«Հայաստան» հիմնադրամը նորոգում է Նալբանդյան գյուղի դպրոցը

Արմավիրի մարզի Նալբանդյան գյուղի միջնակարգ դպրոցը հիմնանորոգվում է «Հայաստան» հիմնադրամի Տորոնտոյի տեղական մարմնի բարերարներ տեր եւ տիկին Արմեն եւ Պերճուհի Նալպանտեանների հովանավորությամբ: Ինչպես տեղեկացրին «Հայաստան» համահայկական հիմնադրամից, արդեն ավարտվել է երեք մասնաշենքից բաղկացած եռահարկ կառույցի (3200 քմ) 2-րդ եւ 3-րդ մասնաշենքերի նորոգումը: Վերակառուցման եւ նորոգման արդյունքում մասնաշենքերն ուժեղացվել են, վերակառուցվել է ինժեներական ներքին ցանցը, այդ թվում` էլեկտրական, ջրամատակարարման եւ ջեռուցման համակարգերը, կառուցվել են գրանիտե  եւ լամինատե հատակներ:

Նախկինում երկու մասնաշենքերին սպասարկող մեկ սանհանգույցի փոխարեն կառուցվել է ընդհանուր թվով վեց սանհանգույց: Կրթօջախի 600 աշակերտները դասերն անցկացնում են արդեն նորոգ մասնաշենքերում: Ներկայումս ուժեղացվում եւ հիմնանորոգվում է առաջին` գլխավոր մասնաշենքը: Սկսվել է մարզադահլիճի կառուցումը, որի բացակայությունը մեծ բաց էր նման խոշոր կրթօջախի համար: Գլխավոր մասնաշենքի եւ մարզադահլիճի պատրաստ լինելուն պես դպրոցը կկահավորվի եւ կապահովվի անհրաժեշտ սպորտային գույքով:

Նալբանդյանի գյուղապետ Գրիգոր Մկրտչյանը նշել է, որ գյուղի դպրոցականներին ու ուսուցիչներին բարենորոգ ու հարմարավետ պայմաններ պարգեւելուց բացի, դպրոցի վերակառուցումն այս տասը ամիսների ընթացքում ամիսը միջին հաշվով 30 բանվորի է ապահովել աշխատանքով ու եկամտով:

Գյուղացիներն ուրախությամբ ասում են, որ արագիլներն անգամ ողջունում են դպրոցին նոր կյանք տալու այս ձեռնարկը. տարիների ընթացքում առաջին անգամ նրանք բույն էին դրել դպրոցի տանիքի չորս անկյուններում:

Հայաստան հիմնադրամի Տորոնտոյի տեղական մարմինը (Hayastan Foundation Toronto Inc.) շահույթ չհետապնդող կազմակերպություն է, որը ստեղծվել է 1993թ.-ին` խթանելու  մարդասիրական օգնությունն ու ենթակառուցվածքների զարգացումը Հայաստանում եւ Արցախում: