Գագիկ Ծառուկյանի միջոցներով կհիմնանորոգվի Մաքրավանք եկեղեցին. «Փաստ»

«Փաստ» օրաթերթը գրում է.

Հայաստանի ազգային օլիմպիական կոմիտեի նախագահ Գագիկ Ծառուկյանի անմիջական միջոցներով շուտով կհիմնանորոգվի Կոտայքի մարզի Մաքրավանք եկեղեցին: 9– րդ դարում կառուցված վանքը վթարային լինելու պատճառով ավելի քան 70 տարի է՝ չի գործում:

Հրազդանցիներն ու Հայ առաքելական եկեղեցու Կոտայքի թեմի առաջնորդ Առաքել արքեպիսկոպոս սրբազանը մինչ այս բազմաթիվ բարերարների են դիմել, բայց խնդիրն այդպես էլ լուծում չի ստացել: Հրազդան կատարած այցի ժամանակ Կոտայքի թեմի առաջնորդն ու կոտայքցիները եկեղեցին հիմնանորոգելու խնդրանքով դիմեցին Գագիկ Ծառուկյանին, և պատասխանը չուշացավ:

«Եկեղեցին պետք է հիմնանորոգվի, որովհետև աղոթատեղի չկա: Հիմա գնում ենք տեղում ծանոթանանք իրավիճակին, և խոսք եմ տալիս Հրազդանի ժողովրդին, որ մինչև տարվա վերջ այդ եկեղեցին կգործի, որպեսզի հրազդանցիները կարողանան իրենց աղոթքն ուղղեն առ Աստված: Առանց Աստծո ու առանց հավատքի ոչինչ էլ չի կարող լինել: Հավատքը մարդուն ոգևորում է, հույս է տալիս, պահպանում է: Եվ փառք Տիրոջը, որ բոլորս լույս աշխարհ ենք եկել և այսօր էլ հնարավորություն ունենք բարիք ստեղծել և փառք տալ Աստծուն ամեն ինչի համար»,– ասաց Գ. Ծառուկյանը:

Նա առանց եկեղեցու վիճակին ծանոթանալու էր խոստացել օգնել հրազդանցիներին: Իր հերթին Առաքել արքեպիսկոպոս սրբազանը շնորհակալություն հայտնեց Գ. Ծառուկյանին և նշեց, որ այն իր ճարտարապետական կառուցվածքով և լուծումներով յուրահատուկ կառույց է, որը երկար տարիներ է խոնարհված եղել:

Կոտայքի մարզի բնակիչներն էլ նշեցին, որ մինչ այս աղոթելու համար ստիպված են եղել այլ եկեղեցիներ գնալ, բայց շուտով այլևս այդպես չի լինի:

«Հայ ժողովուրդը երախտապարտ է Գագիկ Ծառուկյանին: Սա նրա հերթական բարեգործությունն է, և լավ կլիներ, որ նրա նման սրտացավ առնվազն 10 անձնավորություն ևս ունենայինք, ովքեր ժողովրդի և մարդկանց հոգսերի մասին այդքան մտածեին: Գագիկ Ծառուկյանը մարդկային վեհ գաղափարները ծառայեցնում է մարդկանց օգտակար լինելու համար, որի համար ես շատ շնորհակալ եմ նրանից»,– ասաց բնակչուհիներից մեկը:

Հանդիպման մեկ այլ մասնակից էլ նշեց, որ իրենք 1988–ից եկեղեցին վերանորոգելու հարցով դիմել են տարբեր ատյաններին, սակայն հարցն այդպես էլ չի լուծվել, իսկ Հուշարձանների պաշտպանության կոմիտեն անվերջ անտեսել է խնդրանքը: 

«Ոնց որ մեզ ասեին՝ ռադներդ քաշեք գնացեք այստեղից: Եկան, վարագույրն էլ գողացան, տարան, խաչքարերը տարան Լուվր, դրան ի՞նչ գնահատական կարելի է տալ: Սա առաջին դեպքն է, որ մեր գյուղը ուշադրության կենտրոնում է և հույս ունենք, որ այն սրանից հետո կծաղկի»:

Հանդիպման մասնակիցները նշում էին նաև, որ գիտեն՝ Գագիկ Ծառուկյանի խոսքը գործ է, և հավատում են նրա խոսքերին: Իսկ օրն իրենց համար տոնական էր, քանի որ Ծառուկյանն իր ոտքով է գնացել Մաքրավան գյուղ, տեսել եկեղեցու վիճակը: Մաքրավանցիները վստահ էին, որ Գագիկ Ծառուկյանի շնորհիվ շատ շուտով Մաքրավանքում կղողանջեն զանգերն ու երկար դադարից հետո վերջապես այդ վանքում էլ կմատուցվի պատարագ, որը կդառնա հավատացյալների համար մի նոր աղոթատեղի:

Շարունակությունը՝ «Փաստ» օրաթերթի այսօրվա համարում