Նախատեսվում է դպրոցական զինղեկների համար տարիքային շեմ սահմանել. ԿԳՆ պաշտոնյա

Դպրոցում ռազմագիտության ուսուցիչների՝ զինղեկների 90 տոկոսը կենսաթոշակային տարիքի են: Նրանց հիմնական մասը բավարար կերպով չեն զբաղվում պատանիների ռազմագիտական պատրաստվածությամբ. նման համոզմունք հայտնեց Tert.am խմբագրություն դիմած քաղաքացիներից մեկը, ով չցանկացավ ներկայանալ:

Ըստ նրա, տղաները բանակ պետք է զորակոչվեն որոշակի գիտելիքներ արդեն իսկ ձեռք բերած, բայց թոշակառու զինղեկներն իրենց աշխատանքն այդքան էլ չեն կարևորում:

Քաղաքացին նշեց, որ թոշակառու տարիքի զինղեկները ոչ մի կերպ չեն ուզում զիջել իրենց տեղը պահեստազորում գտնվող զինվորականներին, չնայած նրան, որ բարձր զինվորական թոշակ են ստանում:

Քաղաքացին մատնացույց արեց զինկոմիսարիատների թվի կրճատումները և նշեց, որ շատ երիտասարդ զինվորականներ գործազուրկ են մնացել և կարող են զբաղեցնել այդ տեղերը:

ՀՀ ԿԳՆ աշխատակազմի մարզառազմական և արտաուսումնական դաստիարակության վարչության գլխավոր մասնագետ Արթուր Կարապետյանը Tert.am-ի հետ զրույցում պնդեց, որ 90 տոկոս տարիքային ցենզի հետ կապված քաղաքացու բողոքն իրականությանը չի համապատասխանում, թեև հաստատեց՝ իհարկե կենսաթոշակառուներ կան և բավականին մեծ տարիքով զինվորական ղեկավարներ դպրոցներում դասավանդում են:

«Դա փաստ է, և Կրթության նախարարության համար, իհարկե, մտահոգության խնդիր։ Մենք արդեն 2 տարի է՝ աշխատում ենք այդ ուղղությամբ, բայց իհարկե ունենք շատ լավ մասնագետներ, երիտասարդ մասնագետներ, ովքեր լավ էլ աշխատում են»,-ասաց նա:

Արթուր Կարապետյանը նախ հստակեցրեց, որ որևէ ուսուցչի՝ այդ թվում նաև ռազմագիտության ուսուցչի համար տարիքային որևէ շեմ սահմանված չէ որևէ օրենքում կամ այլ իրավական ակտերում, այդ իսկ պատճառով տնօրենները կամ ուսումնական հաստատությունները նրանց ազատելու որևէ հիմք չունեն:

ՀՀ ԿԳՆ աշխատակազմի մարզառազմական և արտաուսումնական դաստիարակության վարչության գլխավոր մասնագետը նշեց, որ նախարարությունն առաջիկա ժամանակահատվածում նախաձեռնել է, որպեսզի օրենքում փոփոխություն կատարի: «Նախաձեռնել ենք ստեղծել այն հիմքերը, որ կարողանանք հատկապես զինվորական ղեկավարների համար սահմանել տարիքային շեմ: Դա իսկապես մեզ համար էլ մտահոգիչ է, որովհետև մենք ոլորտը վերաթարմացնելու և երիտասարդացնելու խնդիր ունենք այս պահին»,-ասաց նա:

Արթուր Կարապետյանը նշեց, որ և՛ Կրթության նախարարությունը, և՛ ՊՆ-ն իրավասու չեն զինղեկների ընտրության հարցում: «Զինվորական ղեկավարի ընտրությունն իրականացվում է ուսուցչի մրցույթի կարգով, որն իրականացնում է դպրոցը: Դպրոցը թափուր տեղ ունենալու դեպքում հայտարարություն է տալիս և նշում այն չափորոշիչները, որոնք նախատեսված են իրավական ակտերով: Այսինքն՝ եթե մարդը գալիս, ներկայանում է դպրոց, ներկայացնում պահանջվելիք չափորոշիչները, ապա համապատասխանելու դեպքում մասնակցում է մրցույթին: Հաղթողների հետ դպրոցի տնօրենները կնքում են պայմանագիր»,-ասաց նա և նաև հավելեց, որ իրավական ակտերում հստակ ամրագրված է, որ դպրոցի զինվորական ղեկավարների ընտրությունը պահեստազորի սպաներից են վերցնում:

Իսկ ինչ վերաբերում է քաղաքացու դիտարկմանը, թե զինկոմիսարիատները կրճատվել են, և երիտասարդ կադրերով կարող են դպրոցները համալրվել, Կարապետյանը նշեց. «Նախ զինկոմիսարիատների կրճատումը երկու ամսվա գործընթաց է և չի կարող կապ ունենալ ոլորտի խնդիրերին: Բացի այդ, եթե ձևակերպվի, որ իրենց զինվորական ծառայությունն ավարտել են, մնացել են պահեստազոր և հայտարարություն տեսնեն ու գտնեն, որ իրենք համապատասխանում են ուսուցչի մրցույթին մասնակցելու համար, կարող են մասնակցել»: