«Եթե Նիկոլ Փաշինյանն էլ չկարողացավ հարցը լուծել, դիմելու ենք ծայրահեղ քայլերի». «Փաստ»

 

«Փաստ» օրաթերթը գրում է.

 

Արարատի մարզի Հովտաշատ համայնքի բնակիչները չեն կարողանում իրենց աճեցրած լոլիկը վաճառել: Հողագործ Պատվական Մանուկյանի՝ բերքով լցված բեռնատարն արդեն օրեր շարունակ ճանապարհին է կանգնած, բայց ոչ մի կիլոգրամ բերքից չի պակասում: Ըստ գյուղացիների՝ բերքի չիրացման համար պատճառները քիչ չեն: Մի կողմից գազի, դիզվառելիքի թանկ սակագները, մյուս կողմից ներկրման մեծ ծավալները խանգարում են գյուղացուն:Գազի ու դիզվառելիքի բարձր գինը թանկացնում է ապրանքը, իսկ ներկրման մեծ ծավաները գցում են ապրանքի գինը, գյուղացիներն էլ ստիպված են կատարած ծախսերի համեմատ էժան գին առաջարկել: Անցյալ տարի այս ժամանակահատվածում տեղական գյուղմթերքի գներն անհամեմատ բարձր էին: Լոլիկն այսօր վաճառվում է կիլոգրամը 400–500 դրամով, նախորդ տարի այն իրացվում էր 1000–1150 դրամի սահմաններում: Վարունգի գինը նույնպես նվազել է՝ կազմելով 100–200 դրամ: «Անցյալ տարի շուկա լոլիկ չեն մտցրել, այս տարի այլանդակել են շուկան»,–վրդովվեցին հողագործները: Գյուղացիների պնդմամբ՝ թուրքական լոլիկի՝ մեծ քանակով ներկրման պատճառով իրենք ստիպված են մրցակցել թուրքական արտադրանքի հետ ու հաճախ գնային առումով չեն կարողանում մրցունակ լինել: Այս ամենի հետևանքով նրանք չեն կարողանում անգամ ներդրած գումարները հետ բերել: Ֆերմերները բողոքեցին, որ որոշ խոշոր ջերմոցային տնտեսություններ չեն կարողա­ ցել ռուսական շուկայում սպառել ցեցով վարակված լոլիկը, և այն հայտնվել է տեղական շուկայում: «Մոտ 60 տոննա բեռը վերադարձրել են արտահանողին, և վարակված ապրանքն իրացվում է հայկական շուկայում, որի պատճառով մանր ու միջին ֆերմերները չեն կարողանում իրացնել իրենց արտադրանքը և ստիպված են լինում վաճառել լոլիկը ինքնարժեքից էլ ցածր»,– դժգոհեցին մեր զրուցակիցները: Լոլիկ արտադրելը գյուղացու վրա թանկ է նստում՝ բարձր գներով պարարտանյութ, թունաքիմիկատ են ձեռք բերում: Թանկ է նաև գազի սակագինը: «Պարարտանյութի պարկը 25 000 դրամով ենք գնում, իսկ Վրաստանում՝ 10 000 է: Այսօր մի գյուղացի չկա, որ իր չարչարանքից գոհ լինի: Մեկ խորանարդ մետր գազին 149 դրամ փող ենք տալիս: Սաղս մնացել ենք պարտքերի ու վարկերի տակ, չենք կարողանում բերքը ծախել, որ գազի, պարարտանյութի, սերմի ու բանվորի փողը վճարենք: 1992 թվականին գյուղացու վիճակն ավելի լավ էր»,–սրտնեղեցին հովտաշատցիները: Հողագործների հույսը նոր կառավարությունն է: Նրանց խոսքով՝ եթե Նիկոլ Փաշինյանի գլխավորած կառավարությունն էլ չկարողացավ այս վիճակի դեմն առնել, իրենք են պայքարելու: Նախկին գինեգործ գյուղնախարար Իգնատի Առաքել յանի աշխատանքից դժգոհ լոլիկագործներն ասացին՝ իբրև պետությունն իրենց ցածր տոկոսներով վարկեր է տրամադրում, սակայն ապրանքի իրացման հարցում ստիպված են արհեստական խոչընդոտների հանդիպել՝ եկամուտ չստանալով: 2000 մետր ջերմոց ունեցող գյուղացին այսօր այլ ելք չի տեսնում, քան ծայրահեղ քայլերի դիմելը:

Շարունակությունը՝ «Փաստ» օրաթերթի այսօրվա համարում