Աղիքային հիվանդությունների՝ ջրային գործոնով պայմանավորված լինելը բացառվում է. «Փաստ»

«Փաստ» օրաթերթը գրում է.

Վերջին օրերին հանրապետությունում ակտիվացել են աղիքային հիվանդության բռնկումները: Այդ մասին ահազանգում են թե՛ աղիքային հիվանդությամբ բժշկական կենտրոններում հայտնված երեխաների ծնողները, թե՛ այս օրերին հիվանդանոցներ այցելող քաղաքացիներ: 

Հիվանդությունների աճի մասին զգուշացնում է նաև Առողջապահության նախարարությունը՝ հորդորելով հատկապես մանկահասակ երեխաների ծնողներին ավելի զգոն լինել՝ խուսափելու համար երեխաների վարակման վտանգից:

Նորքի ինֆեկցիոն կլինիկական հիվանդանոցի տնօրենի ժամանակավոր պաշտոնակատար Էդուարդ Զարդարյանը «Փաստ»–ի հետ զրույցում նշեց, որ, ըստ էության, իրենց հիվանդանոցում հիվանդների թվի աճ չկա, սովորական աշխատանքային ծանրաբեռնվածություն է: «Իհարկե, փետրվար ամսվա համեմատությամբ աճել է, բայց մայիս–հունիս ամիսների համեմատությամբ փոփոխություն չկա»,– նշեց Զարդարյանը:

Հարցին, թե ո՞րն է այս շրջանում բռնկված հիվանդությունների պատճառը, նկատեց, որ իրենք պատճառագիտությամբ չեն զբաղվում, հիվանդությունն են բուժում:

«Արաբկիր» բժշկական համալիրից էլ հրաժարվեցին հարցի շուրջ որևէ մեկնաբանություն տալ՝ նշելով, թե նման տեղեկատվություն առհասարակ չեն տրամադրում:

Առողջապահության նախարարության հիվանդությունների վերահսկման և կանխարգելման ազգային կենտրոնի վարակիչ հիվանդությունների համաճարակաբանության բաժնի պետ Լիանա Թորոսյանը մեզ հետ զրույցում նշեց, որ ամառային տաք ժամանակահատվածը նպաստավոր  է աղիքային հիվանդությունների համար, ինչին ականատես ենք լինում սկսած հունիսի երկրորդ կեսից:

«Այն ակտիվությունը, որն արձանագրվում է՝ պայմանավորված վարակիչ հիվանդություններով, օրինաչափ է: Յուրաքանչյուր տարի այս սեզոնին դիտվում է աղիքային վարակների ակտիվություն, սակայն այս տարվա առանձնահատկությունն այն է, որ հունիսին դիզենտերիա հիվանդության հետ գործ ունեցանք, որի հարուցիչը շիգելա զոնն է: Սա փաստում էր սննդային գործոնով պայմանավորված աղիքային վարակների մասին: 

Մշտադիտարկումները շարունակվում են ինչպես օրական կտրվածքով, այնպես էլ լաբորատոր հետազոտությունների արդյունքներով: Վերջին 20 օրերի ընթացքում իրականացված հետազոտությունները վկայում են, որ էնտերովիրուսների ակտիվություն  է նկատվում, ինչի մասին առողջապահության նախարարությունը բարձրաձայնել էր և զգոնության կոչ արել ազգաբնակչությանը, մանավանդ՝ ծնողներին, քանի որ այդ հիվանդության դեպքերի մեծամասնությունը՝ 80– 90%–ը, արձանագրվում է մանկահասակ երեխաների շրջանում»,– նշեց նա:

Աղիքային վիրուսները բավական լավ հարմարվողականություն ունեն շոգ եղանակին, նրանք երկար ժամանակ պահպանվում են շրջակա միջավայրում: Առողջապահության նախարարությունը հորդորում է ծնողներին՝ երեխաների լողը կազմակերպել այնպիսի վայրերում, որտեղ այն թույլատրված է, իսկ դեկորատիվ լողավազաններում՝ բացառել:

Իրականացված լաբորատոր հետազոտությունների 18%–ը կազմում են էնտերովիրուսները: Միաժամանակ, մեկ շաբաթվա կտրվածքով կատարված դիտարկումները ցույց են տալիս, որ այս պահին ո՛չ ակտիվություն, ո՛չ նվազում չի դիտվում, այսինքն՝ տեղի է ունենում իրավիճակի կայունացում: Թորոսյանի խոսքով, դա օրինաչափ է, քանի որ մինչև սեպտեմբեր կգտնվենք աղիքային վարակների՝ «նպաստավոր» սեզոնային ժամաակահատվածում: 

Հարցին, թե հնարավո՞ր է աղիքային վարակների պատճառը ջուրը լինել, պատասխանեց, որ ջրային գործոն լինելու դեպքում կարճ ժամանակահատվածում մեկ բնակավայրից տասնյակ հիվանդների գրանցում կլիներ: 

 

«Չունենք հիվանդների կուտակումներ մեկ փողոցով, մեկ շենքով կամ մեկ ավանով: Դեպքերը սփռված են, ինչը բացառում է ջրային գործոնը: Չի՛ կարելի ջրային գործոնը որպես այս իրավիճակի մեղավոր դիտարկել: Սա բացատրվում է համաճարակաբանության օրինաչափությունների, դիտարկումների առանձնահատկությունների հիման վրա»,– նշեց նա:

Եթե այս տարի աշխուժացել է էնտերովիրուսային հիվանդությունների աճը, ապա նախորդ տարի կոկսակի վիրուսներն էին ավելի շատ գլուխ բարձրացրել: 2014 թ. էնտերովիրուսները պատճառ դարձան մինինգիտների թվի ավելացման համար: Էնտերովիրուսներն ունեն տարբեր ձևեր, տարբեր կլինիկական արտահայտումներով են ի հայտ գալիս: Թորոսյանի խոսքով, դրանց ակտիվացում է դիտվում նաև Ռուսաստանում: 

Ստացվում է, որ վարակվելու պատճառը բնավ ջուրը չէ, այլ սեփական հիգիենային, սննդին չհետևելու արդյունքը: Ըստ նախարարության՝ աղիքային հիվանդությամբ վարակվելու ռիսկերը մեծանում են կեղտոտ ձեռքերով սննդից օգտվելիս, աչքերին, քթին կամ դեմքին ձեռք տալիս, հում, չստուգված ջուր խմելու դեպքում կամ այդ ջրից պատրաստված սառույցն օգտագործելիս, փողոցային առևտրի կետերից գնված սննդամթերք և խմիչք օգտագործելիս, ջերմամշակման չենթարկված սնունդ օգտագործելիս, երեխաների հետ բազմամարդ վայրեր այցելելիս, լողավազաններում լողանալու դեպքում՝ լողափի չմշակված հատվածներում լողանալիս և այլն:

Շարունակությունը՝ «Փաստ» օրաթերթի այսօրվա համարում