Հեղափոխական նարցիսիզմ. «Փաստ»

«Փաստ» օրաթերթը գրում է.

Հայաստանի պատմության թանգարանում կբացվի թավշյա հեղափոխության նմուշների ցուցասրահ: Սա բոլորովին էլ կատակ չէ, այլ նախարարի հանձնարարական: Թե ինչ է այնտեղ ցուցադրվելու` դժվար է ասել: Եվ ընդհանրապես, արդյո՞ք Հայաստանում տեղի ունեցածը հեղափոխությո՞ւն էր, թե՞ առայժմ միայն իշխանափոխություն: Եթե անգամ հեղափոխություն էր, ապա այն առնվազն դեռ չի ավարտվել և մինչև ցուցասրահ ու ցուցադրություններ բացելը, գուցե ավելի նպատակահարմար է ավարտին հասցնել հեղափոխությունը:

Այլապես մենք արդեն ականատես ենք դառնում անհասկանալի ֆետիշացման, այլ գնահատական դժվար է տալ, որովհետև կարծես թե մեր մշակույթում ավարտվել էին բոլոր խնդիրները և հրատապություն էր ստացել հեղափոխության ցուցասրահ ունենալը: Չէ, այդպես լավ չէ, կարելի է միանգամից թանգարան բացել կամ էլ, ասենք թե, Հայաստանի պատմության թանգարանը անվանակոչել թավշյա հեղափոխության պատմության թանգարան, ավելի հնչեղ կլինի: Սա առնվազն անհասկանալի է, որովհետև մենք մինչ օրս չունենք Ղարաբաղյան շարժման ու պատերազմի թանգարան կամ գոնե ցուցասրահ, բայց արի ու տես, որ շատ արագ պետք է ունենալ թավշյա հեղափոխության ցուցասրահ: Ի դեպ, հետաքրքիր է՝ ո՞ր ցուցանմուշների հաշվին պետք է բացվի հեղափոխության սրահը, պատմության թանգարանում կարծես թե ցուցանմուշների ցուցադրության տեղի խնդիր կար, էլ չասած, որ թանգարանում ցուցադրվում են ցուցանմուշների ֆոնդի 10–15 տոկոսը:

Սա էլ մի կողմ, նման հրատապությամբ ձեռնարկել շատ կասկածելի մի բան` հեղափոխության ցուցասրահի տեսքով, արդյոք միայն անփորձությո՞ւն է, հեղափոխական նարցիսի՞զմ, թե՞ ինչ–որ այլ բան: Ի վերջո, հեղափոխությունները այդպիսին են դառնում իրենց ռեալ ու դրական արդյունքներով. այսօր այդ արդյունքները չկան, շատ նորմալ է, որ չկան, որովհետև մեկ–երկու ամսում հեղափոխությունները չեն կարող արդյունք տալ, նույնիսկ մեկ– երկու տարում: Բայց դե, 5 օրում կարելի է հեղափոխության ցուցասրահ բացել` ցուցադրել մարզակոշիկներ, ուսապարկեր, հակաքրտինքային դեզոդորանտներ և այլն: Ի դեպ, սկզբունքորեն կարելի է նույնիսկ պատմության թանգարանին հանձնել ապրիլ–մայիսյան իրադարձությունների որոշակի խորհրդանշական դետալներ` որպես նմուշ, եթե այդքան կարևոր էր հեղափոխության ներկայացվածությունը թանգարանում, բայց ցուցասրա՞հ, վստա՞հ եք:

Շարունակությունը՝ «Փաստ» օրաթերթի այսօրվա համարում