Անառողջ խոսակցություններ բուժհաստատության շուրջ. Ասեկոսեներ տարածողները հստակ միտում ունեն

«Դավիդյանց» լաբորատորիայի տնօրեն, բժշկական գիտությունների թեկնածու Աշոտ Դավիդյանցի անվան շուրջ ծավալվող խոսակցությունները, պարզվում է, արդեն դուրս են եկել իրենց սահմաններից: Ավելին, դրանք նույնիսկ դարձել են սոցիալական ցանցերում քննարկվող թեմա:

Խնդիրն այն է, որ ասեկոսեներ կան, թե իբր Ա. Դավիդյանցը ցանկանում է դառնալ «Սուրբ Գրիգոր լուսավորիչ» բժշկական կենտրոնի տնօրեն: Դրանք այնքան լուրջ են թվացել, որ նույիսկ բուժհաստատության աշխատակիցները հայտարարություն են տարածել, որով իրենց լիակատար աջակցությունն են հայտնում կենտրոնի տնօրեն Արա Մինասյանին և կոչ են անում առողջապահության նախարար Արսեն Թորոսյանին զերծ պահել համակարգը հնարավոր ցնցումներից:

Հարցի մասին պարզաբանում ստանալու համար Past.am-ը զրուցեց Ա. Դավիթյանցի հետ, ճշտելու համար, թե որքանով են հավաստի իրեն, այդ հաստատությունում որպես գլխավոր բժիշկ նշանակելու խոսակցությունները:

«Իմ անձի շուրջ ասեկոսեներ են պտտվում, թե իբր ես ցանկանում եմ դառնալ այդ բուժհաստատության տնօրենը: Ես ուզում եմ հայտարարել, որ դրանք ինձ վատը ցանկացողների կողմից են տարածվում, որոնք նպատակ ունեն իմ վարկանիշը վտանգել: Ես ուզում եմ նշել, որ չնայած բավականին լավ հարաբերություններ ունեմ առողջապահության ներկայիս նախարար Արսեն Թորոսյանի հետ, բայց հայտարարում եմ, որ ես նրա կողմից որևէ նման առաջարկ չեմ ստացել:

Ինձ ուզում են վարկաբեկել նաև Արա Մինասյանի մոտ, ում հետ ես կրկին ունեմ շատ լավ հարաբերություններ և ում հանդեպ ես նույնպես մեծագույն հարգանքով եմ վերաբերվում: Մի խոսքով, ինձ փորձում են երկկողմանի հարվածել. նպատակ ունեն փչացնել իմ և իմ կողմից շատ հարգված այդ անձանց հարաբերությունները: Նորից եմ կրկնում, այդ ասեկոսեները տարածում են ինձ վատը ցանկացողները, որը, սակայն, իրականում որևէ հիմք չունի: Նման բան չկա ու չի կարող լինել: Դա ես ամենայն լրջությամբ եմ հայտարարում»,- ասաց Ա. Դավիդյանցը: 

Ստացվում է, որ ասեկոսեի ուժն այնքան հզոր է եղել, որ նույնիսկ ալեկոծել է բուժհաստատության ողջ անձնակազմի անդորրը, որի պատճառով էլ վերջինները ստիպված են եղել հայտարարություն տարածել, որով հորդորում են առողջապահության նախարարին զերծ պահել իրենց նման անցանկալի ցնցումներից:

Արմինե Գրիգորյան