Հայ-վրացական հարաբերությունների մերձեցումը՝ մեսիջ Ադրբեջանին և Թուրքիային. վրացագետ

Անցած շաբաթվա վերջում տեղի ունեցավ Սերժ Սարգսյանի այցը Վրաստան: Past.am-ի հետ զրույցում վրացագետ Ալիկ էրոյանցը խոսել է այցի արդյունավետության մասին: Ըստ Էրոյանցի՝ այս փոխայցերը հիմք են տալիս մտածելու, որ հետագայում նույնպես հայ-վրացական հարաբերությունները շարունակելու են զարգանալ դրական հարթության մեջ, և այն խնդիրները, որոնք ենթադրվում էին, որ պետք է ի հայտ գան երկու երկրների՝ տարբեր ինտեգրացիոն գործընթացներին մասնակցելուց հետո, նույնպես հօդս ցնդեցին:

«Թե՛ Հայաստանի, թե՛ Վրաստանի ղեկավարները բարձրաձայնում են, որ կողմերը կարողացան օգուտ քաղել: Այդ մասին խոսեց նախագահ Մարգվելաշվիլին, ինչպես նաև Վրաստանի խորհրդարանի խոսնակ Դավիթ Ուսուպաշվիլին, ով ևս բավական ջերմ խոսեց հայ-վրացական հարաբերությունների մասին: Իսկ նախագահի այցի մասին նա հայտարարեց, որ դա ուղղակի այցելություն չէ, նույնիսկ եթե բարեկամ երկրի նախագահն է այցելում, այդուհանդերձ, դա իրենց համար շատ կարևոր է: Կարելի է ենթադրել, որ հայ-վրացական հետագա հարաբերությունների զարգացումը ևս լուրջ ձեռքերումներ արձանագրելու հույսեր է ներշնչում»,- նշեց Էրոյանցը:

Նրա խոսքով՝ բավականին հետաքրքիր է այն հանգամանքը, որ փոխայցելություններն այսօր ավելի շատ են, քան Վրաստանի նախկին իշխանությունների ժամանակ: «Սա խոսում է առկա դրական դինամիկայի մասին: Այդ այցերն են, որ նպաստում և խթան են հանդիսանում կողմերի միջև ձեռք բերվող պայմանավորվածություններն ի կատար ածելու համար: Եթե հետևենք ընդհանուր զարգացումներին, կարծում եմ, որ վերջին 1-2 տարվա ընթացքում բավականին լուրջ հաջողություններ կան, ինչը նաև բարձրաձայնվեց ՀՀ նախագահի այցի ժամանակ: Նշեմ նաև, որ Հայաստանի և Վրաստանի հարաբերությունները փոխվստահության մթնոլորտում են: Երկու երկրները միմյանց լավ են հասկանում տարածաշրջանում տիրող իրադարձությունների համատեքստում, բավականին ազատ և անկաշկանդ մթնոլորտում է տեղի ունենում շփումը: Այդ մասին հայտարարեց նաև իրենց Աժ նախագահը» ,-ընդգծում է մեր զրուցակիցն ու ավելացնում, որ վրացի պաշտոնյաների հայտարարությունները վկայում են վերջիններիս բարյացկամության մասին:

«Խոսվեց սահմանային «Բարեկամության կամուրջի» շինարարության մասին: Թբիլիսիում ՀՀ նախագահը մասնակցեց Սուրբ Գևորգ եկեղեցու բացման արարողությանը, որը վերանորոգվեց թե՛ հայ, թե՛ վրացի բարերարների շնորհիվ: Նաև այդ գործում իր ֆինանսական մասնակցությունն ուներ նախկին վարչապետ Բիձինա Իվանիշվիլին: Իվանիշվին նշում էր, որ մշակութային օջախների և եկեղեցիների պատկանելության մասով հայ-վրացական հարաբերություններում խնդիրներ կան, բայց կարևոր է դրանց պահպանումը, որ հետո մասնագետները որոշեն դրանց պատկանելության հարցը»,- հիշեցնում է Վրաստանի հարցերով փորձագետը:

Նրա դիտարկմամբ՝ վրացական լրատվամիջոցներում այս այցելությունը կարևորվեց նաև Իրանից Վրաստան՝ Հայաստանի միջոցով երկաթգծի անցկացման հարցի տեսանկյունից: «Նշվում էր, որ այցն անակնկալ է: Իմ կարծիքով՝ նման այցելությունը չէր կարող անակնկալ լինել: Ընդհանուր առմամբ, սա նաև մեսիջ էր Թուրքիային և Ադրբեջանին, որոնք արձանագրում են այդ փաստն ու խանդով են մոտենում այդ ամենին: Նույնիսկ իշխանությունների ենթակայության տակ գտնվող լրատվամիջոցները գրում են, որ Վրաստանը դավաճանում է, հարաբերություններ է զարգացնում իր բարեկամի թշնամու հետ:

Վրաստանի ներկա իշխանությունները վարում են մի քաղաքականություն, որը դուր չի գալիս ադրբեջանցիներին: Նրանք փորձում են չեզոքացնել ադբրեջանական էներգետիկ մենաշնորհը՝ ռուսական «Գազպրոմ» ընկերությունը ներգրավելով: Այդ մասին բացահայտ խոսում է Իվանիշվիլին, էներգետիկայի նախարար Կախա Կալաձեն»,- փաստում է Ալիկ Էրոյանը՝ հավելելով , որ վերջերս նկատվում է վրաց-ադրեջանական հարաբերությունների սառեցում:

Լևոն Փանոսյան