Թևան Պողոսյան. «Պետք չէ նախկին սխալները կրկնել, այլ հարկավոր է ուղղակի բանակցել». «Փաստ»

«Փաստ» օրաթերթը գրում է.

ՀՀ նախագահի խորհրդական Թևան Պողոսյանն անդրադառնալով մայիսի 28–ին Հայաստանի անկախության 100–ամյակի առթիվ Սարդարապատի հուշահամալիրում կազմակերպված տոնական միջոցառմանը ԱԺ նախագահի չմասնակցելու խնդրի հետ կապված տարաձայնություններին՝ կողմերին կոչ արեց սիրո և համերաշխության մթնոլորտում քննարկել բոլոր հարցերը և ձևավորել մի իրավիճակ, որտեղ բոլոր ինստիտուտները կկարողանան համերաշխ աշխատել: «Ես ցանկանում եմ, որ բոլոր մեկնաբանություններն ավարտվեն, բոլորը միասին նստեն մեկ սեղանի շուրջ, մեկ անգամ այս հարցը քննարկեն և հասկանան, թե որտեղ ինչ բացթողում է եղել: Անփորձությա՞ն, ադմինիստրատիվ անձնակազմերի համագործակցության հարցո՞ւմ է թյուրիմացություն եղել, օրենքի բացթողո՞ւմ է եղել, թե՞ մարդկային գործոնն է եղել պատճառը: Բայց պետք է սիրո և համերաշխության մթնոլորտում գտնվեն այն լուծումները, որտեղ մենք նման իրավիճակ այլևս չենք ունենա: Հակառակ դեպքում վաղը կրկին տոն պետք է նշենք ու կրկին սկսենք իրար այս կամ այն բանի համար մեղադրել»,– ասաց Թ. Պողոսյանը: Ու թեև իրականում նա չգիտի, թե ինչ պատճառով է նման իրավիճակ ստեղծվել, բայց նաև կարծում է, որ եթե մի կողմն, այնուամենայնիվ, մեկնաբանում է, որ սխալներ չկան, ապա մյուս կողմն էլ պետք է այդ մեկնաբանությունն ընդունի: Իսկ եթե կողմերից մեկն է բացթողում ունեցել, ապա պետք է ընդունի իր բացթողումն ու այլևս նման թերացում թույլ չտա: «Մենք հիմա փորձում ենք ինչ–որ բացատրություն գտնել՝ մոռանալով, որ այդ մեկնաբանություններով առաջնորդվել պետք չէ: Եթե վաղը–մյուս օրը կրկին մի էդպիսի դեպք լինի, կրկին սկսելու ենք ընկնել մեկնաբանությունների հետևի՞ց: Միգուցե օրենքում բացթողում կա, միգուցե ընկալման մեջ ինչ– որ բան այն չէ, միգուցե մասնագիտական, միգուցե քաղաքական խնդիր է եղել, բայց պետք է սովորել, որ հարցերին լուծում տալու համար հարկավոր է սեղանի շուրջ նստել, բանակցել և թույլ չտալ, որ նման երևույթները կրկնվեն»,– ասաց Թևան Պողոսյանը: Նրա խոսքով, կոնֆլիկտը հարթելու համար կարելի է Բաղրամյան 19–ից քայլելով գնալ Բաղրամյան 26, կամ հակառակը՝ Բաղրամյան 26–ից քայլելով գնալ Բաղրամյան 19, իսկ եթե նույնիսկ այդ երկու հասցեները հարմար չեն, կարելի է մի երրորդ՝ այլ, ավելի չեզոք տեղում հանդիպել, հարցերը քննարկել ու լուծումներ գտնել: «Եթե պետք է, ես կտրամադրեմ «Մարդկային զարգացման միջազգային կենտրոնի» կոնֆերանս դահլիճը, կարող են բոլորը գալ, նստել, կարող ենք նաև օգնել, որպեսզի այսպիսի հարցերը լուծվեն և այլևս նման բան չկրկնվի և ձևավորվի սիրո և համերաշխության մթնոլորտ: Եվ կողմերի՝ իրար հասցեին հնչեցված մեղադրանքները մեկնաբանելու փոխարեն պետք է ավելի լուրջ գործերով զբաղվենք: Մենք պետք է սովորենք հարցերը այլ մեթոդով՝ բանակցություններով լուծել, որը նաև միտված կլինի դեպի ապագան: Բոլորս ենք ուզում, չէ՞, որ փոփոխություն լինի մեր երկրում, ուստի պետք չէ նախկին սխալները կրկնել»,– ասաց Թ. Պողոսյանը: Խոսելով Հանրապետական կուսակցությունից և նույնանուն խմբակցությունից պատգամավորներ Շիրակ Թորոսյանի և Արթուր Գևորգյանի դուրս գալու մասին՝ նա նշեց, որ նման որոշում կայացնելն իրենց իրավունքն է, իսկ թե այդ միտումը կշարունակվի, թե ոչ՝ չգիտի: «Ես սուրճի բաժակ նայող չեմ, որ կանխատեսումներ անեմ՝ կշարունակվի, թե չի շարունակվի խմբակցությունից դուրս գալու գործընթացը: Պետք է հասկանալ, որ եթե որևէ պատգամավոր դուրս է գալիս խմբակցությունից, ապա արդյո՞ք ինքը դուրս է գալիս նաև Ազգային ժողովից, թե՞ այնուամենայնիվ պահպանում է իր անձեռնմխելիությունը: Բայց ես չեմ կարող ասել, թե դրանից հետո ով ինչ կանի»,– ասաց Թ. Պողոսյանը: Կարճ ասած՝ անցումային շրջանը դեռ չի ավարտվել, և դժվար է կանխատեսել, թե վաղը ինչ կլինի: «Մարդկային զարգացման միջազգային կենտրոնի» ղեկավարի խոսքով, այն չի ավարտվի այնքան ժամանակ, քանի դեռ տեղի չեն ունեցել նոր խորհրդարանական ընտրություններ: Եվ երբ արդար, ազատ և հավասար պայմանների պարագայում տե- ղի կունենան խորհրդարանական ընտրություններ ու կձևավորվի կառավարություն, այդ ժամանակ հնարավոր կլինի ասել, որ անցումային փուլն ավարտվել է: «Հիմա լավագույն ժամանակն է հասկանալու, թե նոր Սահմանադրության, խորհրդարանական համակարգի և այլ մեխանիզմների պարագայում ինչպես պետք է բոլորս միասինք քայլենք՝ օգտագործելով բանակցային կլոր սեղանները, միասին հարցերը քննարկելու ավանդույթ ձևավորենք և միասնական շահեր կարողանանք ձևավորել, և այդկերպ ձևավորենք և հզորացնենք նոր Հայաստանը»,– ասաց Թ. Պողոսյանը:

Շարունակությունը՝ «Փաստ» օրաթերթի այսօրվա համարում