Ամերիկահայ պրոֆեսորը ԱՄՆ-ին հորդորում է ավելի շատ աջակցել Սիրիայի քրիստոնյաներին

 Սիրիայում բնակվող քրիստոնյաներն արժանի են ավելի մեծ աջակցության, քան տրամադրում է Միացյալ Նահանգները:

Այս մասին իր հոդվածում նշել է Ս. Ջոնի համալսարանում իրավունքի և կրոնի կենտրոնի ղեկավար, պրոֆեսոր Մարկ Մովսեսյանը:

Նա նշել է, որ շատ քրիստոնյաներ հրաժարվում են այսօր լքել իրենց տունը Սիրիայում, որտեղ բնակություն են հաստատել երկար տարիներ ի վեր: Սակայն շատ սիրիաբնակ քրիստոնյաների համար էլ ստեղծված իրադրության պայմաններում Արևմուտք փախչելը լավագույն փրկությունն է: Հետևաբար, ԱՄՆ-ն պետք է հետևողական գտնվի նրանց ավելի մեծ աջակցություն ցուցաբերելու համար, մինչդեռ մինչև օրս Միացյալ Նահանգները պաշտոնապես Սիրիայից ընդունել է միայն 53 փախստականի: Մարկ Մովսեսյանը սա հատկապես զարմանալի է համարում՝ հաշվի առնելով, որ նախքան սիրիական ճգնաժամը երկրի 23 միլիոն Õ �նակչության մեջ քրիսոտնյաները կազմում էին 10 տոկոս: Ճգնաժամից հետո արդեն «Իսլամական պետություն» կազմակերպությունն ու այլ իսլամիստական խմբավորումներ քրիստոնյաներին դարձրին հատուկ թիրախներ:

Մովսեսյանը հրապարակել է նաև վերջերս Instagram-ում հայտնված մի լուսանկար, որում պատկերված է ԻՊ կողմից կրակի տված մի հատված Նոր Կտակարանից: Լուսանկարում պատկերված հատվածը միակ պահպանված մասն է հայատառ թուրքերենով գրված կտակարանից, որը Սիրիա էին տարել 1915 թվականին Հայոց ցեղասպանությունից մազապուրծ եղած հայերը: Նոր Կտակարանն այրվել էր այն ժամանակ, երբ իսլամիստներն այրել էին Թել Աբյադի հայ առաքելական եկեղեցին: