Անկանխատեսելի. «Փաստ»

«Փաստ» օրաթերթը գրում է.

«Հիմա, օրինակ, ո՞վ կարող է ասել՝ մեր տնտեսությունը քանի՞ տոկոս ստվեր ունի։ Կառավարությունը նախկինում գնահատել է 22 տոկոս, միջազգային կազմակերպությունները գնահատում են 46 տոկոս, և այդպես շարունակ։ Ուզում եմ ձեր ուշադրությունը հրավիրել այն փաստի վրա, որ նախկինում կառավարության ծրագրերի մեջ ֆիքսված թվերը, որպես կանոն, իրականություն չեն դարձել»։ Սրանք ՀՀ վարչապետ Նիկոլ Փաշինյանի խոսքերն են: Այսպիսով, վարչապետը երեկ ՀՀ Ազգային ժողովում կառավարության ծրագրի քննարկումների ժամանակ անդրադարձավ հնչող քննադատություններին, թե կառավարության ծրագրում հստակություն չկա, նշված չէ, թե ինչ տնտեսական աճ է ակնկալվում և աղքատությունը որքանով է նվազելու:

Ըստ էության, սա բավական կարևոր հայտարարություն է, քանի որ պաշտոնապես վարչապետը նշում է, որ նույնիսկ մոտավոր պատկերացում չունեն տնտեսական աճի հնարավոր չափի մասին: Անշուշտ, անկանխատեսելիությունը տնտեսության համար երբեք բարենպաստ չի լինում: Եթե ոչ ամբողջական, ապա գոնե ընդհանուր առմամբ որոշակի կանխատեսելիություն է անհրաժեշտ: Մյուս կողմից, այն հանգամանքը, որ նախորդ իշխանությունների ժամանակ կառավարության ծրագրերի մեջ ֆիքսված թվերը, որպես կանոն, իրականություն չեն դարձել, հիմք չէ անտեսել այդ թվերի նշանակությունը կառավարության գործունեության մեջ: Բայց... Հարցն այստեղ առավելապես պատճառաբանությունն է, այլ ոչ երևույթն ինքնին: Այսինքն, ստացվում է, որ տրված խոստումների կատարման, տնտեսությունը ոտքի կանգնեցնելու և աղքատության դեմ պայքարի համար նոր կառավարության հիմնական հույսը ստվերի դեմ պայքարն է, ընդ որում՝ տարբեր չափանիշներով՝ տարբեր աստիճանի ստվերի: Սրանով վարչապետը, ըստ էության, նաև պատասխանում է այն մեղադրանքներին, թե մեկ ամսում որևէ շոշափելի քայլ չի կատարվել՝ լայվերից ու տարբեր նախարարություններում կատարվող ստուգումներից (ըստ այդմ՝ ԱԱԾ դիմելուց) բացի: Ստացվում է, որ այ­սօր կառավարության հիմնական գործառույթը իրավապահ մարմինների միջոցով աննպատակահարմար ծախսերի կրճատումն է և ստվերում գտնվողների հայտնաբերումն ու դեպի բյուջե բերելը: Պետական բյուջե: Այ, դրանից հետո կերևա՝ ինչ կա, ինչքան ու ինչ կարելի է դրանով անել...