Պիպոյին հանեք բերդից. թող կաթողիկոսը մնա հաջորդ դասին, էսօր Պիպոյի հերթն է. միջադեպ Էջմիածնում

 

Էջմիածնում Գարեգին Բ Ամենայն հայոց կաթողիկոսի հրաժարականի պահանջով բողոքի ակցիայի սկզբում միջադեպ գրանցվեց:

 

Մի մարդ մեքենայով մոտեցավ, իջավ ու սկսեց բարձր բղավել. «Պիպոյին բերդից հանեք, միայն Պիպոյին: Թող կաթողիկոսը մնա հաջորդ դասին, էսօր Պիպոյի հերթն է, Պիպոյին ենք հանում բերդից: Սաղդ, ժողովուրդ ջան, Պիպոյի համար»: Սա ասելուց հետո նա հեռացավ մեքենայով:

 

Ներկաներից մի կին էլ շարունակեց. «Մենք բոլորս Պիպոյի կողմից ենք, չենք թողի նեղը մնա: Մենք չենք թողնի մեր ախպերը մնա անտեր: Հերթով»:

 

Մի տարեց տղամարդ էլ, որը կարծես սթափ չէր, սկզբում ասաց. «Պիպոն ի՞նչ է արել Էջմիածնի համար», բայց քիչ անց միտքը փոխեց ու հայտարարեց. «Պիպոն հայ ազգի ամենալավ մարդն ա, ինքը լավ տղա ա»:

 

Հիշեցնենք՝ Արթուր Ասատրյանին մեղադրանք է առաջադրվել ՀՀ քրեական օրենսգրքի 131-րդ հոդվածի 1-ին, 2-րդ, 3-րդ եւ 6-րդ կետերով («Մի խումբ անձանց կողմից նախնական համաձայնությամբ, առողջության համար վտանգավոր բռնություն գործադրելով, զենքի կամ որպես զենք օգտագործվող առարկաների գործադրմամբ, երեք անձի առևանգումը») և 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու համար:

 

Նա 2 ամսով կալանավորվել է: