Տնտեսական և սոցիալական հենարանների ստեղծումը՝ առաջին հերթին. «Փաստ»

«Փաստ» օրաթերթը գրում է.

Կառավարության գործունեության ծրագրում քաղաքագետ Ալեքսանդր Մարկարովի դիտարկմամբ առանձնացված են այն առանցքային խնդիրները, որոնք Փաշինյանի կառավարությունը փորձելու է իրականացնել: 

«Քաղաքական տեսանկյունից ծրագրում բացի համակարգի դեմոնտաժումից, Փաշինյանը հակված է ձեռք բերել խորհրդարարանական կայուն մեծամասնություն: Եթե իշխանության մեջ նա ունի մեծամասնություն, ապա խնդիրը, որն այս պահին առկա է, այնպիսի խորհրդարան ձևավորելն է, որը կարտացոլի Փաշինյանի շուրջ գոյություն ունեցող ուժերի փոխհարաբերակցությունը: Այսինքն, ըստ էության, քաղաքական տեսանկյունից առկա են կոչեր, որոնց զարգացումներն ուղղված են արտահերթ խորհրդարանական ընտրություններ անցկացնելուն, որի արդյունքում քաղաքական ուժերի նոր դասավորություն կունենանք»,– ասաց Ա. Մարկարովը:

Հաջորդ հարցը, ըստ քաղաքագետի, համամասնական ընտրական համակարգին է վերաբերում: Եվ եթե մնա ռեյտինգային համակարգը, ապա հարց է ծագում, թե որ բանաձևի շրջանակներում են ռեյտինգային թեկնածուների անցողիկ շեմի հաշվարկներն իրականացվելու:

«Հարցն այն է՝ մնալո՞ւ է, արդյոք, ռեյտինգային համակարգը, թե՝ ոչ: Եթե այո, ապա ո՞րն է լինելու այն շեմը, որը պետք է հաղթահարեն կուսակցությունները կամ կուսակցությունների դաշինքները, ո՞րն է լինելու այն մաթեմատիկական բանաձևը, որը կիրառվելու է հաշվարկների ժամանակ»,– ասաց քաղաքագետը:

Անդրադառնալով ծրագրի տնտեսական բաղադրիչին՝ Ա. Մարկարովը նշեց, որ այն շարժման առաջին օրից մինչ օրս չի փոխվել, և այն օրերին հնչեցված հակամոնոպոլացման և հակակոռուպցիոն քաղաքականու­ թյունները մնում են օրակարգային հարցերը: «Սակայն սրան զուգահեռ անհրաժեշտ է ստեղծել տնտեսական և սոցիալական հենարաններ, իսկ հակամենաշնորհային և հակակոռուպցիոն ծրագրերը պետք է իրականացնել բյուջեի մուտքերն ավելացնելու համար»,– ասաց Ա. Մարկարովը:

Խոսելով նախկին և ներկա քաղաքական վերնախավերում տեղի ունեցող գործողությունների մասին՝ քաղաքագետը նշեց, որ եթե այսօր, ըստ էության, քաղաքական վերնախավում գտնվող ուժի գործողություններում ակտիվություն կա, ապա գործողություններ են տեղի ունենում Հանրապետական կուսակցության շրջանակներում:

«Ստեղծված իրավիճակում Հանրապետական կուսակցությունը պետք է փորձի գտնել իր սեփական նիշան նոր ձևավորվող կամ վերափոխվող քաղաքական դաշտում: Եվ դա էլ լինելու է այն մարտահրավերը, որին բախվում է հիմա և բախվելու է նաև հետագայում Հանրապետական կուսակցությունը»,– ասաց Ա. Մարկարովը:

Ինչ վերաբերում է քաղաքական դաշտի նոր վերադասավորումներին, ապա շատ բան կախված է լինելու «Ելք», «Ծառուկյան» դաշինք և ՀՅԴ եռանկյունու փոխգործակ­ ցության արդյունավետությունից, քանի որ շատ հարցեր լուծվելու են հենց այդ շրջանակներում:

Արցախում տեղի ունեցող իրադարձությունների մասին քաղաքագետը նշեց, որ կենցաղային միջադեպից սկսված բողոքի ակցիաները քաղաքական զարգացումների վերածվեցին, իսկ թե ինչ զարգացումներ կլինեն պետնախարարի հրաժարականից ու նոր նշանակումներից հետո, այս պահին դեռ դժվար է կանխատեսել: 

«Կարևոր է հասկանալ, թե արդյո՞ք սրանով են սահմանափակվելու գործընթացները Արցախում, թե՞ նոր զարգացումներ են տեղի ունենալու: Պարզ է, որ այն, ինչ տեղի ունեցավ, խոսում է հայաստանյան և արցախյան քաղաքականությունների փոխկապակցվածության մասին: Բայց գերակա խնդիրն այն է, որ չպետք է կորցնել աչալջությունը, քանի որ շատ կարևոր է հաշվի առնել այն իրադարձությունները, որոնք ամեն օր տեղի են ունենում շփման գծում: Ուստի չի կարելի այնպիսի իրադարձություններ թույլ տալ, որոնք կարող են վտանգել Արցախի անվտանգությունը և վտանգի մատնել նաև հայաստանյան կայուն զարգացման հեռանկարը»,– ասաց Ա. Մարկարովը:

Քաղաքագետի դիտարկմամբ, այս պահին ամենակարևոր հարցն այն է, որ արցախյան իրադարձությունները նպաստեն խնդիրների լուծմանը, քանի որ շատ դեպքերում երկրների կողմից վարվող քաղաքականությունը շատ անգամ ոչ թե անձերով է պայմանավորված լինում, այլ ծրագրային դրույթներով:

«Հասկանալի է, որ մարտահրավերները, որոնց առնչվում են Հայաստանն ու Արցախը, բավականին շատ են: Եվ ռեսուրսների սահմանափակ լինելու պատճառով դրանց բոլորին լիարժեք արձագանքել հնարավոր չէ: Ուստի հարկավոր է առանձնացնել այն գերակա ուղղությունները, որոնք հնարավոր է իրականացնել»,– ասաց քաղաքագետը:

Շարունակությունը՝ «Փաստ» օրաթերթի այսօրվա համարում