Ազգային ժողովում այլևս սահմանադրական մեծամասնություն չկա. «Փաստ»

ՔԱՂԱՔԱԿԱՆ 7 Հունիս, 2018 8:03

«Փաստ» օրաթերթը գրում է.

Երեկ փաստացի ՀՀԿ խմբակցությունը նաև սահմանադրորեն կորցրեց 2017թ. ընտրությունների արդյունքում ստացած ստատուս քվոն: Գործարար պատգամավորների՝ ՀՀԿ խմբակցությունը լքելու շարունակական գործընթացի արդյունքում այս Ազգային ժողովում ՀՀԿ–ն այլևս մեծամասնություն չէ: Սակայն, միևնույն ժամանակ, դա չի նշանակում, որ այս կուսակցությունը մեխանիկորեն դառնում է փոքրամասնություն: Փաստացի, զուտ իրավական տեսակետից, խորհրդարանում սահմանադրական մեծամասնություն կազմող ուժ չկա, քանի որ Նիկոլ Փաշինյանի՝ վարչապետ ընտրվելու, ապա և կառավարություն ձևավորելու շուրջ կոնսենսուսի եկած երեք քաղաքական ուժերը պաշտոնապես կոալիցիա չեն կազմել: Արդյունքում ստացվել է մի վիճակ, երբ պարզ մաթեմատիկական հաշվարկներով որևէ նախագիծ անցկացնելու համար ՀՀԿ ձայնը վճռորոշ չի լինի (բացառությամբ սահմանադրական օրենքներից), սակայն որոշիչ կլինեն հենց ՀՀԿ խմբակցությունը լքած գործարար պատգամավորների ձայները: Մենք արդեն առիթ ունեցել ենք նշել, որ այսպիսով խնդիր է դրվում մի կողմից նոր կառավարությանը կախվածության մեջ գցել նշյալ պատգամավորներից, մյուս կողմից ՀՀԿ–ում թողնել բացառապես քաղաքական դեմքերի: Այս հանգամանքը հատկապես ՀՀԿ–ի համար նշանակալի է ոչ միայն և ոչ այնքան առաջիկա հնարավոր ընտրությունների տեսանկյունից, որքան հենց այսօր խորհրդարանում քննարկվող կառավարության ծրագրի հաստատման–չհաստատման առումով: Բանն այն է, որ հանրապետականները մեկ անգամ չէ, որ հայտարարել են, թե չեն բոյկոտելու ծրագրի ընդունումը, ավելին, Էդուարդ Շարմազանովը շեշտել է, որ իրենք կվարվեն այնպես, ինչպես մայիսի 8–ին, այսինքն՝ ցուցակային քվեարկությամբ՝ ապահովելով անհրաժեշտ քանակի ձայներ: Սակայն հաշվի առնելով այն հանգամանքը, որ կառավարության ծրագրում հստակ ամրագրված են մեկ տարվա ընթացքում արտահերթ ընտրություններ անցկացնելու և Ընտրական օրենսգրքի փոփոխությունների համատեքստում մասնավորաբար վարկանիշային ընտրակարգը վերացնելու անհրաժեշտության մասին, ինչին ՀՀԿ–ն սկզբունքորեն դեմ է, ապա այս ծրագիրն ընդունելու դեպքում կստացվեր մի վիճակ, որ ՀՀԿ–ն կողմ է նշյալ կետերին: Որքան էլ միայն մի մասը կողմ քվեարկեր, որքան էլ դա լիներ քաղաքական որոշման արդյունք, այդուամենայնիվ, հենց միայն այն փաստը, որ ՀՀԿ–ն ըստ էության որոշում է կայացնում «անցկացնել» ծրագիրը, ինքնին խոսում է այդ դրույթներին համաձայն լինելու մասին: Դրա մասին է վկայում նաև խմբակցության անդամ Գևորգ Կոստանյանի երեկվա հայտարարությունը, որ եթե կառավարության գործունեության ծրագիրը հավանության արժանանա ՀՀԿ խմբակցության կողմից, դա կդիտարկվի նաեւ որպես արտահերթ ընտրությունների ծրագրին հավանության արժանացում: Այս հայտարարությունն ինքնին հաստատում է մեր երեկվա պնդումը, որ գործարար հատվածի հեռացումը ՀՀԿ–ից Սերժ Սարգսյանի անմիջական «դաբրոյով» ու հրահանգով է արվում: Այսպիսով, այլևս հարկ չի լինի ամեն անգամ ցուցակ կազմել որևէ նախագիծ անցկացնելու համար, իսկ ծրագրին ՀՀԿ խմբակցության մնացած պատգամավորները կարող են դեմ քվեարկել, քանի որ անհրաժեշտ ձայների քանակը հնարավոր կլինի ապահովել:

Շարունակությունը՝ «Փաստ» օրաթերթի այսօրվա համարում