Առանց մթության քողի. «Փաստ»

«Փաստ» օրաթերթը գրում է.

Արդեն իսկ պաշտոնապես հայտարարվել է, որ քննարկումներ են ընթանում օգոստոսից գազի, էլեկտրաէներգիայի և ջրի սակագների վերանայման ուղղությամբ: Նույնիսկ տնտեսագետներն են դժվարանում կանխատեսել, թե ինչ արդյունք կտան այդ քննարկումները, որքանո՞վ կնվազեն սակագները: Սակայն հենց միայն մասնագիտական քննարկումների փաստն ինքնին խոսում է այն մասին, որ դրանց նախաձեռնողները տեսնում են նվազեցման հնարավորություններ: Ուրեմն, պետք է ենթադրել, որ ի վերջո որոշակի չափով սակագների մեղմման ականատես կլինենք, ինչը լուրջ սոցիալական նշանակություն ունի: Ի վերջո, մեր իրականության մեջ, ցածր աշխատավարձերի ու թոշակների պարագայում, մարդկանց մի զգալի մասի եկամուտների «առյուծի բաժինը» ծախսվում է կոմունալ վճարների համար: Երբեմն, ցավոք, նույնիսկ սննդի վրա ծախսվողից շատ: Սակայն վերջնական որոշումից առավել կարևոր է դիտարկել այն հանգամանքը, թե որքանով են այսքան տարի արդարացված եղել բարձր սակագները: Ի վերջո, մասնագետների պատկառելի խմբի կարծիքով, հատկապես գազի սակագինը չափազանց բարձր է եղել, քանի որ չափազանցված են եղել ինքնարժեքի մեջ մտցված ծախսերը: Տարբեր մոտեցումներ կան նաև էլեկտրաէներգիայի և ջրի սակագների հաշվարկման մեթոդաբանության ու նորից ծախսերի կառուցվածքի առումով: Մենք առիթ ունեցել ենք անդրադառնալ մասնավո­ րաբար բնական գազի՝ գոնե սահմանին մոտ հատվածներում անհամեմատ էժան սակագնով մատուցելու հնարավորությանը, ինչը թույլ կտար ոչ միայն այդ տարածքների բնակչության սոցիալական բեռը թեթևացնել, այլ նաև նպաստել արտադրական ենթակառուցվածքների, մասնավորաբար ջերմոցային տնտեսությունների զարգացմանն ու արտաքին շուկայում համապատասխան արտադրանքի մրցունակության բարձրացմանը: Ամեն դեպքում, կարևոր է, որ հաշվի առնելով նախորդ իշխանությունների՝ մթության քողի ներքո որոշումներ կայացնելու արատավոր սովորույթը, գործողները բոլոր այդ քննարկումներն իրականացնեն հնարավորինց բաց ու թափանցիկ՝ տալով բոլոր հարցերի պատասխանները:

Շարունակությունը՝ «Փաստ» օրաթերթի այսօրվա համարում