Փոխադարձ համաձայնությամբ ամուսնալուծվելու դեպքում դատարան չեն գնա. «Փաստ»

«Փաստ» օրաթերթը գրում է.

Փոխադարձ համաձայնությամբ ամուսնալուծվելու դեպքում այլևս կարիք չի լինի գործը քննել դատարանում: ՀՀ արդարադատության նախարարության կողմից մշակվել է մի նախագիծ, որի ընդունման դեպքում ամուսինների փոխադարձ համաձայնության առկայության ժամանակ կբացառվեն դատական կարգով ամուսնալուծության դեպքերը, եթե ամուսնալուծությունից բացի չեն ներկայացվել այլ պահանջներ: Արդյունքում էականորեն կնվազի դատարանների ծանրաբեռնվածության մակարդակը:

ՀՀ ընտանեկան օրենսգրքի 16–րդ հոդվածի 1–ին մասի գ) կետի համաձայն՝ ամուսնալուծությունը կատարվում է դատական կարգով, եթե ամուսինները ցանկանում են փոխադարձ համաձայնությամբ ամուսնալուծվել դատական կարգով: Մի շարք երկրների ամուսնաընտանեկան իրավակարգավորումների ուսումնասիրությունը վկայում է, որ ամուսնությունն առավելապես լուծվում է դատական կարգով` ամուսիններից մեկի` ամուսնալուծվելու վերաբերյալ համաձայնության բացակայության պարագայում: Ինչ վերաբերում է փոխադարձ համաձայնությամբ ամուսնալուծությանը, ապա այդ դեպքերում նախատեսվում են արտադատական որոշակի ընթացակարգերի միջոցով վեճերի լուծման ընթացակարգեր, օրինակ` ՔԿԱԳ մարմիններ, նոտար: Ամուսինների փոխադարձ համաձայնության առկայության դեպքում արտադատական կարգով ամուսնալուծության իրականացման սահմանափակումներ նախատեսվում են միայն երեխաների շահերի պաշտպանության և օրենսդրորեն կանխորոշված որոշակի շահերի հաշվառման նկատառումներից ելնելով (ում հետ են ապրելու երեխաները, երեխաներին և (կամ) անաշխատունակ անապահով ամուսնուն պահելու համար ապրուստի միջոցները հոգալու կարգը, այդ միջոցների չափերը կամ ամուսինների ընդհանուր գույքի բաժանումը):

Այս ամենի և դատարանների ծանրաբեռնվածության նվազեցման նկատառումներից ելնելով՝ նախագծով առաջարկվում է բացառել ամուսնալուծության վերաբերյալ ամուսինների փոխադարձ համաձայնության առկայության դեպքում դատական կարգով ամուսնալուծությունը, բացառությամբ այն դեպքերի, երբ առկա է օրենքով կանխորոշված շահերի հաշվառման և պաշտպանության անհրաժեշտություն, այսինքն՝ ամուսնալուծության հետ միաժամանակ ներկայացվել են նաև Ընտանեկան օրենսգրքի 17–րդ հոդվածով նախատեսված վեճերի հետ կապված պահանջներ:

Այնպես որ, ամուսնալուծության վերաբերյալ փոխադարձ համաձայնության առկայության դեպքում նախատեսվում է քաղաքացիական կացության ակտերի պետական գրանցում իրականացնող մարմիններում ամուսնալուծությունը գրանցելու կարգ, եթե ամուսնալուծության պահանջի հետ միաժամանակ դատարան չեն ներկայացվում այլ պահանջներ: