«Սահմանադրական կարգի բռնի փոփոխումը և դրա խախտումն առաջինը տեսանք 96 թվականին». «Փաստ»

«Փաստ» օրաթերթը գրում է.

«Ազգային ժողովրդավարների դաշինք» կուսակցության ղեկավար Արշակ Սադոյանը անկախությունից ի վեր ակտիվ քաղաքականությամբ է զբաղվում: Ու թեև վերջին տարիներին պրակտիկ դաշտում այդքան էլ ակտիվ չէ, սակայն այն եզակի գործիչներից է, ով բոլոր երեք նախագահների ժամանակ էլ ցույց է տվել, որ անհաշտ է անարդարության, ստի ու կեղծիքի նկատմամբ: Մշտապես հանդես գալով ընդդիմադիր թևում՝ ակտիվ մասնակցել է նաև մի քանի նախագահական ընտրությունների և կարծում է, որ ոչ միայն 2008–ի, այլև 1996 –ի սահմանադրական կարգը խախտելու համար պետք է օրվա իշխանությունները պատասխանատվության ենթարկվեն:

«Այս այլանդակված, պղտոր, վատ համակարգի ճարտարապետը Լևոն Տեր–Պետրոսյանն է, ով համաժողովրդական շարժման հետևանքով իշխանության գալուց հետո՝ 90 թվականի կեսերից, սկսեց այլանդակել շարժումը և ստեղծեց այսպիսի մի կեղտոտ համակարգ: Սահմանադրական կարգի բռնի փոփոխումը և դրա խախտումն առաջինը տեսանք 96 թվականին, երբ ես մոտ մեկ տարի ստիպված էի ընդհատակում անցկացնել: Այդ ժամանակ էլ հարյուրավոր մարդիկ ձերբակալվեցին, կրկին պարետային ժամ մտցվեց: Բայց մեր ջանքերով կարողացանք այնպես անել, որ գոնե զոհեր չլինեն, չնայած, որ այդ ժամանակ բազմաթիվ վիրավորներ եղան: Եվ այդ ամենի պատճառն այն է, որ Լևոն Տեր–Պետրոսյանը որոշել էր սահմանադրական կարգը խախտել, ընտրությունների արդյունքները կեղծել և պահպանել իր իշխանությունը »,– ասաց Ա. Սադոյանը:

Նրա կարծիքով, 96 թվականի սեպտեմբերին տեղի ունեցած դեպքերն ավելի սարսափելի են եղել, քան 2008–ին էր, իսկ Լ. Տեր– Պետրոսյանն իշխանությունը պահելու համար պատրաստ եղավ անգամ իր գործընկերներին զոհաբերել: 

«Նա ամեն ինչ արեց, որ Բաբկեն Արարքցյանը, Արա Սահակյանը և մյուսները իբրև թե ժողովրդին «համոզելու» համար դուրս գային մահվան բերան: Եվ միայն մեր շնորհիվ էր, որ նրանք այդքան էլ լուրջ վնասվածքներ չստացան: Լ. Տեր–Պետրոսյանը զոհաբերում էր բոլորին՝ միայն մեկ բանի համար, որ կարողանար ասել, թե ժողովրդի բռնի ուժը կանխելու համար է խախտել սահմանադրական կարգը: Այնպես որ, սահմանադրական կարգը խախտելու առաջին օրինակը եղել է առաջին նախագահի կողմից:

Պետք է հիշել, որ այդ օրերին իշխանությունների կողմից հնչեց հետևյալ միտքը, որ եթե անգամ 100 %–ով էլ Վազգեն Մանուկյանը հաղթեր, ապա նրան իշխանություն չէին տալու: Թքած Սահմանադրության վրա էլ, ամեն ինչի վրա էլ»,– ասաց Ա. Սադոյանը:

Քաղաքական գործիչը համոզված է, որ հայ ժողովուրդն իսկապես իմաստուն ժողովուրդ է և պատահական չի ժամանակին ասել, որ փոս փորողն ինքն է ընկնում փոսը: Ըստ նրա՝ փոս փորող Լ. Տեր–Պետրոսյանը ընկել է իր փորած փոսը, իսկ այն, ինչ տեղի ունեցավ 2008–ին, անձամբ նրա մեղքով է եղել:

«Որովհետև, եթե Լ. Տեր–Պետրոսյանը համարձակվեր դուրս գալ իր ամառանոցից և գլխավորեր Մյասնիկյանի արձանի մոտ տեղի ունեցող հանրահավաքը, ապա կարծում եմ, որ մենք 10 հոգի զոհ չէինք ունենա: Ժամանակին սահմանադրական կարգը խախտած մարդը հետագայում վախեցածի վարքագիծ ցուցաբերեց: Եվ եթե մարտի 1–ի զոհերի հարցում հիմնական մեղավորը Ռ. Քոչարյանն է, ապա ես կարծում եմ, որ նա միակ մեղավորը չէ, և պետք է բոլորն էլ պատասխան տան իրենց արարքների համար: Մեր պատմությունը չպետք է կեղծված լինի: Եվ ես համոզված եմ, որ Նիկոլ Փաշինյանն էլ, մյուսներն էլ վաղը, մյուս օրը կանդրադառնան նաև 96–ի դեպքերին և վաղեմության ժամկետը հաշվի չառնելով՝ պատասխանատվության կկանչեն նաև Լ. Տեր–Պետրոսյանին և մյուսներին, ովքեր առաջին անգամ կազմակերպեցին սահմանադրական կարգի խախտումը»,– ասաց Ա. Սադոյանը:

Զուգահեռներ անցկացնելով 96–ի սեպտեմբերի 25–ի և 2008–ի մարտի 1–ի դեպքերի միջև՝ նա նշեց, որ հանրահավաքների 

Շարունակությունը՝ «Փաստ» օրաթերթի այսօրվա համարում