Նախարարությունից ասում են «Ադյուրետին» կա, բայց հիվանդներն ասում են՝ չկա. «Փաստ»

«Փաստ» օրաթերթը գրում է.

Քաղաքացին «Փաստ» օրաթերթին ահազանգել էր, որ ոչ շաքարային դիաբետ ունեցող հիվանդներին տրամադրվող «Ադյուրետին» դեղամիջոցն այս ամիս իրենց պոլիկլինիկայում չեն տրամադրել, քանի որ երկրորդ եռամսյակը փակելու պատճառով նոր խմբաքանակը դեռ չեն ստացել: Ահազանգի հետքերով «Փաստը» դիմեց ՀՀ առողջապահության նախարարությանը:

«Ադյուրետին» դեղի ազդող նյութը հանդիսանում է սեսմոպրեստինը, որը առողջապահության նախարարության կողմից գնվել է և եռամսյակային կտրվածքով, առանց խափանման տրամադրվել է հիվանդներին, մեզ հետ զրույցում ասաց առողջապահության նախարարության աշխատակազմի դեղորայքային քաղաքականության և տեխնոլոգիաների վարչության բաժնի պետ Մարինե Հարությունյանը:

«Այս պահին բոլոր բուժհաստատություններում այն առկա է և բոլոր հիվանդները ապահովված են այդ դեղամիջոցով: Նաև Երևան քաղաքի էնդոկրին դիսպանսերում կա դեղամիջոցի հավել յալ քանակ: Եվ եթե որևէ բուժհաստատությունում հիվանդներ են ավելանում և եղածը չի բավարարում պահանջվող քանակին, ապա բուժհաստատությունները կարող են դիմել էնդոկրին դիսպանսերին, որտեղ հավելյալ քանակ լինում է»,– հավելեց նա:

Առողջապահության նախարարությունը կոչ է անում դիմել իրենց, եթե որևէ բուժհաստատություն ինչ–ինչ պատճառներով չի տրամադրի դեղը:

Հավելենք, որ վերոնշյալ նյութը պարունակող տարբեր դեղեր կան, այդ թվում՝ վրացական: Հիվանդներն ասում են, որ ամենաարդյունավետ ազդողը հենց «Ադյուրետինն» է, այլ ոչ փոխարինողները: