեղինակությունը»։Որպես Սահմանադրական դատարանի անդամի թեկնածու Վահե Գրիգորյանին երաշխավորելու հայտարարությանը արդեն իսկ միացել է 228 փաստաբան: Բայց որոշ փաստաբանների, պարզվում է, զանգահարել են ինչ–որ անհայտ անձինք՝ պահանջելով հրաժարվել ստորագրությունից: Ավելին, լրատվականներում դա որակվեց որպես ճնշում... Այս մասին ահազանգել է նախագահին դիմում գրելու որոշման հեղինակներից փաստաբան Երվանդ Վարոսյանը: Նրա խոսքով՝ Վահե Գրիգորյանի թեկնածությունը պաշտպանող փաստաբաններին զանգեր են կատարվում՝ առաջարկելով հրաժարվել ստորագրություններից: Զանգեր եղել են մի քանի փաստաբանի: «Փաստ»–ի հարցին՝ տեղյա՞կ է կամ պատկերացում ունի՞, թե ովքեր են եղել զանգահարողները, Վարոսյանը պատասխանեց, որ իրեն ասել են՝ ովքեր են, բայց քանի որ իրեն չեն զանգել ու այն մարդիկ, ում զանգել են այդ խնդրանքով, չեն ցանկանում բարձրաձայնել, նա չի կարող անուններ տալ: Միևնույն ժամանակ, փաստաբանը նշում է, որ այդ անձինք որոշակի առնչություն ունեն ՍԴ նախագահ Հրայր Թովմասյանի հետ: Թե ինչու են Հրայր Թովմասյանը կամ իր մերձավոր շրջապատի անձինք անհանգստացած Վահե Գրիգորյանի հնարավոր առաջադրմամբ, փաստաբանը չգիտի: Բայց ենթադրում է, որ Հրայր Թովմասյանի համար առնվազն դիսկոմֆորտ կլինի Վահե Գրիգորյանի մակարդակի իրավաբանի հայտնվելը Սահմանադրական դատարանում: Վարոսյանը նաև հերքեց սպառնալիքների մասին լուրերը՝ նշելով, թե այդպիսի բանի մասին տեղեկություն չունի: Եղել են ընդամենը խնդրանքներ ստորագրությունները հետ վերցնելու վերաբերյալ: Մեր այն հարցին, թե քանի փաստաբանի են նման խնդրանքով զանգահարել, պատասխանեց, թե հստակ թիվ չի կարող ասել՝ հավելելով, որ եթե լիներ 1–2 դեպք, անհրա­ժեշտություն չէր տեսնի այդ մասին բարձրաձայնելու: Դիտարկմանը, թե այդ խնդրանքները հաշվի առնող ու ստորագրությունից հրաժարվողներ եղե՞լ են, Վարոսյանը պատասխանեց, որ եթե նրանք հետ վերցնեին իրենց ստորագրությունը, այդ մասին իրեն տեղյակ չէին պահի: Բայց եթե զանգում են, պատմում այդ դեպքի մասին, ուրեմն ցանկություն չունեն ստորագրություն հետ վերցնել: Այժմ նրանք սպասում են նախագահական նստավայրի արձագանքին: Ժամկետների մասին դեռևս պատկերացում չունեն: «Ինձ համար կարևորն այն է, որ ամեն ինչ լինի բաց, թափանցիկ մրցույթով: Երբ կլինի, ինչպես, ում ի վերջո կընտրեն, ես դա չեմ կարևորում: Կարևորում եմ այն, որ հանրությունը պետք է հասկանա՝ որն էր պատճառը, որ ընտրվեց այս թեկնածուն և ոչ՝ այն մեկը»,–հավելեց նա:

 

Շարունակությունը՝ «Փաստ» օրաթերթի այսօրվա համարում