Ինչպես Հայաստանը դուրս բերել փոսից. «Փաստ»

«Փաստ» օրաթերթը գրում է.

Նախորդ կառավարության օրոք «Այլընտրանքային նախագծեր» խումբը այս կամ այն ոլորտին առնչվող ծրագրեր մշակելու և կառավարությանն առաջարկելու նպատակ ուներ: Սակայն, ինչպես ասում են, ուրբաթը շաբաթից շուտ եկավ, և հետաքրքիր է, թե նախաձեռնությունն ինչ ճակատագրի արժանացավ: Եվ արդյո՞ք խումբը հասցրեց նախորդ իշխանություններին ներկայացնել որևէ ծրագիր: Եթե այո, ապա հիմա այն ի՞նչ փուլում է:

Նախաձեռնող խմբի ներկայացուցիչ Վահե Հովհաննիսյանը «Փաստ»–ին տեղեկացրեց, որ հարցի պատասխանը հայաստանյան իրականությանը համարժեք է.

«Ե՛վ հասցրեցինք ուղարկել, և՛  սկսել քննարկումները, և՛ կիսատ թողնել՝ հայտնի պատճառներով։ «Այլընտրանքային նախագծեր» խումբը փորձագիտական–վերլուծական կազմակերպություն է, մենք մշակում ենք ոլորտային առաջարկությունների, բարեփոխումների ամբողջական փաթեթներ։ Դրանք կամ հրապարակվում են, կամ փոխանցվում նրանց, ովքեր ունեն իրականացման լծակներ։ Այո, մեր մի շարք առաջարկներ ուղղվել են մինչմայիսյան իշխանություններին և բավական բարձր մակարդակով եղել է հետաքրքրություն և պատրաստակամություն քննարկելու»,– ասաց Վ. Հովհաննիսյանը։ 

Հարցին, թե ներկա կառավարության հետ նույն ոճո՞վ են փորձելու աշխատել, և եթե այդ առաջարկների «կարիքը» չլինի, որը կլինի նախաձեռնության հաջորդ քայլը, Վ. Հովհաննիսյանն ասաց, որ խումբն, իհարկե, թե՛ նույն, թե՛ այլ ոլորտային բարեփոխումների վերաբերյալ մշակումներ պատրաստ է ներկայացնել գործող կառավարությանը։ 

«Ես վստահ եմ՝ մենք տալիս ենք որակյալ մշակումներ, և դրանց իրականացումը միայն օգուտ կբերի պետությանը։ Մենք որևէ խնդիր չենք տեսնում մեր մշակումները և առաջարկները Ն. Փաշինյանի կառավարությանը ներկայացնելու մեջ։ Սա քաղաքակիրթ աշխարհի խաղի կանոններից է։ Մենք որևէ խնդիր չենք տեսնում մեր առաջարկները նախագահ Արմեն Սարգսյանին ներկայացնելու մեջ։ Մենք խնդիր չենք տեսնում հանրությանը ներկայացնելու և ինքներս հանրային քննարկումներ գեներացնելու հարցում։ Մնացածը կախված չէ իմ կամքից։ Բայց, կարծում եմ, այսօրվա հայաստանյան մթնոլորտը ավելի շատ պոզիտիվ է և համատեղ աշխատանքի հակված»,– ասաց նախաձեռնության ներկայացուցիչը։ Խոսելով Փաշինյան–Աճեմօղլու տեսակապով երկրի տնտեսությանն առնչվող հարցերի և աշխարհահռչակ տնտեսագետի Հայաստանին խորհուրդներով օգնելու մասին, ով, ի դեպ, փաստացի ներսից չի տիրապետում հայաստանյան խնդիրներին, և հասկանալի չէ, թե իրապես կարո՞ղ է օգտակար լինել Հայաստանը այս փոսից դուրս հանելու գործին, Վ. Հովհաննիսյանն ասաց, որ մեր երկիրն այս փոսից և հնարավոր բոլոր մարտահրավերներից հանելու են Հայաստանի իշխանությունները և հայ հասարակությունը։ «Ուրիշ տարբերակ ուղղակի գոյություն չունի։ Այլ հարց է, որ տարբեր անհատներ, կազմակերպություններ, կառույցներ, միջազգային հանրությունը կարող են մեզ օգտակար լինել՝ խորհուրդներով, ծրագրերով և աջակցման այլ մեխանիզմներով։ Փաշինյանի և Աճեմօղլուի կոնտակտները ես համարում եմ շատ դրական, և որևէ բացասական բան այդտեղ ուղղակի հնարավոր չէ տեսնել։ Չկան պատրաստի դեղատոմսեր, որ Աճեմօղլուն կամ որևէ այլ մեկը կտա մեզ, ու մեր տնտեսությունը կսկսի արագ զարգանալ։ Բայց խորհրդատվությունը, կոնտակտները, կապերը, պետության կողմից միջազգային հեղինակություն ունեցող անձանց հանդեպ հետաքրքրության դրսևորումը, արժևորումը կարևոր քայլեր են»,– ասաց Վ. Հովհաննիսյանը։

Շարունակությունը՝ «Փաստ» օրաթերթի այսօրվա համարում