Խնդիրները չտեսնելով՝ դրանք չեն լուծվի. «Փաստ»

 

«Փաստ» օրաթերթը գրում է.

Պաշտոնական տվյալներով՝ այս տարի բուհեր դիմողների քանակը անցած տարվա համեմատ նվազել է մոտ երկուսուկես անգամ: Եթե 2017 թվականին բուհ ընդունվելու հայտ էր ներկայացրել շուրջ 12000 դիմորդ, ապա այս տարի՝ ընդամենը 4626: Դարձյալ պաշտոնապես նշվում է, թե դիմորդների թվի նվազման պատճառն անցումն է 12–ամյա կրթական համակարգին, քանի որ այս տարվա շրջանավարտներն առաջինն էին, ովքեր ավարտում էին 12 տարի սովորելով: Նույն պատճառաբանությունն էր նշվում նաև շրջանավարտների թվի նվազման առումով: Բայց մենք արդեն նշել ենք, որ 157 դպրոց այս տարի ընդհանրապես շրջանավարտ չի ունեցել, ևս 250 դպրոց ունեցել է 1–5 աշակերտ: Սրանք՝ առավելապես գյուղական բնակավայրերի դպրոցներն են: 

Իհարկե, շատ հնարավոր է, որ վերոնշյալ պատճառն իր ազդեցությունը թողածլինի, սակայն ամենևին ոչ այն ծավալներով, ինչ ունենք այսօր: Ըստ էության այս բոլոր թվերը շատ մեծ մտահոգության առիթ պիտի լինեն պատկան մարմինների համար, ավելի ստույգ՝ լուրջ ահազանգ: Սոսկ հայտարարելով, թե 12– ամյա կրթությամբ լրիվ 12 տարի սովո­ րողների առաջին սերունդն ավարտեց այս տարի, դրա համար էլ ավարտողների ու բուհ ընդունվել ցանկացողների թիվը երկուսուկես անգամ նվազել է, խնդրի խորքը երբեք չենք հասկանա: Տարիներ շարունակ նախորդ իշխանությունները զբաղվել են ջայլամային քաղաքականությամբ: Սակայն խնդիրը չտեսնելով կամ չտեսնելու տալով՝ խնդիրը չի լուծվի: Դրա համար էլ անընդհատ զբաղված ենք եղել խնդիրների կուտակմամբ: Այն, ինչ ունենք այսօր վերը բերված թվերի հետ կապված, նույն այդ խնդիրների կուտակման արդյունք է: Եվ նոր իշխանությունների առաջնային խնդիրը պետք է լինի ամենայն մանրամասնությամբ ուսումնա­ սիրել՝ ստանալու ԻՆՉՈՒ–ի պատասխանը: Այդ թվերը լակմուսի թղթի դեր կարող են կատարել՝ հասկանալու թե՛ տասներկուամյա կրթության բացերը, թե՛ արտագաղթի խնդիրները, թե՛ ուրբանիզացիոն գործընթացների իրական պատկերը:

Շարունակությունը՝ «Փաստ» օրաթերթի այսօրվա համարում