Ընդդիմադիր պայքար մղելու թեզը կամ՝ «թեժ աշունն» անցյալում է. «Փաստ»

«Փաստ» օրաթերթը գրում է.

Այս փուլում քաղաքական կուսակցությունների վերաֆորմատավորման գործընթաց է սկսվել: Խոսելով քաղաքական ուժերի վերադասավորման մասին` «Փաստ»–ի հետ զրույցում նման տեսակետ հայտնեց քաղաքագետ Էդգար Վարդանյանը:

Բացելով ասվածի չակերտները` քաղաքագետն ընդգծեց. «Քաղաքական կուսակցությունները պետք է փորձեն դառնալ իրական կուսակցություններ, և ժամանակի պահանջներին համապատասխան բովանդակություն ձեռք բերեն: Երևույթը, այո, սկսվել է, բայց երևացող չէ: Մյուս կողմից` այն քաղաքական ուժերը, որոնք տարիներ շարունակ ձևավորված են եղել մեկ անձի շուրջ, կամաց–կամաց քաղաքական դաշտից պետք է դուրս գան»:

Նրա խոսքով` «Քաղաքացիական պայմանագիր» կուսակցությունը մեծանում է ու ընտրություններից հետո հավակնում է իշխող քաղաքական ուժ դառնալ. «Ամենայն հավանականությամբ, ՔՊ–ն ավելի լայն թիմով հանդես կգա` ՔՊ անդամ չհանդիսացող ակտիվիստներ էլ կներգրավվեն նախընտրական ցուցակում: Իսկ ՀՀԿ–ն փորձելու է դիստանցիա պահել այն մարդկանցից, որոնց անունը հասարակությունը լայն կոռուպցիոն սկանդալների հետ է կապում: Կփորձեն ցույց տալ, որ ինքնամաքրման ճանապարհով են գնում, որ վերանայում են մոտեցումները, ընդունում սխալները: ՀՀԿ–ն նման քարոզչական արշավ արդեն իսկ նախաձեռնել է, բայց, ըստ իս, այդ կուսակցությունն իր դարն ապրել է. որքան էլ փորձի հայտարարել, թե այլ կուսակցություն է, հասարակությունը լավ է հասկանում, որ ՀՀԿ–ի քաղաքականության արդյունքում էր Հայաստանը հայտնվել սոցիալ–տնտեսական վատ իրավիճակում, որ ՀՀԿ–ի պատճառով երկրում օրենք չէր գործում: Կարելի է ասել, որ այսօր կուսակցությունը, որպես այդպիսին, չի գործում: Միայն խմբակցությունն է, որը կա Ազգային ժողովում: Ըստ իս` ՀՀԿ–ն նույնիսկ չի կարողանալու հաղթահարել 5 տոկոսի շեմը»:

Ինչ վերաբերում է հնարավոր «թեժ աշնանը», քաղաքագետը նախ շեշտեց, որ այդ տերմինը կապվում է նախկին ռեժիմի հետ և չի արտացոլում ներկայիս իրողությունները:

««Թեժ աշունն» առաջ էր մղում կարճ ժամանակահատվածում վճռական և ակտիվ ընդդիմադիր պայքար մղելու թեզը: Այն պայմանավորված էր նրանով, որ իշխանություններն էվոլյուցիոն ճանապարհով հարցերը լուծելու որևէ հնարավորություն չէին տալիս: Եվ հանրությունը հույսը ստիպված փողոցային պայքարի վրա էր դնում` առաջարկելով կտրուկ օրակարգ: Այն կրում էր ժամանակավոր բնույթ, շատ առումներով հանրությունը հուսախաբ էր լինում, որովհետև այդպես էլ արդյունքի չէր հասնում: Մենք պետք է որ արդեն հեռանանք այդ տերմինից: Հիմա այդ թեժությունը չի լինելու, որովհետև կա լեգիտիմ իշխանություն: Առաջիկայում կարող ենք ակնկալել ակտիվ ընտրապայքար: Հաշվի առնելով, որ ընտրություններից առաջ ներկայիս վարչապետը հրաժարական կներկայացնի, այդ ակտիվ ընտրապայքարի ընթացքում Նիկոլ Փաշինյանին նաև իր նախկին դերում կտեսնենք, երբ նա փողոցային պայքար էր մղում: Նա շատ ավելի ակտիվ աշխատանք կտանի հանրության հետ: Հանդես կգա հեղափոխության շարժման առաջնորդի կարգավիճակով, ով հաջողել է վարչապետի պաշտոնում, իսկ հիմա հավակնում է երկարաժամկետ ստանձնել երկրի կառավարման ղեկը: Բնականաբար, այդ ժամանակ ևս հանրությանը կոնսոլիդացնելու փորձ է արվելու: Թավշյա հեղափոխությունն իրականացել է, բայց դեռ չի ավարտվել: Իսկ այն ավարտին հասցնելու, հեղափոխության երկրորդ փուլն իրականացնելու համար անհրաժեշտ է, որ արդար և ազատ ընտրությունների ընթացքում բացարձակ մեծամասնություն ստանա այն ուժը, որը եղել է հեղափոխական շարժման հիմքում»,–ասաց քաղաքագետը:

Անդրադառնալով ԱԱԾ–ի բացահայտումներին ու այս տեսակետից «թեժ ամռան» հավանականությանը` ԷդգարՎարդանյանը նշեց, որ բացահայտումներն աղմկահարույց էին և վերաբերում էին նախկին ռեժիմի հիմնական խաղացողներին. «Նման գործելակերպը ոգևորիչ է հանրության համար: Տեսնում են, որ կա իրական պայքար: Բայց այդ պայքարը պետք է շարունակական լինի, եթե չլինի` հանրությունը դա չի ընկալի: Հանրությունն է պահանջում, որ շարունակվի: Տենդենցն իսկապես կա, ուղղակի քաղաքացիական հասարակությունը, քաղաքացիները և լրատվամիջոցները պետք է «ձեռքը պուլսի վրա» պահեն: Պետք է իրական վերահսկողություն սահմանեն, որ մի կողմից կոռուպցիայի դեմ պայքարը չթուլանա, մյուս կողմից էլ` շարունակական բնույթ կրի»:

Շարունակությունը՝ «Փաստ» օրաթերթի այսօրվա համարում