Հնչեղության համար ինձ վրա կարող էին բարդել նաև Քենեդու սպանությունը

ՀՀ ֆինանսների նախկին նախարար Վարդան Արամյանը ֆեյսբուքյան իր էջում գրում է.

Սիրելի Հայրենակիցներ,

Երեկ Հրապարակ թերթում կարդացի մի նամակի հրապարակում, կապված Կամուրջ վարկային կազմակերպության հետ ( link- https://www.hraparak.am/posts/5b51e203eb246006af710792 ), որտեղ հեղինակը մեղմ ասած, սխալ այլ տեղեկատվությունների հետ մեկտեղ, նամակի վերջում շոշափում է նաև իմ անունը՝ կարծում եմ հարցին լրացուցիչ հնչեղություն տալու մտադրությամբ: Թերևս այլ պայմաններում երբեք չէի անրադառնա հեղինակի այս անհեթեթությանը, սակայն միգուցե ձևավորված մթնոլորտում կլինեն մարդիկ, որոնք կարող են մի պահ կարծել թե գրվածը կարող է ճշմարտության հետ աղերսներ ունենալ: Հետևապես կցանկանայի 3 դիտարկում անել.

Ա) Հորդորում եմ և սիրով պատրաստ եմ պատկան ցանկացած մարմնի հետ ցանկացած ձևաչափով համագործակցել պարզելու, թե արդյոք եղել են իմ կողմից թույլ տրված որևէ խախտում կամ այլ ոչ պարկեշտ գործողություն: 

Բ) Ամենայն պատասխանատվությամբ հայտարարում եմ - եթե որևէ կերպ որևէ մեկը կկարողանա փաստերով հիմնավորել ինչ որ իրավիճակում, ի վնաս մեր հասարակության իմ կողմից կատարված որևէ բացթողում, պատրաստ եմ հրապարակային ներողություն խնդրել իմ հայրենակիցներից և կրել պատասխանատվություն:

Գ) Բոլոր նրանց համար, ովքեր տեղյակ չեն նշեմ - ես հանդիսացել եմ (ընդ որում ոչ ի պաշտոնե այլ որպես Վարդան Արամյան) ոչ թե Կամուրջ ՈւՎԿ կառավարման խորհրդի, այլ վերջինիս հիմնադիր միկրոձեռներեցության զարգացման բարեգործական հիմնադրամի հոգաբարձուների խորհրդի նախագահ ՀԱՍԱՐԱԿԱԿԱՆ հիմունքներով, (Համաձայն hիմնադրամների մասին ՀՀ օրենքի հոդված 22-ի պահանջների և պահպանելով հանրային ծառայության մասին օրենքի 23-րդ հոդվածով նախատեսված հանրային ծառայողի կամ պաշտոնատար անձի նկատմամբ կիրառվող սահմանափակումները), ընդ որում ունենալով որոշումների կայացման 5 ձայնից 1 ձայնի իրավունք:

Հ.Գ. հրապարակված նամակի բովանդակությունից ուղղակի ցայտուն երևում է ուղղորդումները, հակառակ պարագայում անտրամաբանական է, որ վարկառուն իր «խախտված» իրավունքներում մեղադրի մի մարդու, որը որևէ տրամաբանական կապով չի կապվում դրա հետ: 

Հետևապես՝ սիրելի պատվիրատու խորհուրդ կտամ ավելորդ ջանքեր չգործադրել, նույն տրամաբանությամբ կարող էիք հնչեղության համար ինձ վրա բարդել Քենեդու սպանությունը:

Հ.Գ.2 Ես մեծ հարգանք ունեմ լրատվական դաշտի, այդ թվում նաև Հրապարակի բոլոր գործընկերների նկատմամբ և փորձում եմ ըմբռնումով մոտենալ այս ամենին, սակայն երևի թե ճիշտ կլիներ մինչ նման տեղեկատվության հրապարակում լսել նաև մյուս կողմին, որպեսզի ապահովվի հաշվեկշռվածությունը:

Հ.Գ.3 Ինձ այս պատմությունը հիշեցնում է հայտնի անեկդոտը- մեկը մյուս ընկերոջն ասում է՝

- Լսիր գիտեիր, որ էս Պողոսի կինն անբարոյական մանեկող է

- Բայց Պողոսն ամուսնացած չէ և կին էլ չունի

- Դե ես իմն ասացի, դու էլ դու գիտես…

Մնացեք Խաղաղությամբ: