Դեմոյանը ոչ մի պաշտոն չունի Հայոց ցեղասպանության թանգարանում. նախարարը հակադարձում է Հայկ Դեմոյանի մեղադրանքներին

Հայոց ցեղասպանության թանգարան ինստիտուտի գիտխորհրդի անդամ Հայկ Դեմոյանը ՀՀ կրթության և գիտության նախարար Արայիկ Հարությունյանին մեղադրել է իր բացակայության ընթացքում իր աշխատասենյակ ներխուժելու մեջ:  ՀՀ կրթության և գիտության նախարարը  իր հերթին պնդում է, որ Հայկ Դեմոյանը Հայոց ցեղասպանության թանգարան ինստիտուտում որևէ պաշտոն չունի, և դա նրա աշխատասենյակը չէ:

Հայկ Դեմոյանը նաև նշել էր, որ Արայիկ Հարությունյանի հետ եղել է իր տեղակալ Հովհաննես Հովհաննիսյանը, ովքեր բացի աշխատասենյակ ներխուժելը, Հայոց ցեղասպանության թանգարան ինստիտուտի  աշխատակիցների մոտ նաև լուրեր են տարածել, թե Դեմոյանի մուտքն այսուհետ արգելված է այդ վարչական շենք:

Լրագրողների հետ զրույցում, ՀՀ ԿԳ նախարարն այս ամենին ի պատասխան, նշեց, որ դեռևս 2017 թվականի դեկտեմբեր ամսին որոշում է կայացվել, որ ՀՑԹԻ-ի ՊՈԱԿ-ը դառնում է հիմնադրամ: Հարությունյանն ընդգծեց, որ Հայկ Դեմոյանն արդեն տևական ժամանակ է ոչ մի պաշտոն չունի Հայոց ցեղասպանության թանգարան իսնտիտուտում և անօրինական է նրա այնտեղ գտնվելը: Հարցին, թե կա՞ն արդյոք իրավական խնդիրներ Դեմոյանի՝ աշխատանքից ազատման հետ կապված, նախարարն ընդգծեց, որ ՊՈԱԿ-ից հիմնադրամ դառնալուց հետո  Հայոց ցեղասպանության թանգարան ինստիտուտի ղեկավար կարող է նշանակել կառավարությունը:

«Այդ ամենի արդյունքում հիմնադրամի տնօրենի պաշտոնակատար է նշանակվել Գևորգ Վարդանյանը: Նա, իհարկե, հրաժարականի դիմում է ներկայացրել և չի եկել աշխատանքի, բայց սա մեկ այլ խնդիր է, ինչի վերաբերյալ նույնպես ես այսօր արդեն դիմելու եմ իրավապահներին: Վարդանյանի հետ մենք խոսել ենք, և նա նշել է, որ իր վրա ճնշումներ է գործադրել Հայկ Դեմոյանը՝ հրաժարական ներկայացնելու համար»,- ասաց Հարությունյանը:

Նա նկատեց, որ անցյալ տարվա սեպտեմբեր ամսին Հայկ Դեմոյանը մեկնել է Հայաստանից և սկզբում կառույցի ղեկավարի պաշտոնակատար է նշանակվել Սուրեն Մանուկյանը, այնուհետև 2018 թվականի հունիս ամսին Դեմոյանը վերադարձել է և զավթել է տնօրենի սենյակը: Երեկ ես նաև տեղեկացա, որ նա տիրացել է տնօրենի մեքենային: Այն ժամանակ, մենք, հաշվի առնելով, որ դա թանգարան-ինստիտուտ է, և, որպեսզի ավելորդ աղմուկ չլինի այդ կառույցի շուրջ՝ Հայկ Դեմոյանին պարզապես զգուշացրել ենք, որ այն ինչ նա անում է,  հակաօրինական է: Նախարարությունն ու իշխանությունը բոլոր իրավունքներն ունեն դիմելու իրավապահներին, որպեսզի հակաիրավական գործողություններին վերջ տրվի»,- ընդգծեց նախարարը:

Նա շեշտեց, որ ինքը, լինելով կրթության և գիտության նախարար, կարող է և իրավունք ունի գնալու ցանկացած վայր, որի հիմնադիրն է պետությունն ու իրենց գերատեսչությունը: Հարությունյանը, հունիսի 26-ին գնալով ՀՑԹԻ,  հադիպել է կառույցի փոխտնօրեններին  ու խոսել իրենց մոտ առկա խնդիրների մասին:

«Հայկ Դեմոյանը իր «Ֆեյսբուքի էջում նաև գրել էր, որ իրենց կառույցում կան բազմաթիվ խնդիրներ: Ես խոսել եմ թանգարան-ինստիտուտի բոլոր փոխտնօրենների հետ, և ոչ ոք չի բողոքել ոչ մի խնդրից: Բացի այս ամենը, մենք երեկ հավաքել ենք նաև անձնակազմին և նույն հարցը ուղղել նաև նրանց ու կրկին ոչ մի խնդրի մասին չի խոսվել: Հաշվապահն է ասել, որ փոխանցումների հետ կապված խնդիր կա, և մենք ասել ենք, որ առաջիկա օրերին այդ հարցը լուծում կստանա: Այն ապոկալիպտիկ իրավիճակը, որ ներկայացվել է ՀՑԹԻ-ի շուրջ՝ չի համապատասխանում իրականությանը»,-նշեց Հարությունյանը:

ՀՀ ԿԳ նախարարն ասաց, որ Դեմոյանը փորձում է այդ ամեն ինչից շոուներ սարքել, սակայն իր մոտ ոչինչ չի ստացվի: Հարցին, թե ինչու մինչ այսօր իրենք չեն հանդիպել Հայկ Դեմոյանի հետ, քանի որ նա բազմիցս դիմել է այդ հարցով՝ նախարարն ընդգծեց, որ այդ անձնավորության հետ իրենք խոսելու ոչինչ չունեն:

Կրթության և գիտության նախարարությունը որոշել է, որ առաջիկայում կլինի հոգաբարձուների խորհրդի  նիստ, որի ժամանակ էլ կորոշվի ՀՑԹԻ-ի տնօրենի ընտրման օրը, և հենց այդ ժամանակ էլ կընտրվի ղեկավարը: Մոտ 30 օրվա ընթացքում ցանկացողները կարող են դիմել ՀՑԹԻ-ի տնօրեն նշանակվելու համար: