«Որևէ միտում ու անձնական խնդիր չեմ տեսնում` հանրային պրոցես է». «Փաստ»

«Փաստ» օրաթերթը գրում է.

Արցախի «Ազգային վերածնունդ» կուսակցությունը հունիսի 13–ին Ստեփանակերտում հանրահավաք էր հրավիրել` քննարկելու Արցախում ստեղծված քաղաքական վիճակը։ «Ազգային վերածնունդ» կուսակցության ղեկավար, խորհրդարանի պատգամավոր Հայկ Խանումյանը տեղի ունեցած հավաքի շուրջ գրառում էր կատարել` նշելով, որ տարբեր գործիչներ գնացել են բնակավայրեր, ադրբեջանական հարձակմամբ ահաբեկել և խնդրել զերծ մնալ հավաքներին մասնակցությունից. «Տարբեր իշխանական քարոզիչներ, սկսած ՄԻՊ Ռուբեն Մելիքյանից մինչև լատինատառ գրող ֆեյքեր, սկսեցին տիրաժավորել սահմանում առկա վտանգավոր վիճակի մասին լուրերը»: Արցախի մարդու իրավունքների պաշտպան Ռուբեն Մելիքյանն իր ֆեյսբուքյան էջում անդրադարձել է մեղադրանքին: Պարզաբանում էր պահանջել նաև հանրային հնչեղություն ստացած դեպքերի մասով հնչած մեղադրանքին, որոնց պարագայում, ըստ պատգամավորի, Ռ. Մելիքյանը հիմնականում հանդես է եկել ոստիկանության և դատախազության պաշտպանի դերում: 

Թեմայի շուրջ «Փաստ»–ը փորձեց մեկնաբանություն ստանալ Արցախի ՄԻՊ Ռուբեն Մելիքյանից: 

«Որևէ լրացուցիչ ասելիք այդ հարցի շուրջ չունեմ: Այն ասելիքը, որն ունեի, հրապարակավ ներկայացրել եմ: Ես որևէ միտում չեմ տեսնում, որևէ անձնական խնդիր չեմ տեսնում: Դա հանրային պրոցես է: Խնդրին այդքան կարևորություն եմ տալիս` նկատի ունենալով բացառապես ինստիտուցիոնալ շահը: Այդ ինստիտուցիոնալ շահը Արցախի մարդու իրավունքների պաշտպանի հաստատության հեղինակությունն է, որը, կարծում եմ, բոլորիս համար պետք է լինի կարևոր արժեք»,–մեզ հետ զրույցում ասաց ՄԻՊ–ը: 

«Հաճախ է լինում, երբ քաղաքական նկատառումներով մարդիկ միմյանց որոշակի գնահատականներ են տալիս, ինչը երբեմն քննարկման առարկա չի դառնում: Մարդիկ սովոր են, որ նման երևույթներ են լինում: Բայց իմ համոզմունքը հետևյալն է. եթե խոսքն ինստիտուտներին է վերաբերում, և, առավել ևս, քաղաքական գործունեություն չիրականացնող ինստիտուտներին, ապա այդ հարցերում պետք է շատ ավելի նախանձախնդիր լինել: Սա էր պատճառը, որ ես մանրամասն որոշեցի անդրադառնալ պարոն Խանումյանի մեղադրանքին»,–շեշտեց նա: 

Նշենք, որ ոստիկանությունը շրջափակել էր Վերածննդի հրապարակը և թույլ չէր տվել իրականացնել վերոնշյալ հավաքը: Մասնակիցները նաև այդ առումով էին իրենց բողոքը հնչեցրել:

Անդրադառնալով նշվածին` Մելիքյանը նշեց, որ ոստիկանությունը, հիմք ընդունելով քաղաքապետարանի որոշումը, թույլ չի տվել հավաքը նշված վայրում իրականացնել: «Հավաքը տեղափոխվեց Վերածննդի հրապարակի հարևանությամբ գտնվող Շահումյանի արձանի տարածք: Ինչպես նախորդ հանրահավաքների ժամանակ, այնպես էլ այս դեպքում մեր աշխատակիցները սկզբից մինչև վերջ հետևում են գործընթացներին: Մենք ձևավորված պրակտիկա ունենք, որ Ստեփանակերտում տեղի ունեցող խաղաղ հավաքներին հետևենք ու հարկ եղած դեպքում գնահատական տանք»:

Նշենք, որ կուսակցությունը հավաք իրականացնելու արտոնություն ստանալու համար չէր դիմել քաղաքապետարան` բացատրելով, որ նախկինում եղել են դեպքեր, երբ նման հարցերը մերժվել են:

Հարցին, թե ի՞նչ ընթացք է տվել ՄԻՊ–ն այս հարցին և ի՞նչ դիրքորոշում ունի, Ռ. Մելիքյանը պատասխանեց. «Նախ ասեմ, որ որևէ դիմում չենք ստացել: Եթե ստանանք` անպայման կքննարկենք: Եթե մարդիկ դիմել են հավաքներ անցկացնելու համար և իրենց մերժել են, միանշանակորեն քննադատում եմ դա: Ես չգիտեմ` նման պրակտիկա եղե՞լ է, թե՞ ոչ, բայց եթե եղել է, քննադատելի պրակտիկա է: Միևնույն ժամանակ հույս եմ հայտնում, որ այսուհետ այն բոլոր իրավասու մարմինները, որոնք խաղաղ հավաքների առումով սահմանադրական և օրենսդրական գործառույթներ ունեն, կգործեն ի շահ մարդու իրավունքների»:

Ինչ վերաբերում է Արցախում դեռ հունիսի սկզբին ծավալված ակցիաներին ու այդ համատեքստում մարդու իրավունքների առումով առկա խնդիրներին, Ռուբեն Մելիքյանը նշեց, որ այդ մասով երկու հայտարարություն են արել:

«Մենք թե՛ դրական և թե՛ բացասական գործոններ ենք նշել: Միևնույն ժամանակ, որպես առաջնահերթություն, նշել ենք սեղմ ժամկետներում Արցախի Հանրապետության հավաքների ազատության մասին օրենքի ընդունումը: Կարող ենք գոհունակությամբ արձանագրել, որ ԱԺ–ում արդեն շրջանառության մեջ է դրվել նախագիծը: Մենք էլ ենք ստացել այն: Կարծում եմ` այս ոլորտն օրենսդրական (ԱԺ–ի կողմից օրենքի ընդունման) մակարդակով իսկապես կանոնակարգման կարիք ունի` հաշվի առնելով, որ այստեղ բազմաթիվ իրավաչափ շահեր են բախվում: Այդ բոլորը պետք է ընդունված միջազգային ստանդարտներին համապատասխան պաշտպանություն ստանան»,–եզրափակեց նա:

Շարունակությունը՝ «Փաստ» օրաթերթի այսօրվա համարում