Գավառի պետական համալսարանը ավարտական վկայականներ շնորհեց 342 շրջանավարտի

Գավառի պետական համալսարանում ՀՀ Սահմանադրության օրը հանդիսավոր պայմաններում ավարտական վկայականներ ստացան 342 շրջանավարտներ:

«Արմենպրես»-ի տեղեկացմամբ՝ ավարտական վկայականների հանձնման արարողությանը մասնակցում էին ՀՀ ԿԳ նախարար Արայիկ Հարությունյանը, Գեղարքունիքի մարզպետ Իշխան Սաղաթելյանը, Գեղարքունյաց թեմի առաջնորդական տեղապահ Կիրակոս վարդապետ Դավթյանը, Գավառի պետական համալսարանի խորհրդի նախագահ Հրանուշ Հակոբյանը, ԳՊՀ ռեկտոր Ռուզաննա Հակոբյանը, համալսարանի պրոֆեսորադասախոսական անձնակազմը, շրջանավարտները եւ նրանց ծնողները:

Օրհնության կարգ կատարեց Գեղարքունյաց թեմի առաջնորդական տեղապահ Կիրակոս վարդապետ Դավթյանը: Բացման խոսքով հանդես եկավ ԳՊՀ ռեկտոր Ռուզաննա Հակոբյանը:«Այսօր կրկնակի տոն է մեր հաստատության ուսանողների համար: Ավանդույթի ուժով մենք ամեն տարվա հուլիսի 5-ին՝ ՀՀ Սահմանադրության օրը, ավարտական վկայականներ ենք շնորհում մեր շրջանավարտներին: Դա անում ենք հատուկ այն նպատակով, որ մեր շրջանավարտների մոտ տպավորվի այդ օրը, որպեսզի նրանք իրենց զգան քաղաքացիական հասարակության լիարժեք անդամ, նույնիսկ հիշեն, թե ինչ նշանավոր մարդկանց ձեռքից են ստացելվկայականները:

Մեր բուհը հիմա 22 միջազգային կրթական ծրագրերի անդամ է, տարիների ճանապարհ անցած նշանավոր հաստատություն: Այսօր մենք կյանք ենք ճանապարհում մեր 25 տարեկան համալսարանի 21-րդ տարվա շրջանավարտներին, ովքեր գնում են՝ համալրելու մեր ավելի քան 7 հազար շրջանավարտների շարքերը: Բարի ճանապարհ եմ մաղթում մեր վաղվա մասնագետներին ու զինվորներին, ովքեր օրեր անց համալրելու են հայոց բանակի շարքերը»,-ներկաներին դիմեց Ռուզաննա Հակոբյանը:

Իրավաբանական ֆակուլտետի մագիստրատուրայի շրջանավարտներին դիպլոմներ հանձնելու պատիվը տրվեց ՀՀ ԿԳ նախարար Արայիկ Հարությունյանին:«Շատ կարեւոր է, որ մասնագետը կրթվի ամեն օր, միշտ մտածի իր գիտելիքները հարստացնելու մասին: Համոզված եմ, որ դուք եւս, հրաժեշտ տալով այս բուհին ու գնալով մասնագիտական աշխատանքի, ամեն օր կհարստացնեք ձեր գիտելիքները՝ չբավարարվելով այս ավարտական վկայականներով, եւ կդառնաք նոր Հայաստան կերտող արժանի քաղաքացիներ»,-շրջանավարտներին դիմեց Արայիկ Հարությունյանը: Բնագիտական, հումանիտար եւ տնտեսագիտական ֆակուլտետների շրջանավարտներին դիպլոմներ հանձնելու պատիվը տրվեց Գեղարքունիքի մարզպետ Իշխան Սաղաթելյանին:

«Գավառի պետական համալսարանն իր գոյության ընթացքում մեծ դեր է խաղացել մեր մարզի կրթության, գիտության ու տնտեսության զարգացման գործում: Շնորհավորում եմ բոլորիս այս գեղեցիկ տոնի առթիվ»,-նշեց Գեղարքունիքի մարզպետը: Գավառի պետական համալսարանի պատվոգրով պարգևատրվեցին Հայաստանի Հանրապետության հարյուրամյա տարեդարձին նվիրված ստեղծագործական մրցույթներում հաղթած շրջանավարտներ՝ Ատոմ Հակոբյանը, Նելլի Բրագինան և Սիրուշ Սարգսյանը: